Nicole, one young sistah from Colombia wen tell, “I love my Kingdom Hall! Cuz iz one place wea I get fo be wit my braddahs an sistahs.” You feel da same way?

 All ova da world, Witnesses Fo Jehovah meet in about 63,000 Kingdom Halls. Dese buildings iz one nice place fo worship Jehovah. But dey do moa den dat. David one regula pionea in Colombia tell, “Our Kingdom Hall makes wat we teach look moa betta. Wen peopo come visit, dey shock wen dey see how we keep da building in good shape.” Dis someting dat no jus happen. We work hahd fo clean an take kea oua Kingdom Halls. How we able fo do dis?

How We Take Kea Da Kingdom Hall?

 Da local huis dat use da Kingdom Hall get da kuleana fo take kea of um. Fo do dat, braddahs an sistahs clean dea Kingdom Hall on da regula. An dey check fo see if tings stay working good an fix mynah kine stuffs.

 Fo help da local huis take kea dea Kingdom Hall, da Local Design/Construcktion Departmen (LDC) pick braddahs fo be maintenance trainers. Each trainer looks afta six to ten Kingdom Halls. He go to da hall an train da braddahs an sistahs on how fo take kea of um. Ery three years, he check out da building real good an see if get tings dass not safe or gotta fix.

 Oua braddahs an sistahs iz tankful fo da training dey get from da maintenance trainers. One sistah from India name Indhumathi, had say, ”‏Da training wuz unreal. Wen feel good fo learn how fo keep oua hall in top shape.” Evans, one braddah from Kenya, wen tell, “Cuz we had learn how fo fix small problems befoa dey got worse, dat wen help us save money.”

How We Pay Fo Um

 Ery year can cost hundreds to tousands of dollas a fo use an take kea one Kingdom Hall. It jus depen on wea da Hall stay, how ol it iz, an how many huis use um. How we pay fo um?

 Da money peopo donate helps fo take kea da Kingdom Hall. One braddah in Kazakhstan name Alexander, wen say, “Some of da money iz used fo get Intanet, an pay fo tings like watta an electricity. Odda tings we buy iz paypa towels, gloves, cleaning stuff, an paint.” Any lef ova money goes to da worldwide work fo help wit bigga maintenance projecks dat cost moa.

Bigga Maintenance Projecks

 If wat gotta fix at da kingdom hall goin cost moa den wat da braddahs spen in two or three monts fo da hall, den da eldas gotta talk to da LDC maintenance trainer. If da LDC gives da ok fo do da projeck, da money from da worldwide work goin help pay fo um. During da 2023 service year, had 8,793 of dese kine projecks, an all togedda had cost $76.6 million. We go try look at two of dese projecks.

 In Angola, one 15-year-old Kingdom Hall had plenny problems. Da electrical system wuz shot awready an had cracks in da walls. An da neighbas sed da rain watta from da Kingdom Hall wuz goin into dea houses. Da LDC wen make ready one projeck fo fix dese problems. It had cost $9,285. Da neighbas wuz tankful an no could believe how da work got done.

 In Poland, one Kingdom Hall’s roof wuz leaking, an da carpet wuz so buss up dat dea wuz notting dey could do fo fix um. Da LDC wen give da ok fo fix an wattaproof da roof an put in one new carpet. All dis had cost $9,757. Cuz dey wen fix all dat, da Kingdom Hall no goin need one mayjah reno fo da nex few years.

Taking Kea Da Kingdom Hall Make Jehovah Look Good

 Wen we take kea da Kingdom Hall, no ony save money, but it make Jehovah look good. One braddah name Shaun in Tonga wen tell, “Cuz we take kea da Hall, we can worship Jehovah in one clean place wea eryting work good, an da peopo wea we live tink good about Him. We feel proud fo tell peopo come to da Hall.”

How You Can Help?

 We can all clean an take kea da Kingdom Hall. One maintenance trainer in Australia name Marino wen say, “All us get da awesome chance fo take kea oua Kingdom Halls. Wen we do, we helping fo save donated money so it can be used wea dey really need um.”

 One braddah in India name Joel really like taking kea his Kingdom Hall. He tell, “Working wit my braddahs help me fo picha wat goin be like in da new world.” Nicole, who we had talk about earlia, tell, “Not too long ago da braddahs wen fix one leak in da bathroom an I wen help mop da floor. Even tho I wuzn’t da one fo fix da problem, I wen help keep erybody safe.”

 If you like take kea yoa Kingdom Hall, talk to da eldas in yoa local hui. On top of dat, da money you donate iz fo help take kea not jus yoa Kingdom Hall, but odda Kingdom Halls all ova da world. You can donate using da contribution boxes in yoa local hui or do um online at donate.jw.org. We really tankful fo all dat you give.