Nũndũ tũitesaa mavuku maitũ, amwe monaa ti mavĩtyo kumya kĩndũ kĩsesenĩ kitũ mekĩe isesenĩ ingĩ sya Indaneti kana sya kũea ngewa (social media). Ĩndĩ tweeka ũu twĩthĩawa tũitũla Mĩao ya Kũtũmĩa * kĩsese kitũ, na kĩu nĩkĩetete mathĩna manene. Mĩao ĩsu ĩwetete nesa kana vai mũndũ wĩtĩkĩlĩtw’e “kwosa mĩsolo, mavuku, maũvano [ta jw kana jw.org], mbathi, visa, vitio, kana maũvoo ala me kĩsesenĩ kĩĩ nĩ kana ekĩe Indanetinĩ (isese syonthe sya Indaneti, sya kũtũmĩana vaili, sya kũtũmĩana vitio, kana sya kũea ngewa).” Nĩkĩ tũvatĩtwe?

Kyonthe kĩ kĩsesenĩ kitũ nĩkĩsũvĩe nĩ mĩao ya kumĩthya. Ala makaĩĩte mũĩkĩĩo na ala matũvĩngaa nĩmekĩaa mavuku maitũ isesenĩ syoo nĩ kana makwatye Ngũsĩ na andũ angĩ. Isesenĩ isu syoo mekĩaa ũvoo mesĩ nũũtuma ũla ũkũsoma aya nzika. (Sav. 26:4; Nth. 22:5) Angĩ namo nĩmatũmĩĩte ũvoo ũla wĩ mavukunĩ maitũ kana makatũmĩa ũvano witũ wa jw.org matangasonĩ moo, syĩndũnĩ ila meũthoosya, kana nthĩnĩ wa apps sya simũ. Kwĩyĩandĩkĩthya mĩaonĩ ya kũsũvĩa ũvano witũ na syĩndũ ila tumĩthĩtye kũtũtethasya twĩthĩwe tũtonya kũtũmĩa mĩao kũsiĩĩa mũtũmĩĩle ta ũsu mũthũku wa syĩndũ sitũ. (Nth. 27:12) Ĩndĩ twaekana na andũ, o na ana-a-asa, mekĩe syĩndũ ila syĩ kĩsesenĩ kitũ isesenĩ ingĩ, kana twamaeka matũmĩe ũvano wa jw.org syĩndũnĩ ila meũthoosya, koti no ilee kũtũtetheesya kũsiĩĩa ala meũtũvĩnga kana ala meũtũmĩa syĩndũ sitũ kũkũna viasala.

 Wĩthĩawa ũyĩlikya mũisyonĩ mũnene waumya mavuku maitũ isesenĩ ingĩ eka jw.org. Ĩla “ngombo yĩ na kĩthito na mbũĩ” noyo yĩ yoka ĩnengetwe nĩ Yeova kĩanda kya kũnengane lĩu wa kĩ-veva. (Mt. 24:45) “Ngombo” ĩsu ndĩtũmĩaa kĩsese kĩngĩ eka ii itatũ ĩandĩkĩthĩtw’e: www.jw.org, tv.jw.org, na wol.jw.org. Na twĩ apps o ii itatũ ila iandĩkĩthĩtw’e: JW Language^®, JW Library^®, na JW Library Sign Language^®. No tũtũmĩe isese isu na apps o isu syawetwa tũte na nzika kana tũyĩĩthĩana na matangaso kana kolokolo ũngĩ wa nthĩ ĩno. Ũkaumya lĩu wa kĩ-veva isesenĩ ingĩ kana ũitũmĩa apps ingĩ, no wĩthĩe wĩ mũvĩndũe kana wĩ mwongele ũvũngũ.—Sav. 18:26; 19:8.

Ũndũ ũngĩ, ve isese syĩtĩkĩlasya andũ kũandĩka mawoni vau ĩũlũ wa kĩla kĩkĩĩtwe vo. Kwoou kwĩkĩa mavuku maitũ isesenĩ isu kũnengae ala makaĩĩte mũĩkĩĩo na ala matũvĩngaa mwanya wa kũandĩka maũndũ matonya kũlulutĩkya angĩ maeke kũĩkĩĩa ũseũvyo wa Yeova. Ana-a-asa amwe nĩmalikĩte isesenĩ isu na makambĩĩa kũkananĩsya andũ ta asu. Kĩu kĩtumĩte ĩsyĩtwa ya Yeova yĩthokoanw’a ĩ ya mũno. Kũandĩka mawoni maitũ isesenĩ nĩ kana tũkananĩsye andũ ti nzĩa nzeo ya ‘kũmataa na ũuu ala akananĩi.’ (2 Tim. 2:23-25; 1 Tim. 6:3-5) O na vesĩte kũmanyĩka kana ve andũ mavingũĩte akaondi sya ũvũngũ sya isese sya kũea ngewa na isese ingĩ matũmĩĩte ĩsyĩtwa ya ũseũvyo witũ, ĩsyĩtwa ya Nzama Ĩla Ĩtongoesye, kana masyĩtwa ma ala me nzamanĩ ĩsu. Ĩndĩ vai mũtumĩa o na ũmwe wa Nzama Ĩla Ĩtongoesye wĩthĩawa na kĩsese kyake kana ũlikĩte isesenĩ sya kũea ngewa.

Kwelekelya andũ kĩsesenĩ kitũ nĩkũtwaĩĩasya ‘ũvoo mũseo.’ (Mt. 24:14) Syĩndũ ila twĩkĩĩwe kĩsesenĩ tũtũmĩe ũtavany’anĩ syĩkalaa iiseũvĩĩw’a. Twendaa itethye kĩla mũndũ. Kwoou o tondũ vonanĩtw’e ĩla Mĩaonĩ ya Kũtũmĩa kĩsese kitũ, no ũtũmĩe mũndũ ĩvuku na e-mail, kana o ũkamũtũmĩa link ĩkũmũlikya jw.org esomee ũvoo mũna wĩ vo. Ĩla twatavya andũ ala mekwendeew’a malike isesenĩ sitũ, twĩthĩawa tũimakwatany’a na ũla waĩle kũtũnenga lĩu wa kĩ-veva e weka, nake nĩ ĩla “ngombo yĩ na kĩthito na mbũĩ.”