Sümaiwa paala, nüneeküin Maleiwa waneeinnua wayuu süpüla shikiipüʼüinjanain naya tü nupueulosekat jee süpüla naaʼinmajüin naya suulia müliain naya atumawaa (Jueces 2:18). Saashin tü Wiwüliakat, eejeerü wanee Kaʼi kasalajaneetka oʼu saainjala wayuu sümüin. Talateerü maʼin saaʼin wayuu suʼunnaa tia, süka jamüin, najaʼttirüinjatüin Jeʼwaa süpüshuaʼa tü kasa müliakat atuma saaʼin wayuu yaa Mmapaʼa. (Paashajeʼera Salmo 96:12, 13 otta Isaías 26:9.)

Nia eʼitaanaka Jesuu nutuma Maleiwa süpüla süsalainjatüin nutuma «türa eekai katayülüin soʼu je maa aka türa eekai ouktüirüin» (Aluwataaushikana 10:42; 17:31). Soʼu tü Kaʼi kasalajaneetkat oʼu saainjala wayuu, nüsoʼireʼerüinjatü Jesuu naaʼin na wayuu anaajaakana sümaa nnojoluin natüjaain saaʼu tü shiimainkat nüchiki Maleiwa. Ekirajünüinjana naya wayuukana nünain chi Maleiwa shiimainshikai süpüla alinjachin nia napüla. (Paashajeʼera Aluwataaushikana 24:15.)

Saashin tü Wiwüliakat, miirüinjatü juya. Suʼunnaa tia, asoʼireʼennüinjana aaʼin na ouktüshiikana otta ekirajünüinjana naya nünain Maleiwa süpüla noonooinjanain nümaa (Alateetkat Mapeena 20:4, 12). Saashin wayuu, ouktüle wanee wayuu sümaa naainjapuʼuin kasa mojusü, süsaleechi nia atumawaa süsoʼireʼennapa naaʼin, nnojotpejeʼe shiimain tia. Süküjüin tü Wiwüliakat, shieerüin kasalajanain nümüin tü kasa naainjakat suʼunnaa tü miitkat juya. (Paashajeʼera Roma 6:7.)

Saashin tü Wiwüliakat, süpülapünaa tü miitkat juya, eejeerü wanee kaʼiya eere süsaleerüin wayuu saainjala. Tia, shia tü ekirajaanakat anain suʼttiajee rewiisütakat tüü. Soʼu tia, najaʼttireena Maleiwa na wayuu mojulaashiikana (2 Pedro 3:7). Müsüjeseʼe weeʼiyatüinjatüin sünain shiimain alin Jeʼwaa wapüla. (Paashajeʼera 2 Pedro 3:9, 13, TNM.)