YESŨ nĩwamanyĩisye ĩũlũ wa mboya mavinda maingĩ. Ĩvindanĩ yake, atongoi ma ndĩni ya Kĩyuti mavoyeaa “makomanĩonĩ ma nzĩa ila nene.” Nĩkĩ mekaa ũu? “Nĩ kana moneke nĩ andũ.” Na nengĩ now’o mendaa andũ mone kĩthito kĩla maĩ nakyo na ũndũ meyumĩtye kwondũ wa ndĩni yoo. Aingĩ maumasya mboya ndaasa maitũngĩlĩĩla ndeto o ila ila, maisũanĩa kana “kũneena ndeto mbingĩ” nĩkw’o kwesaa kũtuma mboya ya mũndũ yĩw’ĩka. (Mathayo 6:5-8) Yesũ oonanisye kana maũndũ ta asu nĩ ma mana na maitethya, nĩ kana atetheesye ala maĩ na ngoo nzeo mamanye maũndũ ala mataaĩle kwĩka yĩla meũvoya. Ĩndĩ o na vailye ũu, ndaaĩka o kũmanyĩsya ũndũ tũtaĩlĩte kũvoya.

Yesũ amanyĩisye kana mboya sitũ nĩsyaĩle kwonany’a kana twĩ na mea ma kwona Ngai aithesya ĩsyĩtwa yake, aiete Ũsumbĩ wake, na kwenda kwake kũyĩkĩka kũũ nthĩ. O na ĩngĩ nĩwamanyĩisye kana nĩ ũndũ wa vata kũmũvoyaa Ngai atũtetheeasye maũndũnĩ ala matũkonetye ithyĩ ene. (Mathayo 6:9-13; Luka 11:2-4) Yesũ nĩwatũmĩie ngelekany’o kwonany’a ũndũ twaĩle kũvoya na kĩthing’ĩĩsyo, twĩ na mũĩkĩĩo, na wĩnyivyo, nĩ kana Ngai etĩkĩle mboya sitũ. (Luka 11:5-13; 18:1-14) O na nĩwakindĩlĩĩle ũndũ ũsu kwĩsĩla ngelekany’o yake mwene na ti o ndeto tũ.—Mathayo 14:23; Maliko 1:35.

Vai nzika kana maũndũ asu wamanyĩisye nĩmatetheeisye amanyĩw’a make maĩlangye mboya syoo. Ĩndĩ o na ũu wĩ o vo, Yesũ eeteelile nginya ũtukũ wa mũthya e vaa ĩũlũ wa nthĩ, nĩ kana amanyĩsye amanyĩw’a make ĩsomo ya vata mũno yakonetye mboya.

Yesũ atũmĩie ũtukũ wake wa mũthya kwĩkĩa vinya atũmwa make ala aĩkĩĩku. Yĩu nĩyo ĩvinda yĩla yaaĩlĩte vyũ ya kũmatavya ũndũ mũna mweũ. Ameie atĩĩ: “Nyie ninyie nzĩa na ninyie w’o na ninyie thayũ. Vaiĩ mũndũ wũkaa kwa Asa atesĩle kwakwa.” Ĩtina nĩwamatavisye ũndũ wa kũmekĩa vinya. Ameie: “Ũndũ o na wĩva ũla mwĩvoya ĩsyĩtwanĩ yakwa, ngawĩka, nĩ kana Asa akumw’e kwĩsĩla Mwana. Ethĩwa mũkavoya ũndũ o na wĩva ĩsyĩtwanĩ yakwa, ngawĩka.” Akilye kũmina ũneenany’a wake, aisye atĩĩ: “Kũvikĩĩa yu vaiĩ kĩndũ o na kĩmwe mwaamũvoya ĩsyĩtwanĩ yakwa. Voyai na mũkanengwa, nĩ kana ũtanu wenyu wusũe.”—Yoana 14:6, 13, 14; 16:24.

Isu syaĩ ndeto sya vata mũno. Ĩvuku yĩmwe yĩineenea ndeto isu yaĩtye atĩĩ: “Ũũ waĩ ũalyũku mũnene wakonetye mboya.” Yesũ ndoonanasya kana andũ maaĩle kũeka kũmũvoya Ngai na maimũvoyaa newe. Vandũ va ũu, awetaa nzĩa nzaũ ya kũmũvoyaa Yeova Ngai.

Kuma tene Ngai ethĩĩtwe ayĩthukĩĩsya mboya sya athũkũmi make aĩkĩĩku. (1 Samueli 1:9-19; Savuli 65:2) Ĩndĩ o na vailye ũu, yĩla Ngai weekie Ũtianĩo wa Mĩao na mbaĩ ya Isilaeli, ala mendaa mboya syoo syĩtĩkĩlwe, maaĩle kũmanya kana mbaĩ ya Isilaeli nĩyo yanyuvĩtwe nĩ Ngai. O na ĩtina, kuma ĩvinda ya Solomoni, nĩmaaĩle kũmanya kana Ngai anyuvĩte ĩkalũ nĩ kana nthembo syumĩaw’e vo. (Kũtũngĩlĩlwa Kwa Mĩao 9:29; 2 Mavinda 6:32, 33) Ĩndĩ o na vailye ũu, mũvango ũsu wa ũthaithi waĩ o wa kavinda. O tondũ mũtũmwa Vaulo waandĩkie, Mĩao ĩla yanengetwe Aisilaeli, na nthembo ila maumĩasya ĩkalũnĩ syaĩ “kyuu kya maũndũ maseo ala makoka, ĩndĩ ti a maũndũ mbene.” (Aevelania 10:1, 2) Kyuu kyu kyaĩ kĩvetangwe nĩ kana kĩla kya w’o kyũke. (Akolosai 2:17) Kuma mwaka wa 33 ĩtina wa Klĩsto, ngwatanĩo ya mũndũ mwene vamwe na Yeova ndyesaa kumana na kũkwata ĩla Mĩao ya Mose. Vandũ va ũu, yumanaa na kũmwĩw’a ũla waĩ eanĩsye Mĩao ĩsu, nake nĩ Klĩsto Yesũ.—Yoana 15:14-16; Akalatia 3:24, 25.

Yesũ nĩwambĩĩisye nzĩa nzaũ ya kũneenaa na Yeova, na oonany’a kana we mwene nĩ mũnyanya wĩ vinya, ũla ũtũvingũĩaa nzĩa nĩ kana Ngai ethukĩĩsye mboya sitũ na aisũngĩa. Nĩ kyaũ kĩtumaa Yesũ eka ũndũ ũsu kwondũ witũ?

Nũndũ ithyonthe twĩ ene naĩ, vai mũndũ ũtonya kwĩka ũndũ o na ũmwe ũla ũtonya kũtũthesya kumana na naĩ ĩsu, kana ũkatuma twĩthĩwa na ngwatanĩo nzeo na Yeova, ũla nĩ Ngai mũtheu. (Alomi 3:20, 24; Aevelania 1:3, 4) Ĩndĩ o na ũu wĩ o vo, Yesũ nĩwaumisye thayũ wake mwĩanĩu, na aĩvĩa naĩ sya andũ ala maĩ matonya kwĩw’anĩthw’a na Ngai. (Alomi 5:12, 18, 19) Ũmũnthĩ onthe ala mekwenda kũthew’a naĩ syoo, me na mwanya wa kwĩthĩwa na ngwatanĩo nzeo na Yeova na maitanĩa ‘ũthasyo wa kũneena’ mbee wa Ngai. Ĩndĩ ũu ũtonyeka ethĩwa nĩmonanĩtye mũĩkĩĩo nthĩnĩ wa nthembo ya Yesũ na nĩmavoyaa kwĩsĩla ĩsyĩtwa yake.—Aeveso 3:11, 12.

Yĩla twavoya kwĩsĩla ĩsyĩtwa ya Yesũ, twĩthĩawa tũyonany’a kana twĩ na mũĩkĩĩo maũndũnĩ aa atatũ makonetye kĩanda kyake nthĩnĩ wa kwĩanĩw’a kwa kĩeleelo kya Ngai: (1) Nĩwe “Kalondu ka Ngai,” ũla nthembo yake ĩtumaa tũkwata ũekeo wa naĩ sitũ. (2) Yeova nĩwamũthayũũkisye, nayu nĩwe ũla “mũthembi mũnene mũno,” ũla ũkatũetee moathimo ala maumanaa na nthembo ya wovosyo. (3) E weka nĩwe “nzĩa” ĩla tũtũmĩaa kũmũvikĩa Yeova kwĩsĩla mboya.—Yoana 1:29; 14:6; Aevelania 4:14, 15.

Yĩla twavoya ĩsyĩtwanĩ ya Yesũ, twonanasya kana nĩtũũmũnenga ndaĩa. Ndaĩa ta ĩsu nĩyaĩlĩte nũndũ wendi wa Yeova nĩ kana, “ĩsyĩtwanĩ ya Yesũ kĩla yĩu yĩtulye ndu . . . , na kĩla ũĩmĩ ũwete ũtheinĩ kana Yesũ Klĩsto nĩwe Mwĩaĩi nĩ kana Ngai ataĩwe, ũla nĩwe Ĩthe waitũ.” (Avilivi 2:10, 11) Na ĩndĩ ũndũ ũla wa vata vyũ nĩ kana yĩla twavoya ĩsyĩtwanĩ ya Yesũ, nĩtũmũtaĩaa Yeova, ũla wanenganie Mwana wake kwondũ witũ.—Yoana 3:16.

Nĩ kana tũelewe kĩanda kya mwanya kĩla Yesũ wĩ na kyo, Mbivilia nĩtũmĩĩte masyĩtwa me kĩvathũkany’o ma ũnene kũmũelesya. Kwa w’o, Yesũ nũnengetwe “ĩsyĩtwa yĩ ĩũlũ wa masyĩtwa ala angĩ onthe.” * Nũnengetwe ũkũmũ w’onthe ĩtunĩ na kũũ nthĩ.—Avilivi 2:9; Mathayo 28:18.

No nginya tũvoyae ĩsyĩtwanĩ ya Yesũ ethĩwa nĩtũkwenda Yeova ethukĩĩsye mboya sitũ. (Yoana 14:13, 14) Ĩndĩ tũyaĩle kũtũngĩlĩĩlaa ndeto “kwĩsĩla ĩsyĩtwanĩ ya Yesũ” o ta kĩthĩo tũ. Nĩkĩ tũtaĩle kwĩka ũu?

Kwasũanĩa ngelekany’o ĩno. Yĩla mũkũni mũna wa viasala waũtũmĩa valũa, nũtonya kwĩthĩwa aminĩĩe na ndeto, “ninyie waku mwendwa.” We no wone ndeto isu ũminĩĩe nasyo ta syĩkwonany’a ũndũ ũkwĩw’a ngoonĩ yake ĩũlũ waku, kana ekĩte o kũminĩĩa valũa ũndũ iminĩĩawa? Kwa w’o, yĩla twatũmĩa ĩsyĩtwa ya Yesũ tũiminĩĩa mboya sitũ, twaĩle kwĩthĩwa tũyonany’a ũndũ wa vata mũno, eka o kwasya ũu ta kĩthĩo, tondũ valũa iminĩĩawa. O na kau nĩtwaĩle kũvoya ‘tũte kũeka,’ twaĩle kwĩkaa ũu kuma ngoonĩ, ĩndĩ ti o ta kĩthĩo.—1 Athesalonika 5:17; Savuli 119:145.

Ũtonya kwĩka ata ũeke kũtũmĩaa ndeto “ĩsyĩtwanĩ ya Yesũ” o ta kĩthĩo? Wĩona ata ũkasũanĩa ĩũlũ wa nguma sya kwendeesya ila Yesũ wĩ nasyo. Sũanĩa ĩũlũ wa maũndũ ala wĩkĩte na ala wĩyũmbanĩtye kwĩka kwondũ waku. Yĩla ũũvoya mũtũngĩe Yeova mũvea na ũimũtaĩa nũndũ wa kũtũmĩa Mwana wake kwa nzĩa ya mwanya. Weeka ũu, wĩĩthĩwa ũtonya kũĩkĩĩa ũndũ ũũ Yesũ ũtwathĩte: “Kĩndũ o na kĩva kĩla mwĩvoya Asa ĩsyĩtwanĩ yakwa, akamũnenga.”—Yoana 16:23.