UKỌCHẸ 49

Ẹñwu Neke Jẹñwu Akwọra Unyi Wẹ Ki N’ẹdẹbọ?—Ukpẹ 1

PLAY

Abo ku ma n’ọlama etitọ atene k’uyọ ma ku ma nẹ ọjọ lẹ ki dabalẹ alo. I la neke dabalẹ. Abo Kraist ku ma n’ọlama kw’ọdọ wewe ku ma la ach’alu du ku ma neke che ku ma leb’ibe ki defu Baibul che ma kaki i jẹ che.

1. Ibe ẹñwu Baibul du ñwu am’ọkọ?

Jihofa chi ọkọ ki ch’oji akwọra unyi. (Gba Abo Ẹfẹsọs 5:23.) Jihofa atene k’ọkọ ki tu amẹñwu ẹnyo k’abo akwọra unyi-wñ an’ile kwefu-wñ. Baibul ka ñwu am’ọkọ kakini: ‘Mẹ na fẹdọ ọya-mẹ.’ (Abo Ẹfẹsọs 5:25) Abu ma neke ch’e-lẹ? Ọkọ ki afẹdọ ọya-wñ akwula ñwu nyọnyọ dagba ku ma d’unyi abẹki efu ọja. I ach’alu du ki neke che ki dide-wñ, ki jẹñwu ẹdọ-wñ bọ, ki la d’amẹñwu ekwu-wñ ñwu. (1 Timoti 5:8) E-ki ch’ogbagaga tule che kaki, i ach’alu du ki neke che ki ch’atẹko ọya-wñ ki mẹru Jihofa nyọnyọ. (Matiu 4:4) Ọna ka ki neke ch’e-lẹ che ech’adua kpai egba Baibul kp’ọya-wñ. Ichẹñwu k’ọkọ akwula ñwu ọya-wñ nyọnyọ, agbade ọkọ lẹ kpai Jihofa achẹ kwọru nyọnyọ.—Gba 1 Pita 3:7.

2. Ibe ẹñwu Baibul du ñwu am’ọya?

Baibul kakini ọya “ki na railo [abẹki na b’ojima ki nefu ñwu] ọkọ-wñ.” (Abo Ẹfẹsọs 5:33) Abu i neke ch’e-lẹ? I neke ch’e-lẹ ichẹñwu ki akpibe lugbo am’ali ọmẹmẹlẹ k’ọkọ-wñ nẹ kpai ọna ki akwula ñwu owñ kpai am’ọma ma. I ñọ neke bumọ ọko-wñ ichẹñwu ki at’ọ ubi efu amẹñwu ki lo ki che, ki la ad’ẹdọ wanẹ kọla kp’owñ ichẹñwu ki d’ugbo-wñ abẹki ichẹñwu ki ma dọmo n dagba k’ọkọ-wñ ki we ch’ẹnẹ ki arẹ Jihofa.

3. Abu ọkọ kp’ọya neke jẹñwu ufẹdo ku ma nẹ ñwu ọlama ki lonyanẹ?

Baibul kọla lugbo ọkọ kp’ọya kakini: “Ama meji ach’ọrẹla ka.” (Matiu 19:5) E-lẹ che kaki ma ach’alu du ku ma neke che k’ẹñwu du ki we f’uma daru. Ma neke ch’e-lẹ ichẹñwu ku ma jọ dama iko duu, ku ma na k’ochochi, ku ma la na d’ufẹdọ k’ibe ma kpai alu k’ẹñwu dẹ ñwu ọlama. Ubi Jihofa, ma ki jẹñwu ẹnẹ duu abẹki ẹñwu duu ki ch’ogbogaga tule ef’ọlai ma t’ọkọ abẹki ọya ma le n. Ma ch’alu du ku ma neke che ku ma we kp’iko biẹ tabale kp’ẹnẹ omunẹ ki ma ch’ọkọ abẹki ọya ma n.

N’UMA NYỌGBA

Kọchẹ lugbo am’ọla ibe ki defu Baibul ki neke jẹñwu agbade ọkọ kp’ọya ki lonyanẹ.

4. Am’ọkọ—mẹ fẹdọ ku mẹ la kwula ñwu am’ọya mẹ

Baibul kakini “abokẹlẹ ki na fẹdọ am’ọya-ma dabẹnẹ k’ọrẹla-ma onugo.” (Abo Ẹfẹsọs 5:28, 29) Abu ma neke ch’e-lẹ le? G’IFIDIO-i, ubilẹ mẹ ch’oluka oji ene-i.

IFIDIO: Am’ọkọ, Mẹ Na Fẹdọ Am’ọya-mẹ Dabẹnẹ K’ọrẹla-mẹ Onugo (9:53)

Ẹñwu ch’amọna k’ọkọ neke du ña kaki i afẹdọ ọya-wñ, i la akwula ñwu?

Gba Abo Kọlọse 3:12, ubilẹ mẹ ch’oluka oji ene-i:

Abu ọkọ neke d’amali ki dẹ ña akwọra unyi-wñ?

5. Am’ọya—mẹ na fẹdọ ku mẹ la na b’ojima ki nefu m’ọkọ mẹ

Jihofa d’ibe ñwu ọya ki na b’ojima m’ọkọ-wñ dagba ki arẹ Jihofa abẹki i rẹ Jihofa n. Gba 1 Pita 3:1, 2, ubilẹ mẹ ch’oluka oji ene-i:

Ichẹñwu k’ẹ n’ọkọ ki ma rẹ Jihofa n, ochochi ẹ tene ki rẹ Jihofa. Ẹñwu ẹ neju kaki i neke jẹñwu ki rẹ Jihofa, ichẹñwu k’ẹ kọla Ọjọ ñwu iko duu abẹki ichẹñwu k’ẹ d’amali ọmẹmẹlẹ ñ’ọ? Ẹñwu chi k’ẹ kabalẹ?

Ọkọ kp’ọya neke tu ẹñwu ọmẹmẹlẹ ichẹñwu ku ma akpibe dama. Ama, iko ka ọya neke kọ ejẹ kp’ọkọ-wñ. I neke d’ẹdọ wanẹ ka ñwu ọkọ-wñ ibe ki nẹ oji ọla lẹ, ama otila i che ki rewa kaki ọkọ-wñ oñ Jihofa d’ukọlọ etu ẹñwu ki nyọ tule ñwu akwọra unyi ñwu. I la dukpẹ ki chẹñwu du ki neke che ki lebọ ẹñwu k’ọkọ-wñ tu. Lefu ech’e-lẹ, i ajẹñwu ẹdẹbọ ki d’akwọra unyi-wñ. Gba 1 Pita 3:3-5, ubilẹ mẹ ch’oluka oji ene-i:

Abu ẹdọ Jihofa adẹ ichẹñwu k’ọya ab’ojima m’ọkọ-wñ?

6. Ọkọ kp’ọya neke legwefu am’akanya duu ki w’ọgba ma du

I n’akwọra unyi du ki jọkpa n. Todulẹ, ọkọ kp’ọya dukpẹ ku ma k’ọwọ dama ku ma neke legwu ef’amakanya ma du. G’IFIDIO-i, ubilẹ mẹ ch’oluka oji am’ene-i.

IFIDIO: Ọna K’ọkọ Kp’ọya Neke Jẹñwu Ufẹdọ Ma Lonyanẹ (5:44)

Efu ifidio-i, ẹñwu du ña kaki ọkọ kp’ọya lẹ mẹr’ọlama dabu akwobi gẹ n?
Ẹñwu ch’amẹñwu ku ma che ku ma neke dabi mẹr’ọlama?

Gba 1 Abo Kọrint 10:24 kpai Abo Kọlọse 3:13. Ubi ku mẹ fʼokoke amʼọgba Baibul-i gba, mẹ ch’oluka oji ene-i:

Abu ed’amibe ki dẹ-i chekwu neke jẹñwu agbade ọkọ kp’ọya ki lonyanẹ?

Baibul kakini k’a na b’ojima m’omunẹ. Ichẹñwu k’a kọla kp’onẹ lona yẹẹ, e-lẹ adu ña kaki a b’ojima m’ọ. Gba Abo Rom 12:10, ubilẹ mẹ ch’oluka oji am’ene-i:

Ọkọ abẹki ọya dukpẹ ku ma nede ẹnẹ ki ad’ojima ñwu ekeji ọgba? Ẹñwu chi k’ẹ kabalẹ?

ABO KA KAKINI: “Omi kp’ọkọ abẹki ọya mi mẹr’ọla wa dabu akwobi gẹ n.”

Abu ẹ neke du ña kaki Baibul neke ch’atẹko ma?

ẸY’ỌLA UKỌ-I

Ọkọ kp’ọya neke n’ẹdẹbọ ichẹñwu ku ma afẹdọ ọlama, ku ma ab’ojima m’ọlama ku ma la ad’amukọ ki defu Baibul chekwu.

Ẹñwu ẹ kọchẹ?

Ẹñwu ọkọ neke che k’akwọra unyi-wñ ki n’ẹdẹbọ?
Ẹñwu ọya neke che k’akwọra unyi-wñ ki n’ẹdẹbọ?
Ichẹñwu k’ẹ n’ọko abẹki ọya, ibe ẹñwu ẹ neke du chekwu kwefu Baibul ki neke jẹñwu ufẹdọ mẹ ki lonyanẹ?

Ọjọ ku kpoji ukọchẹ-i:

Ẹñwu k’ẹ neke che

Ichẹñwu k’ẹ n’ọkọ abẹki ọya, mẹ ch’oluka oji-ọla ka dama ki kọla lugbo ọkọ kp’ọya enẹ oji jw.org.

Ẹñwu omunẹ ki d’ẹ ẹdọ k’ẹ che:

Ẹñwu omunẹ ki d’ẹ ẹdọ k’ẹ che