KYONGO KYA ĨTHANGŨ YA MBEE: MAŨNDŨ ALA TWĨMANYĨASYA KUMANA NA MOSE
Mose Aĩ Ũũ?
Nĩ kyaũ ũlilikanaa weew’a ĩsyĩtwa Mose yawetwa? Ũlilikanaa ĩũlũ wa . . .
-
kana keekĩiwe kĩkavũnĩ nĩ inyia wako na kavithwa Ũsĩnĩ wa Naelo?
-
kavĩsĩ kaeeiwe mũsyĩnĩ wĩ na ũthwii nthĩ ya Misili nĩ mwĩĩtu wa Valao ĩndĩ kalea kũlwa kana kaĩ Mũisilaeli?
-
mũndũũme ũla wekalaa nthĩ ya Mitiani e mũĩthi vandũ va myaka 40?
-
mũndũũme ũla waneenie na Yeova * e mbee wa kakuthu kaakanĩte mwaki?
-
mũndũũme ũla waũngamie e na ũkũmbaũ mbee wa mũsumbĩ wa Misili, aimũkũlya athasye Aisilaeli kuma ũkombonĩ?
-
mũndũũme ũla watongoew’e nĩ Ngai kũweta ala Mokũno Ĩkũmi ĩũlũ wa nthĩ ya Misili ĩla mũsumbĩ wa nthĩ ĩsu wamũng’endeie Ngai wa w’o?
-
mũndũũme ũla watongoeisye Aisilaeli kyalonĩ kĩasa kya kuma Misili?
-
mũndũũme ũla watũmĩiwe nĩ Ngai kũaany’a Ũkanga Mũtune?
-
mũndũũme ũla wanengie Aisilaeli ĩla Mĩao Ĩkũmi kuma kwa Ngai?
MOSE nĩweekie maũndũ asu onthe na angĩ. Nĩkyo kĩtumi mũndũũme ũsu mũĩkĩĩku ũnengetwe ndaĩa mũno nĩ Aklĩsto, Ayuti, na Aisilamu!
Vate nzika, Mose aĩ mwathani woonanisye “kũtĩsya kw’onthe kũnene.” (Kũtũngĩlĩlwa Kwa Mĩao 34:10-12) Nĩweetĩkĩlile Ngai amũtũmĩe kwĩka maũndũ manene. Ĩndĩ Mose aĩ mũndũ o taitũ. O ta mwathani Eliya, ũla waũngeme ũtee wa Mose woninĩ ĩvinda yĩla Yesũ waĩ vaa ĩũlũ wa nthĩ, Mose “aĩ mũndũ o taitũ.” (Yakovo 5:17, The Holy Bible in Current Kikamba Language; Mathayo 17:1-9) Mose nĩwakwatiwe nĩ mathĩna maingĩ o ta ala matũkwataa ũmũnthĩ, ĩndĩ nĩwamakĩlilye vinya.
We nũkwenda kũmanya eekie ũu ata? Sũanĩa ndaĩa itatũ nzeo ila Mose waĩ nasyo na maũndũ ala tũtonya kwĩmanyĩsya kumana na ngelekany’o yake.
^ kal. 7 Mbivilia yonanĩtye kana ĩsyĩtwa ya Ngai nĩ Yeova.
