Content de lai

Secondary menu hpe lai

Yehowa Sakse Ni

Kachin

Yehowa Sakse Ni Gaw Kaga Masha Ni Hpung Galai Shai Hkra N-gun Jaw Ai Kun?

Yehowa Sakse Ni Gaw Kaga Masha Ni Hpung Galai Shai Hkra N-gun Jaw Ai Kun?

Njaw ai. Madung hku nna anhte shapraw da ai Sin Langchyi magazine hta ndai hku tsun ai: “Makam masham nawku hpung galai na matu masha ni hpe n-gun jaw ai gaw shut ai.” * Lawu na lam ni a majaw anhte gaw kaga masha ni hpe atik anang n-gun n jaw ai re.

  • Yesu gaw shi sharin achyin ya ai lam ni hpe hkap la wa hkra kaga masha ni hpe atik anang n-gun njaw ai. Masha kachyi mi sha, shi a sharin achyin lam hpe hkap la na ngu shi chye da ai. (Mahte 7:13, 14) Shi hpang hkan nang ai ni, shi tsun ai ga ni hpe n hkap la nna kau da mayu ai hpe shi chye ai shaloi, atik anang n nga shangun ai sha, pru mat na ahkang jaw ai.Yawhan 6:60-62, 66-68.

  • Yesu gaw shi a sape ni hpe, kaga masha ni a makam masham galai wa hkra, atik anang n-gun njaw na matu sharin ya ai. Sape ni gaw Karai a Mungdan kabu gara shiga hpe, masha ni hkap la wa hkra atik anang n-galaw ai sha, sharawng awng ai myit hte hkap la ai ni hpe tam ma ai.Mahte 10:7, 11-14.

  • Nawku hpung galai wa hkra, jahkrit shama nna atik anang galaw ai gaw n kaja ai. Hpa majaw nga yang, Karai Kasang gaw shi hpe sharawng awng ai myit hte nawku ai ni hpe sha, hkap la ai majaw re.—Tara Jahprang 6:4, 5; Mahte 22:37, 38.

Anhte A Bungli Gaw Kaga Masha Ni Anhte A Hpung De Shang Wa Hkra Galaw Ai Bungli Kun?

Anhte gaw Chyum Laika shiga hpe “lamu ga htum hkra” hkaw tsun ra ai majaw, Chyum Laika hta tsun da ai hte maren ‘shawa yawng a man, nta shagu hkan’ de kabu gara shiga hpe hkaw tsun ga ai. (Kasa 1:8; 10:42; 20:20) Moi na Hkristan ni hpe, shanhte a hpung de kaga masha ni shang wa hkra, gung lau nga ai ngu nteng n man tsun wa ai zawn, anhte ni hpe mung dai hku tsun ma ai. (Kasa 18:12, 13) Raitim, dai hku tsun ai gaw njaw ai. Anhte kamsham ai lam ni hpe, kaga masha ni hkap la wa hkra atik anang n-gun n jaw ga ai. Dai zawn galaw na malai, hpaji rawng ai hku lata nna dawdan lu hkra, ra rawng nhte niai machye machyang, lam matsun ni hpe kaga masha ni chye ging ai ngu nna sha, a kam ma ai.

Anhte ni gaw masha ni hpe nawku hpung galai mat hkra atik anang n-galaw ga ai. Nawku hpung ngu tsun nna, mung masa lam ni hta shang lawm ai, hpung masha ningnan law wa hkra arung arai ni jaw nna lau la ai lam ni n-galaw ga ai. Dai zawn re ai, Hkristan a prat hkrun lam hku nhkan ai sha, tinang hkum tinang Hkristan re ai ngu tsun ai ni hte tsep kawp n bung ai. *

Masha langai hta nawku hpung galai shang na ahkang nga ai kun?

Myihtoi Abraham gaw jinghku jingyu ni a nawku htung hpe kau da

Nga ai. Masha langai hta nawku hpung galai mai ai ngu Chyum Laika hta tsun da ai. Jiwoi jiwa ni nawku wa ai nawku htung hte maren n hkan sa ai sha teng man ai Karai Kasang hpe sharawng awng ai myit hte nawku wa ai masha ni a lam Chyum Laika hta ka matsing da ai. Dai hta Abraham, Ruhta, Kasa Pawlu hte Ahten masha nkau ni lawm ai. (Yawshu 24:2; Ruhta 1:14-16; Kasa 17:22, 30-34; Galati 1:14, 23) Dai hta n-ga masha langai hta, Karai Kasang ra sharawng ai nawku daw jau lam hpe n kam nawku mat yang, kau da na ahkang, hpaji nrawng ai hku lata na ahkang nga ai ngu Chyum Laika hta tsun da ai.1 Yawhan 2:19.

Mungkan Wunpawng Hpung (UN) gaw “mungkan a shinggyim ahkaw ahkang hte seng ai, upadi a matu npawt tara” re ai shinggyim ahkaw ahkang ndau shana ai laika hta mung, nawku htung galai shai na ahkang hpe jaw da ai. Masha shagu hta “tinang kam sham ai lam hte nawku hpung hpe myit ra ai hku galai mai” nna, “myit mang ai lam ni, hpaji jaw ai lam ni hpe sawk tam na ahkang, kaga masha ni hpe tsun dan na ahkang” nga ai ngu ndai ndau shana ai laika hta tsun da ai. * Dai ahkaw ahkang ni hte arau lawm wa ai lam gaw, kaga masha ni myit ra ai hku lata na ahkang hpe hkungga ai, tinang a makam masham hpe makawp maga ai, tinang nkam hkap la ai myit jasat ni hpe nyet kau na ahkang nga ai lam ni re.

Nawku hpung galai ai gaw jiwoi jiwa ni a nawku htung hpe arawng sadang n nga mat hkra galaw ai kun?

Dai hku nre ai. Gara nawku htung mi raitim, yawng hpe hkungga na matu Chyum Laika hta n-gun jaw da ai. (1 Petru 2:17) Dai hta n-ga kanu kawa ni hte makam masham n bung tim, shanhte hpe hkungga lara u, ngu ai Chyum Laika tara hpe Yehowa Sakse Ni hkan sa ma ai.Ehpesu 6:2, 3.

Rai ti mung, Chyum Laika hta tsun da ai ni hpe masha shagu hkap la na nre. Zambia mungdan hta kaba wa ai numsha langai ndai hku tsun ai: “Anhte mungdan hta gaw marai langai hpung galai yang sadi ndung ai arawn alai, nta dinghku hte jinghku jingyu ni hpe sadi ndung ai ngu shadu ma ai.” Yehowa Sakse ni hte Chyum Laika hkaja nna makam masham galai na matu dawdan kau ai shaloi, kaga masha ni shi hpe dai hku shadu ma ai. “Nu yan Wa gaw shanhte hpe sari jahpoi ai ngu, ngai hpe chyahkring hkring pawt nna tsun ai. Kanu Kawa ni myit ra ai lam hpe ning dang nna galaw ai gaw grai yak ai. . . . jiwoi jiwa nawku wa ai nawku htung hta grau nna, Yehowa hpe sadi dung na matu lata ai gaw, dinghku hte jinghku jingyu ni hpe sari jahpoi ai nre.” *

^ စာပိုဒ်၊ 2 January 1, 2002, Sin Langchyi-BU laika man 12, laika pang 15 hpe yu u.

^ စာပိုဒ်၊ 8 Ga shadawn, A.D. 785 daram hta Hkawhkam Shalaming (Charlemagne) gaw Sesun ni (Saxony) ginra na masha ni hpung galai na matu, ninghkap yang si dam jaw na ngu tsun ai. Buga uphkang ai masha ni gaw, Katawlik (Roman Catholic) shing nrai Luhteran byin ra na, shanhte uphkang ai ginra na masha shagu dai hpung de shang ra na re ngu tsun ai. Shaning 1555, Roma ahkaw ahkang npu hta makam masham nawku hpung yawng shang lawm nna seng htu da ai hpe Augsburg ga shaka hta mu lu ai. Hpung n galai ai ni hpe, dai buga ginra kaw nna gawt shapraw kau ma ai.

^ စာပိုဒ်၊ 11 Dai zawn ahkaw ahkang ni hpe mung, Africa shinggyim ahkaw ahkang hte seng ai ga shaka, Asian (Association of Souhteast Asian Nations) shinggyim ahkaw ahkang ndau shana ai laika, European shinggyim ahkaw ahkang hkrum zup hpawng, mungdan shagu a shinggyim ahkaw ahkang hte mung masa ga shaka ni hta mung madun da ai. Raitim, dai zawn ahkaw ahkang shapraw da ai mungdan ni hta pyi, lu ging ai ahkaw ahkang ni gaw amyu myu shai ai lam nga ai.

^ စာပိုဒ်၊ 14 Yehowa ngu ai gaw, Chyum Laika hta tsun da ai Karai Kasang a mying ningsang re.