Ti lasima. Andũ milioni mbingĩ nĩmatanĩaa kwĩmanyĩsya Mbivilia naitũ o na kau maitwʼĩkaa Ngũsĩ sya Yeova. a Kĩeleelo kya mũvango ũsu nĩ kwonyʼa andũ kĩla Mbivilia ĩmanyĩasya. Mũndũ mwene nĩwe wĩnyuvĩaa ũndũ ũkwĩka ĩtina wa kũkwata ũmanyi. Nĩtwĩsĩ kana kĩla mũndũ nĩwe waĩle kũtwʼa kĩla ũkũĩkĩĩa.​—Yosua 24:15.

 Ĩĩ, no wĩke ũu. O na kau nĩtwendete mũno kũtũmĩa Mbivilia ya kĩthyomo kya ũmũnthĩ ya New World Translation of the Holy Scriptures na ũkendeewʼa no tũũnenge ĩmwe vate ndĩvi, nĩtũtanaa mũno mũndũ aitũmĩa Mbivilia yake. No wĩmanyĩsye ũvoo ũla wĩ Mbivilianĩ wa wĩkwatyo na ũtangĩĩo ũitũmĩa Mbivilia o na yĩva.

•   Kĩtumi kĩla kĩnene nĩ kwĩthĩwa nĩtũmwendete Yeova Ngai, ũla wendaa Aklĩsto mamanyĩsye angĩ maũndũ ala memanyĩĩtye. (Mathayo 22:37, 38; 28:19, 20) Twonaa vate kĩanda kĩnene kĩvĩtũkĩte kwĩthĩwa twĩ “atethya ma wĩa vamwe na Ngai” ĩla tũũtetheesya andũ meemanyĩsye kĩla kĩ Ndetonĩ yake.​—1 Akolintho 3:6-9.

•   Ũndũ ũngĩ ũtũsukumaa kũmanyĩsya andũ Mbivilia nĩ wendo witũ kwa atũi. (Mathayo 22:39) Tũtanĩaa mũno kũtetheesya angĩ mamanye maũndũ maseo ala twĩmanyĩĩtye.​—Meko ma Atũmwa 20:35.