Mbivilia nĩyĩkĩaa andũ vinya manenge andũ angĩ syĩndũ kwa ngenda na me na kĩeleelo kĩseo. Ĩmanyĩasya kana mũndũ ũla wanenga ũngĩ syĩndũ o nake mwene nũtethekaa. (Nthimo 11:25; Luka 6:38) Yesũ aisye atĩĩ: “Kũnengane kwĩ ũtanu mwingĩ kwĩ kwosa.”​—Meko ma Atũmwa 20:35.

•  Nĩ ĩvinda yĩva kũnenga mũndũ kĩndũ kũmũtanĩthasya Ngai?

•  Nĩ ĩvinda yĩva kũnenga mũndũ kĩndũ kũmũthatasya Ngai?

•  Maandĩko maeleetye ĩũlũ wa kũnengane syĩndũ

 Yĩla mũndũ wanengane kĩndũ na ngenda nũmũtanĩthasya Ngai. Mbivilia yaĩtye atĩĩ: “Ekai kĩla ũmwe eke ũndũ ũtwʼĩte ngoonĩ yake, na ti ate kwenda kana kũthingʼĩĩwʼa, nũndũ Ngai endete mũndũ ũla ũnenganae na ũtanu.”​—2 Akolintho 9:7.

 Mũndũ ũla ũnenganae syĩndũ na ngenda onanasya kana aatĩĩaa “ũthaithi” ũla Ngai wĩtĩkĩlaa. (Yakovo 1:27) Ũla mũlau nũtetheeasya andũ ala me na vata na ekaa kĩla Ngai wendete. Ngai onaa mũndũ ũsu ta wamũkovethya kĩndũ no we mwene. (Nthimo 19:17) Mbivilia ĩmanyĩasya kana Ngai akaĩva mũndũ ũla ũtetheeasya andũ ala angĩ.​—Luka 14:12-14.

 Yĩla mũndũ wanengane kĩndũ e na kĩtumi kĩthũku. Kwasisya ngelekanyʼo ii iatĩĩe:

•   Kũnengane kĩndũ nĩ kana wendeesye andũ ala angĩ.​—Mathayo 6:2.

•   Kũnengane kĩndũ ũyenda kũĩvwa.​—Luka 14:12-14.

•   Kũnengane kĩndũ nĩ kana Ngai akwĩtĩkĩle na ũikwata thayũ ũtathela.​—Savuli 49:6, 7.

 Yĩla wanengane kĩndũ kĩtetheesye kwĩka maũndũ Ngai ũleete. Kwa ngelekanyʼo, wĩthĩwa wĩ ũndũ ũtaĩle kũnenga mũndũ mbesa akothe kalata, akatũmĩe ndawa sya kũmila naĩ kana akanywʼe ũkĩ mũno. (1 Akolintho 6:9, 10; 2 Akolintho 7:1) O na ĩngĩ ti ũseo kũnenga mũndũ ũla ũleaa kũthũkũma mbesa o na kau e na vinya wa kũthũkũma.​—2 Athesalonika 3:10.

 Yĩla mũndũ wanengane syĩndũ na ũu ũituma ateanĩsya ianda ila Ngai ũmũnengete. Mbivilia ĩmanyĩasya kana ene mĩsyĩ nĩmaĩle kũmanthĩa andũ moo. (1 Timotheo 5:8) Ti ũseo mũndũ ũla wĩ na mũsyĩ anenge andũ angĩ syĩndũ mbingĩ na ũu ũituma andũ make malika thĩnanĩ. O nake Yesũ nĩwaleanile vyũ na mwĩkalĩle wa andũ ala maleaa kũtetheesya asyai moo akũũ kwa kwasya kana syĩndũ ila maĩ nasyo nĩ “[syĩndũ syumĩtwʼe syĩthĩwe] mũthĩnzĩo kwa Ngai.”​—Maliko 7:9-13.