‘Dai Mungdan A Kabu Gara Shiga Hpe Hkaw Dan Lu Na Rai Nga Ai’

“Dai mungdan a kabu gara shi ga gaw, masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai.”​—MAHTE 24:14.

Hpa Lachyum Kun?: Yesu gaw “Karai Kasang a mungdan lam hkaw dan ai hte, kabu gara shi ga tsun shana ya let, mare mi kaw nna mare mi, kahtawng mi kaw nna kahtawng mi de, du hkawm sa wa ai” ngu Luka tsun wa ai. (Luka 8:1) Yesu nan mung ndai hku tsun wa ai: “Karai Kasang mungdan a kabu gara shi ga hpe, mare kaga ni hta mung ngai hkaw tsun lu na nngai; dai matu ngai hpe shangun dat ni ai.” (Luka 4:43) Mare kahtawng ni hta hkaw tsun na matu sape ni hpe Yesu ndai hku tsun na dat dat ai: “Nanhte gaw . . . lamu ga htum hkra, nye a sakse ni tai na ma rin dai.”​—Kasa 1:8; Luka 10:1.

Tsaban Langai Na Hkristan Ni Gara Hku Galaw Wa Ai Kun?: Yesu a sape ni gaw, Yesu matsun ai hte maren, aten n garawt ai sha kalang ta galaw wa ma ai. “Shanhte shani shagu naw ku Htingnu hta mung, nta hkan e mung, Yesu gaw Hkristu rai nga ai, nga nna a hkaw a tsun nga ma ai.” (Kasa 5:42) Hkaw tsun bungli hpe, laksan lata da ai hpung langai sha galaw ra na n re ai sha, nawku hpung shang masha yawng galaw ra na re. “Sagu mun rep ai ni, hkyepdin chywi ai ni, shanhpyi galaw ai ni, laika tsep kawp n chye ai ni hte yu maya masha ni gaw, kabu gara shiga hpe myit rawt let hkaw tsun ai ni re ai ngu ai hpe, Hkristan hpung hpe ninghkap ai shawng nnan na laika ka sara Sesak gaw jahpoi asawng wa ai” ngu nna, labau hpaji du Niyenda tsun wa ai. Zan Banadi gaw shi a laika (The Early Centuries of hte Church) hta ndai hku ka wa ai: “[Hkristan ni] gaw shinggan pru nna shara shagu hta nga ai masha ni hpe hkaw tsun ma ai. Nmaw lam ntsa, mare kata, shawa hte seng ai shara ni hte nta ni hta hkaw tsun ma ai. Masha ni hkap la tim, n hkap la tim shanhte hkaw tsun ma ai. . . . Shanhte gaw lamu ga htum hkra sa ma ai.”

Dai Ni Aten Hta Kadai Ni Gaw Dai Hte Maren Galaw Nga Ai Kun? “Dai ni aten hta hkaw tsun ai hte sharin achyin ya ai bungli hpe Hkristan hpung ni ahkyak n shatai mat ai lam langai gaw, Karai a magam gun na matu myit n lawm ai majaw re” ngu na Inglikan Jau Debit Wit-san ka wa ai. Hotse Lusi Piret Gadalupe gaw, Ewun-geli Hpung masha, Sanit Ya Laban Hpung masha hte kaga hpung ni a galaw ai lam ni hpe yu nna “shanhte gaw nta langai hpang langai n hkaw tsun ma ai” ngu shi a laika buk (Why Are hte Catholics Leaving?) hta ka wa ai. Raitim, Yehowa Sakse Hkristan ni chyawm gaw, “nta langai hpang langai atsawm lajang nna sa ma ai” ngu ka wa ai.

Jawna-tan Tali a myit lawm hpa rai nna, tatut re ai ningmu hpe laika buk langai (Cato Supreme Court Review, 2001-​2002:) hta ndai hku tsun da ai: “Yehowa Sakse ni a lam marai langai ngai tsun sai nga yang, masha ni n rau ai aten du wa ai hkaw tsun masha ni ngu nna law malawng mu ma na re. Yehowa Sakse ni gaw, kaga ni hpe tinang a makam masham lam hkaw ai daram sha n re. Tinang a makam masham grau ngang kang wa hkra hkaw tsun nga ma ai re.”

[Laika man 9 kaw na lawk]

Jet Ai Hkristan Ni A Masat Dingsat gaw Hpa Rai Kun?

Ndai sumhpa hta bawngban wa ai Chyum Laika tsang madang ni ntsa madung nna, dai ni aten hta kadai ni gaw dai tsang madang ni hte maren hkan sa nga ai ngu shadun ai kun? Hkristan ngu tsun ai uhpung ni mun hku nga tim, sape ni hpe Yesu tsun wa ai ndai ga ni hpe dum u: “Ngai hpe, Madu e, Madu e, nga ai hte yawng mayawng gaw, sumsing lamu na mungdan hta shang lu na ma ai n rai: sumsing lamu hta nga ai, nye Wa a myit hkan ai wa sha, shang lu na ra ai.” (Mahte 7:21) Ndai chyum daw hku nga yang, jet ai Hkristan ni a masat dingsat gaw Karai Kasang myit ra ai lam hpe galaw ai lam re. Shanhte hpe ginhka chye nna shanhte hte kanawn mazum ai gaw, Karai a Mungdan uphkang ai shaloi nhtum nwai ai shaman chyeju ni hpe hkamsha lu shangun ai. Karai a mungdan hte lu la na shaman chyeju ni hte seng nna grau chye mayu ai nga yang, ndai magazine hpe la wa ya ai Yehowa Sakse ni hpe san yu u.​—Luka 4:43.