Nasyaĩwe taoninĩ ya La Ceiba, Honduras. Ninyie naĩ ĩlumaita katĩ wa syana itano, na no inyie naĩ kĩmwana nĩ weka. Na katĩ wa syana isu itano no inyie ndeewʼaa. Twekalaa vandũ vaĩ na mĩisyo mingĩ, na twaĩ ngya mũno. Nĩtwaendeeie kũthĩna ĩ ya mũno yĩla Tata wakwatie akisitendi aendete wĩanĩ na akwʼa. Ĩvinda yĩu naĩ na myaka ĩna.

 Inyia wakwa nĩwatataa ũndũ ũtonya atũsũvĩe, ĩndĩ mavinda maingĩ ndeethĩawa na mbesa ianĩtye ũndũ ũnthooea ngũa. Yĩla kwaua nĩneewʼaa mbevo mũno nũndũ ndyaĩ na ngũa sya mbevo.

 Yĩla neanie, nĩneemanyĩisye Kĩthyomo kya Ala Matewʼaa kya Honduras (LESHO), na kwoou weethĩa no nĩee ngewa na andũ ala angĩ matewʼaa. Inyia wakwa na eĩtu ala tũsyaanĩwʼe mayeesĩ kĩthyomo kĩu, kwoou nĩmamanthie nzĩa syoo sya kũneenanasya nakwa matũmĩĩte moko. O na ũu wĩ o vo, inyia wakwa nĩwambendete mũno na nĩwanzũvĩanaa na mĩisyo. O atũmĩĩte nzĩa isu weesĩ sya kũneena nakwa, nĩwanganisye ĩũlũ wa kũnywʼa sikala na ũkĩ. Na nũndũ wa ũu, nĩ na ũtanu kwĩthĩwa ndaatũmĩa syĩndũ isu.

 Nĩ mũnini, inyia wakwa nĩwandwaaa Kanisanĩ wa Katholeki, ĩndĩ vai kĩndũ naeleawa nũndũ vai mũndũ wambalyũlĩlaa kwa Kĩthyomo kya Ala Matewʼaa. Ũndũ ũsu nĩwandũlile ngoo, na kwoou navikya myaka ĩkũmi nĩnaekie kũthi kanisanĩ. Ĩndĩ no nendaa kũmanya maũndũ maingĩ ĩũlũ wa Ngai.

 Mwaka wa 1999, nĩ na myaka 23, nĩnakomanie na mũndũ mũka ũmwe kuma Amelika ũla waendaa kanisa wa evangelical. Nĩwamanyĩisye masomo ma Mbivilia na amanyĩsya Kĩthyomo kya Ala Matewʼaa kya Amelika (ASL). Nĩnendeeiwʼe mũno nĩ maũndũ ala neemanyĩisye Mbivilianĩ nginya navanga kũtwʼĩka pastor. Kwoou nĩnaendie sukulu ya andũ ala matewʼaa ya maũndũ ma ndĩni, nthĩ ya Puerto Rico. Yĩla nasyokie La Ceiba mwaka wa 2002, nĩnatetheeiwʼe nĩ anyanyawa amwe makwa kwambĩĩsya kanisa wa ala matewʼaa. Ũmwe wa anyanya asu eetawa Patricia, na nĩwesie kũtwʼĩka kĩveti kyakwa.

 Ninyie naĩ pastor wa kanisa ũsu, na nĩnaumĩasya andũ ũvoo na Kĩthyomo kya Ala Matewʼaa kya Honduras, ngamonyʼa visa sya ngewa sya Mbivilia, na ngeka mawonanyʼo ma ngewa isu nĩ kana maelewe. Na nĩnathokeaa andũ ala matewʼaa taoninĩ ila syaĩ vakuvĩ nĩ kana nĩmekĩe vinya, na ndimatetheesya kũmĩanĩsya na mathĩna. O na nĩnaendie Amelika na Zambia nĩ misonalĩ. Ĩndĩ ũwʼo nĩ kana, ndyeesĩ maũndũ maingĩ ĩũlũ wa Mbivilia. Namamanyĩasya o maũndũ ala namanyĩiwʼe, na maũndũ ala naeleawa kuma visanĩ. Kwa wʼo, naĩ na makũlyo maingĩ mũno.

 Mũthenya ũmwe, andũ amwe twathaithaa ĩmwe nĩmambĩĩie kũnyaĩĩkya ngewa sya ũvũngũ ĩũlũ wakwa. Maisye kana naĩ mũlevi na ndyaĩ mũĩkĩĩku kwa kĩveti kyakwa. Nĩneewie woo mũno na nakwʼa ngoo. Ĩtina wa ĩvinda ĩnini, nĩ na Patricia nĩtwakolile kanisa ũsu.

 Ngũsĩ sya Yeova nĩsyatũthokeaa mavinda maingĩ nĩ na Patricia, ĩndĩ tũyasyĩthukĩĩasya. Ĩndĩ twamina kũkola kanisa ũla twaendaa, Patricia nĩweetĩkĩlile kwĩmanyĩsya Mbivilia na Thomas na mũka, Liccy. Nĩnatanie kwona kana o na kau mo mayaĩ na mathĩna ma kwĩwʼa, nĩmeesĩ kĩthyomo kya ala matewʼaa. Kwoou o nakwa nĩnambĩĩe kwĩmanyĩsya Mbivilia.

 Nĩtweemanyĩisye kwa myei kauta tũitũmĩa vitio sya Kĩthyomo kya Ala Matewʼaa kya Amelika. Ĩndĩ yĩla anyanya amwe maitũ maisye kana Ngũsĩ sya Yeova nĩ aatĩĩi ma andũ, nĩtwaekie kwĩmanyĩsya. O na kau Thomas nĩwambonisye maũndũ mekũĩkĩĩthya kana Ngũsĩ iyĩatĩĩaa atongoi ma andũ, ndyaaĩtĩkĩlana nake.

 Ĩtina wa myei yĩana ũna, Patricia nĩwakwatiwe nĩ ũwau wa kũkwʼa ngoo mũno na amũvoya Ngai nĩ kana Ngũsĩ sya Yeova imũthokee ĩngĩ. Ĩtina wa vau, mũtũi witũ, ũla waĩ Ngũsĩ ya Yeova, nĩwookie kũmwona Patricia na amwĩa kana nũkũkũlya Liccy oke kũmwona. Liccy nĩwoonanisye kana aĩ mũnyanya wa wʼo, nũndũ nĩwamũthokeaa Patricia kĩla kyumwa akamwĩkĩa vinya na mayĩmanyĩsya Mbivilia. Ĩndĩ nyie naĩ o na nzika ĩũlũ wa Ngũsĩ.

 Mwaka wa 2012, Ngũsĩ sya Yeova nĩsyeethĩiwe na kambeini ya mwanya ya kwonanyʼa vitio ya Kĩthyomo kya Ala Matewʼaa kya Honduras. Vitio ĩsu yaĩ na kyongo, We Nowende Kũmanya Ũla Wʼo? Liccy nĩwatũeteie vitio ĩmwe. Yĩla namĩloelile, natelemile mũno kũmanya kana maũndũ maingĩ ala namanyĩasya ta ĩia ya mwaki, na kana thayũ ndũkusaa, mayaĩ Mbivilianĩ.

 Kyumwa kĩla kyaatĩĩe, nĩnaendie Nyũmbanĩ ya Ũsumbĩ ya Ngũsĩ sya Yeova nganeene na Thomas. Namũtavisye kana nĩenda kũmanyĩsya andũ ala matewʼaa ũwʼo wa Mbivilia, ĩndĩ ndikwenda kũtwʼĩka Ngũsĩ ya Yeova. Kĩeleelo kyakwa kyaĩ kwambĩĩa kanisa ũngĩ mweũ wa ala matewʼaa. Thomas nĩwangathie nũndũ wa kĩthito kyakwa, ĩndĩ ambonyʼa ĩandĩko ya Aeveso 4:5, yĩla yonanĩtye vata wa kwĩthĩwa na ũũmwe kĩkundinĩ kya wʼo kya Kĩklĩsto.

 O na ĩngĩ, Thomas nĩwanengie vitio yĩtawa Mashahidi wa Yehova—Imani Yenye Matendo, Sehemu ya 1: Kutoka Gizani, ya Kĩthyomo kya Ala Matewʼaa kya Amelika. Vitio ĩsu nĩyoonanisye ũndũ kĩkundi kĩmwe kya aũme kyeemanyĩisye Mbivilia kwa ũliku nĩ kana kĩelewe ũwʼo ĩũlũ wa momanyĩsyo ma mũsingi. Nĩendeee kwĩloela vitio ĩsu, nĩnaeleawa ũndũ aũme asu meewʼaa. O tamo, nĩnamanthaa ũwʼo. Vitio ĩsu nĩyandĩkĩĩthisye kana Ngũsĩ sya Yeova imanyĩasya ũwʼo nũndũ momanyĩsyo moo nĩmosanĩte na Mbivilia. Kwoou nĩnambĩĩie kwĩmanyĩsya Mbivilia ĩngĩ, na mwaka wa 2014, nĩ na Patricia nĩtwavatisiwe na twatwʼĩka Ngũsĩ sya Yeova.

 Nĩnĩtanĩaa kwĩthĩwa nĩ Ngũsĩ ya Yeova nũndũ Ngũsĩ syĩthĩawa na mwĩkalĩle mũtheu kĩtumi nũndũ Ngai woo nĩ mũtheu. Athaithi make maneenaa ndeto nzeo na mekalanasya na andũ ala angĩ nesa. Nĩmendete mũuo na nĩmekĩanaa vinya. Me ngwatanĩo, na onthe mamanyĩasya ũwʼo o ũmwe wa Mbivilia, o na methĩwe me nthĩ yĩva kana maneenaa kĩthyomo kĩva.

 Nĩnĩtanĩĩte mũno kũmanya kĩla Mbivilia ĩmanyĩasya. Kwa ngelekanyʼo, nĩneemanyĩisye kana Yeova nĩwe Ngai Mwene Vinya Wʼonthe, na Mũsumbĩ Ũla Mũnene wa nthĩ yonthe. Nĩwendete andũ onthe, o na ala matewʼaa. Nĩnĩtũngaa mũvea nũndũ wa wendo ũla Ngai ũmbonasya. O na nĩneemanyĩisye kana o mĩtũkĩ, nthĩ nĩkũtwʼĩka vandũ vaseo, na ithyonthe tũitanĩa kwĩkala tene na tene twĩ na ũima wa mwĩĩ. Neteele mũno kwona mũthenya ũla maũndũ asu makeanĩa!

 Nĩ na Patricia nĩtwendete kũelesya andũ ala matewʼaa ĩũlũ wa Mbivilia. Yu nĩtwĩmanyĩasya Mbivilia na amwe twathaithaa namo tene. Ĩndĩ ndyĩthĩawa na makũlyo ĩũlũ wa maũndũ ala nĩmanyĩasya andũ ta ĩvinda yĩla naĩ pastor. Nĩnakwatie mosũngĩo ma makũlyo makwa kwa kwĩmanyĩsya Mbivilia na Ngũsĩ sya Yeova.