Dinghku Num La Ni A Matu
3: Hkungga Ai Lam
Lachyum
Hkungga chye ai ningrum ningtau ni gaw, myit n hkrum ai lam ni nga wa tim, shada da yu lanu lahku chye ma ai. “Dai zawn myit nga ai ningrum ningtau ni gaw dangrang hkat nna asum n chye jaw ai baw myit n nga ai. De a malai, myit n hkrum ai lam hpe arau bawngban ai. Kaga wa a ningmu hpe hkungga ai hte madat ya ai. Shada asum jaw chye ai” ngu nna laika buk langai (Ten Lessons to Transform Your Marriage) hta ka da ai.
Chyum Laika Npawt Tara: “Tsawra ai myit gaw . . . tinang a akyu n tam ai.”—1 Korinhtu 13:4, 5.
“Nye madu jan hpe hkungga ai gaw, shi hpe manu shadan ai re. Tinang a madu jan hte dinghku hpe hkra machyi shangum ai lam yawng hpe ngai n kam galaw ai.”—Maihka.
Hpa Majaw Ahkyak Ai Kun?
Hkungga lara ai lam n nga yang, shada da mara shagun ai lam ni, adaw ai lam ni, yu kaji ai lam ni byin wa chye ai. Dai lam ni gaw, hka bra na matu hpang wa shangun ai nga nna sawk sagawn ai ni tsun ai.
“Tinang a madu jan hpe adaw tsun ai, shala ai, mani hpa shatai ai nga yang, shi hkum shi kamhpa myit, tinang a ntsa kamhpa myit ni yawm mat na re. Dinghku hpe hkra machyi shangun ai.”—Baraiyen.
Galaw Mai Ai Lam
Tinang Hkum San Jep Yu U
Bat mi laman, tinang a tsun shaga galaw hkawm sa ai lam hpe sadi yu u. Ngut nna tinang hkum tinang ndai hku san yu u:
‘Nye a ningrum ningtau hpe kade lang mara shagun wa nna, kade lang shakawn ya wa ai kun?’
‘Ningrum ningtau hpe hkungga ai lam gara lam ni hte madun wa ai kun?’
Ningrum Ningtau Hte Bawngban U
Gara hku tsun ai, galaw ai gaw hkungga hkrum ai ngu hkamsha shangun ai kun?
Gara hku galaw ai, gara hku tsun shaga ai lam gaw tinang hpe n hkungga ai ngu hkamsha shangun ai kun?
Tatut Galaw Mai Ai Lam
Hkungga hkrum mayu ai lam 3 hpe ka da u. Ningrum ningtau hpe mung ka shangun u. Ka da ai laika hpe galai hkat nna, ka da ai lam ni hta hkungga ai lam madun lu na matu shakut u.
Ningrum ningtau hte seng nna, tinang hkungga ai lailen ni hpe ka da u. Dai lailen ni hpe manu shadan ai lam shi hpe tsun dan u.
“Tinang a madu wa hpe hkungga ai ngu ai gaw, shi hpe manu shadan ai, myit pyaw shangun mayu ai lam amu bungli hte madun ai re. Galoi mung grai hkik hkam n ra ai. Kalang lang, kaji kajaw lam ni hte mung kaja wa hkungga ai lam mai madun ai.”—Megan.
Tinang maga hku na hkungga hkrum ai, n hkrum ai ngu ai gaw ahkyak n re. Tinang a ningrum ningtau gaw hkungga hkrum ai ngu hkamsha na matu grau ahkyak ai.
Chyum Laika Npawt Tara: ‘Matsan dum ai, sumnung ai, mai kaja ai, myit nem ai, myit gyip ai hte myit galu kaba ai dagraw nga mu.’—Kolose 3:12.
