MUNGKAN ting hta gara amyu ga, gara htunghking kaw raitim, masha shagu gaw akyu hpyi ma ai. Marai langai hkrai akyu hpyi ai, masha hpawng hte akyu hpyi ai. Hkristan nawku jawng, nawku sum, moslim nawku htingnu, hpara hkan hta akyu hpyi ma ai. Akyu hpyi ai shaloi, panep, rosary, akyu hpyi tingsen, sumla, akyu hpyi laika buk ni hpe akyu jashawn nna hpyi ma ai zawn, hpun pyen pa hta akyu hpyi ga ni ka nna shadaw hta noi da ma ai.

Masha hte kaga dusat ni a n bung ai lam langai gaw, akyu hpyi ai lam re. Masha hte dusat ni hta bung ai lam grai law hkra nga ai. Anhte yawng mung dusat ni zawn sha, malu masha, nbung hte hka ni ra rawng ai. Dusat ni zawn sha shangai shaprat ai, asak hkrung ai, si ra ai. (Hpaji 3:19) Raitim, masha ni sha akyu hpyi chye ma ai. Dai gaw hpa majaw rai kun?

Asan sha tsun na nga yang, akyu hpyi na matu ra rawng ai majaw re. Law malawng hku nna masha ni gaw, akyu hpyi ai hpe wenyi mungkan hte matut mahkai ai lam langai hku nna mu mada ma ai. Anhte shinggyim masha ni hpe dai zawn galaw mayu ai myit bang da ya ai ngu nna Chyum Laika hta tsun da ai. (Hpaji 3:11) Kalang mi hta Yesu Hkristu ndai hku tsun ai: “Wenyi hta matsan mayan rai nga ai ni gaw, a lu ma ai.”​—Mahte 5:3.

Hkying hkum law law akyu hpyi ma ai hpe yu yang, makam masham hte seng ai htingnu ni hte labau shang arung arai ni hpe yu yang, Karai Kasang hpe kamhpa na matu ra ai hpe madun nga ai re. Masha nkau gaw dai ra rawng lam ni hpe madi shadaw na matu, tinang hkum tinang kamhpa ma ai. Nkau mi chyawm gaw kaga ni hpe kamhpa ma ai. Raitim, masha ni gaw hpring tup n karum ya lu ai. Masha a prat gaw kadun ai, hkra machyi loi ai, ningmu kaji ai. Shinggyim masha hta grau nna nyan hpaji rawng ai, grau atsam rawng ai, grau asak galu ai wa she anhte a ra rawng lam hpe madi shadaw ya lu na re. Anhte hpe akyu hpyi na matu shadut ya ai lam gaw hpa rai na kun?

Lam matsun hte nyan hpaji lu na matu (sh) masha a nyan hte n dep ai ngu hkamsha ai ga san ni a mahtai lu na matu myit mada ga ai kun? Tsawra ai marai langai n nga mat ai majaw yawn nna myit n pyaw nga ai aten hta, shalan shabran lam ra ai ngu nna hkamsha ga ai kun? Shing n rai grai yak ai dawdan lam hpe jahkrat hkyen ai aten hta, lam matsun ra ai ngu nna hkamsha nga ai kun? Shing n rai mara a majaw myit daw hten nga ai shaloi, mara raw ai lam ra ai ngu nna hkamsha ga ai kun?

Chyum Laika hta lawm ai mabyin masa ni gaw, akyu hpyi na matu ra ai hpe madun ai lam ni re. Dai lam hte seng nna Chyum Laika gaw kamhpa mai dik htum laika buk re. Hpa majaw nga yang, sadi dung ai num, la ni a akyu hpyi ga hpe Chyum Laika hta sha ka matsing da ai majaw re. Shanhte gaw shalan shabran lam, lam matsun, mara raw ai lam hte grai yak ai ga san ni a mahtai hpe lu na matu akyu hpyi wa ma ai.​—Shakawn 23:3; 71:21; Daniela 9:4, 5, 19; Habaku 1:3.

Lahta hta tsun da ai hte maren akyu hpyi wa ai Dawi, Daniela, Habaku ni a akyu hpyi ga ni gaw shai ma tim, shanhte hta bung ai lam langai nga ai. Shanhte ni a akyu hpyi ga hpe madat ya na matu, grai ahkyak ai lam langai hpe shanhte shalawm nna hpyi wa ma ai. Dai ahkyak ai lam hpe dai ni aten hta masha law law gaw, hpa n sawn ai sha shangam da ma ai. Raitim, shanhte chyawm gaw kadai hpe akyu hpyi ra na lam chye da ma ai.