Yeova Ngai Mwene Vinya Wʼonthe nĩwe “Aliva na Omeka.” Ndeto ii syonekaa Mbivilianĩ mavinda atatũ.​—Ũvuanyʼo 1:8; 21:6; 22:13. a

 Aliva na Omeka nĩ masyĩtwa ma nthoo ila syĩ mwambĩĩonĩ na mũthyanĩ wa nthoo sya Kĩkiliki. Kĩthyomo kĩu nĩkyo kyatũmĩiwe kũandĩka kĩlungu kya Mbivilia kĩla kĩkothaa kwĩtwa Ũtianĩo Mweũ, na ĩvuku ya Ũvuanyʼo nĩ yĩmwe katĩ wa mavuku ala me kĩlungunĩ kĩu. Nũndũ Aliva na Omeka nĩsyo nthoo ila syĩ mwambĩĩonĩ na mũthyanĩ wa nthoo sya Kĩkiliki, itũmĩĩtwe kwonanyʼa kana Yeova e weka nĩwe mwambĩlĩlyo na mũminũkĩlyo. (Ũvuanyʼo 21:6) Ethĩĩtwe e Ngai Mwene Vinya Wʼonthe kuma tene ũte mwambĩlĩlyo, na eendeea kwĩthĩwa e Ngai Mwene Vinya Wʼonthe tene na tene. No we weka wa “kuma tene na tene kũvika tene na tene.”​—Savuli 90:2.

 Mbivilia nĩtũmĩaa ndeto isu kũweta Yeova Ngai na kũweta Yesũ, Mwana wake. Ĩndĩ iyĩthĩawa iyonanyʼa ũndũ ũmwe. Kwatũsisye ngelekanyʼo siana ũna.

•   Ĩandĩkonĩ ya Isaia 44:6, Yeova aĩtye: “Ninyie wa mbee, na ninyie wa mũminũkĩlyo; na vati Ngai ate o nyie.” Vaa Yeova eelesya kana we nĩ Ngai wa tene na tene, na eka we vaiĩ ũngĩ. (Kũtũngĩlĩlwa Kwa Mĩao 4:35, 39) Ĩandĩkonĩ yĩĩ ndeto ‘wa mbee na wa mũminũkĩlyo,’ kana wa mũthya, syĩonanyʼa o ũndũ ũmwe na “Aliva na Omeka.”

•   O na ĩngĩ, nthĩnĩ wa Ũvuanyʼo 1:17, 18 na 2:8, ndeto “ũla wa Mbee [pro’tos, na ti aliva] na ũla wa Mũthya [e’skha·tos, na ti omeka]” nitũmĩĩtwe. Mĩsoa ĩno yonanĩtye kana ũla ũkũwetwa nĩwakwie na ĩtina athayũũka. Kwoou ũla ũkũwetwa ndesa kwĩthĩwa e Ngai nũndũ we ndaakwʼa. (Avakuki 1:12) Ĩndĩ Yesũ nĩwakwie na athayũũkwʼa. (Meko ma Atũmwa 3:13-15) Nĩwe waĩ mũndũ wa mbee kũthayũũkwʼa e kyũmbe kya kĩ-veva kĩtatonya kũkwʼa, na ambata ĩtunĩ, kũla ũkekalaa “tene na tene.” (Ũvuanyʼo 1:18; Akolosai 1:18) Kuma vau, Yesũ nĩwe wanengiwe ũkũmũ wa kũthayũũkya onthe ala akwʼũ. (Yoana 6:40, 44) Kwoou nĩwe waĩ wa mũthya kũthayũũkwʼa nĩ Yeova mwene. (Meko ma Atũmwa 10:40) Nũndũ wa itumi isu, Yesũ nĩwaĩlĩte vyũ kwĩtwa “ũla wa Mbee na ũla wa Mũthya.”

 Aiee. Ũla ũkũneena ndeto ila syĩ nthĩnĩ wa Ũvuanyʼo 22:13 ndawetetwe ũtheinĩ, na ndeto ila syĩ kĩlungunĩ kĩu iwetetwe nĩ andũ me kĩvathũkanyʼo. Vulovesa wĩtawa William Barclay aineenea kĩlungu kĩĩ kya Ũvuanyʼo aandĩkie atĩĩ: “Maũndũ ala maandĩkĩtwe mĩsoanĩ ĩno maiandĩkĩtwe ũndũ maatĩanĩe; . . . na kũndũ kwingĩ ti laisi ũmanye nesa nũũ ũla ũkũneena.” (The Revelation of John, Ĩvuku ya 2, yĩla yĩkĩtwe moalyũku, ĩthangũ ya 223) Kwoou, ndeto “Aliva na Omeka,” ila syĩ nthĩnĩ wa Ũvuanyʼo 22:13, syĩweta Yeova Ngai, o tondũ syonanĩtye mĩsoanĩ ĩla ĩngĩ yĩ nasyo ĩvukunĩ ya Ũvuanyʼo.