Aklĩsto nĩmatonya kwosa matambya mana nĩ kana mesũvĩe, ĩndĩ mayosaa matambya me ũtee wa myolooto ĩla yĩ Mbivilianĩ. Myolooto ĩsu nĩvatĩte andũ kwĩkala na mĩio ya kaũ, ta vasitola, mavuti, na mĩio ĩngĩ ta ĩsu, me na kĩeleelo kya kwĩyũkitĩa makesa kũvithũkĩwa nĩ andũ angĩ. Kwasũanĩa myolooto ĩno ĩatĩĩe:

Yeova onaa thayũ wĩ mũtheu, na mũno mũno thayũ wa mũndũ. Ndaviti nĩweesĩ kana Yeova nĩwe “wĩ na mbuluti ya thayũ.” (Sav. 36:9) Kwoou o na ethĩwa Mũklĩsto nũkwosa ĩtambya esũvĩe kana asũvĩe malĩ yake, ndaĩle kwĩsa kwosa ĩtambya yĩtonya kũtuma mũndũ ũngĩ akw’a, na kĩu kĩimũlikya ĩvĩtyonĩ ya kwĩtĩkya nthakame.—Kũt. 22:8; Sav. 51:14.

O na kau nĩ syĩndũ mbingĩ itonya kũtuma mũndũ etĩkya nthakame, nĩ laisi mũno kũaana ũtũmĩĩte ĩvuti, wĩthĩwe weeka ũu ũvangĩte kana ũtavangĩte. * Na eka ũu, ethĩwa ũla waũvithũkĩa nĩwoona ũkwete ĩvuti nake nĩ mũtelemu, maũndũ nĩmatonya kũthũka, na ti vinya kwĩthĩa ũmwe wenyu oaie ũla ũngĩ.

Ĩla Yesũ weeie aatĩĩi make makue mbyũ ũtukũ wa mũthya ĩla waĩ kũũ nthĩ, ndameaa makue nĩ kana maitũmĩe kwĩyũkitĩa. (Luka 22:36, 38) Yesũ ameie makue mbyũ nũndũ ve kĩla wendaa kũmamanyĩsya. Endaa kũmamanyĩsya kana mayaĩlĩte kwĩyũkitĩa, o na mavithũkĩwa nĩ nguthu ya andũ makuĩte mĩio ya kaũ. (Luka 22:52) Nĩkyo kĩtumi ĩla Vetelo watemie ĩla ngombo ya mũthembi mũnene na  ũvyũ Yesũ wamwĩie: “Tũngĩa ũvyũ waku vandũ vaw’o.” Amina kũmũtavya ũu asyokie aweta mwolooto ũngĩ waaĩle kũatĩĩwa nĩ atĩĩi make kũvika o na ũmũnthĩ. Aisye: “Onthe ala makwataa ũvyũ makaanangwa na ũvyũ.”—Mt. 26:51, 52.

Ĩandĩko ya Mika 4:3 yathanie kana andũ ma Ngai “makatusya mbyũ syoo itw’ĩke mĩthya ya maembe ma ng’ombe, na matumo moo tũvyũ twĩ ngoto twa ũsea.” Aklĩsto ma w’o nĩ andũ ma mũuo, na kĩu kyosanĩte na ndeto ila mũtũmwa Vaulo waveveeiwe aandĩka. Atwĩkĩie vinya tũatĩĩe ndeto ii: “Mũikekũle kwa mũndũ o na wĩva. . . . Ethĩwa nũtonyeka, kwa ngalĩ ĩla yenyu, mwĩthĩwe na mũuo na andũ onthe.” (Alo. 12:17, 18) Vaulo akomanie na mathĩna maingĩ mũno, o na nĩwakwatiwe nĩ “mĩisyo ya ing’ei.” Ĩndĩ nĩwaatĩĩaa ndeto isu waandĩkie, na kwoou ndaaenda kwĩsũvĩa atũmĩĩte nzĩa ĩleanĩte na myolooto ya Maandĩko. (2 Ako. 11:26) Amwĩkwatisye Ngai na aatĩĩa ũĩ ũla wĩ Ndetonĩ ya Ngai. Ũĩ ũsu “wĩ kavaa kwĩ mĩio ya kaũ.”—Mũta. 9:18.

Aklĩsto monaa thayũ wĩ wa vata kwĩ syĩndũ sya kĩ-mwĩĩ. Yesũ aisye: “Thayũ wa mũndũ ndumaa syĩndũnĩ syake.” (Luka 12:15) Kwoou ethĩwa nĩwavithũkĩwa nĩ kĩng’ei kĩkuĩte mũio wa kaũ na watata kũneena nakyo nesa na kyaema, Mũklĩsto mũĩ aatĩĩaa mwolooto ũla wĩ ndetonĩ ii sya Yesũ: “Mũikakĩlan’ye vinya na mũndũ mũthũku.” O na no ũmũekee kĩtonyeo kyaku na ngũa yaku ya ĩũlũ, kana kwa ndeto ingĩ, ũmũekee kyonthe kĩla ũkwenda kwosa. (Mt. 5:39, 40; Luka 6:29) * Ĩndĩ kĩndũ kĩla kĩseo vyũ kĩtonya kũũtethya nĩ kũtata ndũkeke kĩndũ kĩtonya kũtuma ũtw’ĩka wa kũatĩĩawa nĩ ing’ei. Tweesũvĩana na “wĩyĩan’yo wa thayũ,” kana kwa ndeto ingĩ, kwĩyonany’a malĩ yitũ, na atũi maitũ mekala matwĩsĩ ta Ngũsĩ sya Yeova syendete mũuo, no kwĩthĩwa tũkaema kũatĩĩwa nĩ mbũlĩli.—1 Yoa. 2:16; Nth. 18:10.

Aklĩsto nĩmanengae ndaĩa mawasya ma ngoo ma ala angĩ. (Alo. 14:21) Aklĩsto amwe nĩmatonya kũseng’a mũno, o na makalulutĩka, mesa kũmanya kana ve Mũklĩsto ũngĩ kĩkundinĩ wĩkalaa na ĩvuti ya kwĩyũkitĩa avithũkĩwa nĩ andũ. Nĩkwĩthĩwa nĩtwendete ala angĩ, nĩtũsũanĩaa mawoni moo o na ethĩwa twĩekana na kĩndũ twĩsĩ nesa vyũ kana silikalĩ nĩtwĩtĩkĩlĩtye twĩthĩwe nakyo.—1 Ako. 10:32, 33; 13:4, 5.

Aklĩsto nĩmatataa methĩwe me ngelekany’o nzeo. (2 Ako. 4:2; 1 Vet. 5:2, 3) Ethĩwa Mũklĩsto nĩwanewa ũtao wa Maandĩko na ĩtina wa vau aendeea kwĩkala na ĩvuti ya kwĩyũkitĩa avithũkĩwa nĩ andũ, ndesa kũtalwa ta ngelekany’o nzeo. Nũndũ wa ũu, ndesa kũnengwa mawĩa kĩkundinĩ, kana akanewa ianda sya mwanya. Vethĩawa vailyĩ oou kwa Mũklĩsto ũla ũthũkũmaa wĩa ũũtuma ekala na ĩvuti. Ti kavaa akamantha wĩa wa mũthemba ũngĩ? *

Vate nzika, Mũklĩsto nĩwĩthĩawa na ũthasyo wa kũnyuva wĩa ũla ũkũthũkũma, ũthasyo wa kũmantha ũndũ ũkwĩsũvĩa, na ũndũ ũkũsũvĩa andũ make, kana malĩ yake. Ĩndĩ o na vailyĩ ũu, myolooto ĩla yĩ Mbivilianĩ ĩtũtetheeasya kwona ũndũ Ngai wĩ ũĩ wĩana na ũndũ ũtwendete. Aklĩsto ala me ngwatanĩo nzeo na Ngai nĩmanengete ndaĩa myolooto ĩsu. Nũndũ wa ũu, nĩmatusaa kwĩkala mate na syĩndũ sya kwĩyũkitĩa, ta mavuti, mavithũkĩwa nĩ andũ. Nĩmesĩ kana ala monanasya kana nĩmamwĩkwatĩtye Ngai kwa kũatĩĩa myolooto ya Mbivilia, nĩmo methĩawa na ũsũvĩo wa w’o na ũtakathela.—Sav. 97:10; Nth. 1:33; 2:6, 7.