1, 2. ¿Jamüsü nütüjaaka aaʼu Pablo jamüin naaʼin wanee wayuu matsüinkai aaʼin?

EESÜ matsüinre paaʼin soʼu wanee kaʼi. Eesü mapülüʼüle paaʼin sutuma ayuulin pia, shiasaʼa sutuma tia isasü püchiki aaʼinraa wanee kasa. Yaaʼaleekajaʼa kakaliaichire pia sünain müin mayaa. ¿Aashin aneerüin maʼin pümüin sümülialaale naaʼin na waneeinnua paalii?

² Nütüjaa aaʼu Pablo jamüin naaʼin wanee wayuu nüpüleeruaanüle aaʼin sutuma wayuu jee natuma na wawalayuukana. Kojuyatua niʼrüin müliaa sümaa matsüin naaʼin (2 Cor. 1:8; 7:5). Sutuma jülüjüin maʼin naaʼin tü alatakat nümüin, müshi nia: «¿Jarai matsüinkai aaʼin? Müshia tayakai, matsüinsat taaʼin wanaa nümaa» (2 Cor. 11:​29, NM). Naashin Pablo, koʼushi wanee wayuu, kajapüshi nia, kooʼuishi nia, keʼichishi nia. Süpüshuaʼa tüü, choʼujaasü nümüin süpüla anainjachin nia. Müsia nakuwaʼipa na anoujüshiikana, naatawaisü tü nakuwaʼipakat otta choʼujaashii naya napüshuaʼa namüinjiraa (1 Cor. 12:22). ¿Jamaluʼulu tü nümakat Pablo? ¿Jamüsü naaʼin Jeʼwaa naalii na matsüinkana anoula? ¿Jamüsü washatüinjatkat nukuwaʼipa Jeʼwaa? ¿Jameerü waaʼin sümülialaale waaʼin naalii naya wawalayuukana?

3. ¿Kaseerü jülüjaka waaʼin shiale washatüin nakuwaʼipa na eʼrüliikana wayumüin?

³ Maaʼulu yaa, shia suʼwaainka maʼin wayuu tü sütchinkat. Jamüshijaʼa chi toolokoi shia nuʼwaainka jimaʼalin nia jee tü jietkat shia suʼwaainka majayülüin shia. Eeshii eekai neʼrüin wayumüin namüin na malayaakana aaʼin süpüla naaʼinrüin tü keeʼireekat naaʼin. Nnojotsü anain wamüin tü naaʼinrakat na makana aainjala. Eejüinjatpejeʼe waaʼin suulia washatüin neʼe nakuwaʼipa naya wayuukana. Jamüsüjaʼa jülüjüle waaʼin kasa mojusü nachiki na wawalayuu matchinkana anoula, shia neʼe washataka nakuwaʼipa na eʼrüliikana wayumüin. ¿Kasakaʼa waaʼinrüinjatüin süpüla shiainjatüin washatüin nukuwaʼipa Jeʼwaa?

4, 5. (1) Mayaapejeʼe eein wawalayuu matsüinkana anoula, ¿kasa shikirajaka anain waya tü nümakat Pablo suluʼu 1 Corinto 12:21-23? (2) ¿Jameerü paaʼin pükaaliinjüle na wawalayuu matsüinkana anoula?

⁴ Kojutüshii nümüin Jeʼwaa na wayuu aʼyataakana nümüin. Nüküjüin Pablo suluʼu palajatka Corinto kapiitulo 12 choʼujaain süpüshuaʼa tü niʼitaakat Jeʼwaa nünain wanee wayuu, jaʼitairü joʼuuchoin shia ( paashajeʼera 1 Corinto 12:​12, 18, 21-23). Naashin na anoujakana sünain sujuʼitüin wayuu sünainjee alaʼala, eesü waneeirua kasa sünainka wayuu nnojotka choʼujaain sümüin. Akatsaʼa shikirajaanüin achiirua tia mapa otta shiyaawatünaka aaʼu choʼujaain süpüshuaʼa tü niʼitaakat Maleiwa nünain wanee wayuu jaʼitairü joʼuuchoin maʼin shia. * Jamüsüjaʼa sümaiwa paala, watta naalii wayuu anoujaka sünain nnojoluin choʼujaain wamüin tü süchonkat süpachera wooʼui. Akatsaʼa sütüjaanüin aaʼu mapa shiain nuuntüin atuma wayuu shaʼwatüin nia nutuma chia nüpacherakai wooʼui.

⁵ Tü nümakat Pablo süchiki tü nakuwaʼipakat na anoujüshiikana, shiiʼiyatüin eein tü eekat süpüla nakaaliinjüin anain na wawalayuukana waneʼewai nakua. Kojutüshii nümüin Jeʼwaa napüshuaʼa na anoujüshiikana jaʼitainna müin matsüinkai nanoula. Aluʼusaʼa Satanaa nnojoishii kasain anain apüla waya naashin otta mojutsalii waya nümüin Jeʼwaa (Job 4:18, 19). Sutuma watüjaaitpain saaʼu kojutüin waya nümüin Jeʼwaa, talatüsü waaʼin sutuma tia otta talatüsü waaʼin sutuma naʼakain waya na wattakana naalii wayuu aʼyataakana nümüin Maleiwa sainküin mmaka. Jülüjataa paaʼin tüü: eeshi pajannajüichire wanee wayuu laülaa. Shiasaʼa sutuma jiattachoin nukua chi laülaakai, nnojoishi awaʼülaain pia. Jiattajaatsü pukua nümaa. Anakajasaʼa naaʼin chi laülaakai sutuma pükaaliinjüin nia. Müshia piakai, anasü paaʼin sutuma tü paaʼinrakat. Wanaa sümaa wakaaliinjüin na wawalayuukana talatüsü waaʼin, nnojoishii waya kashapajaaraliin, kooʼomüinsü naalii wapüla otta laülaasü waaʼin (Éf. 4:15, 16, NM). Keeʼireesü naaʼin Jeʼwaa kojutüinjanain wamüin na wawalayuukana waneʼewai nakua jaʼitairü matsüin nanoula. Waaʼinrüle tia, nnojoleerü motuin waaʼin eein kasa isaka nachiki na wawalayuukana otta müsia aijiraajeena maʼin waya.

6. ¿Jara tü piamasükat pütchi nüshajaka Pablo namüin na anoujüshiikana? ¿Jamaluʼulu shia?

⁶ «Na malayaakana aaʼin», nüshajüin Pablo tia pütchikat namüin na corintiojeʼewaliikana süpüla nüküjüin namüin mojutüin naya sutuma tü wayuukalüirua. Nujuʼitirüin Pablo tia pütchikalia süpüla nüküjüin müin malayaakai naaʼin sutuma tü kasa mojusü alatakat nümüin (1 Cor. 1:​26, 27; 2:3). Anuu joo wanee suwalaʼata tü pütchi nüshajakat Pablo namüin na anoujüshiikana, müsü mayaa: «Wayakana ayaawatakana maʼi saaʼu sukuaippa anoujaakat, anakaja müleka wakaaliijüle na wawalayuu nnojoiyüliikana ayaawatüin maʼi saaʼu tü anoujaakat» (Roma 15:1). Naya anoujüshii ayaawatakana maʼin saaʼu sukuwaʼipa tü anoujaakalü amülialaainjatü naaʼin naalii na eiwaʼaliikana sünain anoujaa süpüla kooʼomüinjatüin nanoula, maluʼulu tü nüküjeekat Pablo namüin naya anoujüshiikana.

7. ¿Jamüsü eeka süpüla kapüleein wamüin akaaliinjaa wanee wawala?

⁷ Wanaa sümaa wakaaliinjüin na wayuu müliakana aaʼin, nia washataka akuwaʼipa Jeʼwaa otta talateerü naaʼin wamaa (Sal. 41:1; Éf. 5:1). Eepajaʼa süpüla kapüleein wamüin wakaaliinjüin wanee wawala. «Nukuwaʼipajaʼa neʼe nümüiwaʼa tü alatakat nümüin», eeshii wamüle. Eesü shiale isain wachiki tü wanüikinjatkat nümüin otta nnojoishii waya arütkaain nünainmüin. Eesü wanee wawala mojukalü aaʼin sutuma tia, Rosario sünülia. * Apütünüsü tia wawalakat nutuma suʼwayuuse, müsü sünüiki: «Aisü maʼin sümüin wayuu müleka nnojorüle narütkaain na suwalayuukana sünainmüin otta nnojorüle nakaaliinjüin shia. Choʼujaasü maʼin sümüin wanee wayuu eeinjanain na saʼaleewainkana sümaa sülatüle tia sümüin» müsün. Jaʼitakajeʼe chi aluwataaikai David nütüjaa aaʼu mojuin naaʼin wanee wayuu eekai nnojoluin nürütkaanüin anainmüin (Sal. 31:12).

8. ¿Kasa akaaliinjeenaka waya süpüla sümülialaain waaʼin naalii na wawalayuukana?

⁸ ¿Kasa akaaliinjeenaka waya süpüla sümülialaain waaʼin naalii na wawalayuukana? Sotuinjatü waaʼin eein wawalayuu matsüinkana anoula sutuma ayuulin naya, mojuin naaʼin otta manoujüin napüshi. Jülüjeesü waaʼin eein süpüla sülatüin tia wamüinyaʼasa. Jülüjataa waaʼin nakuwaʼipa na israeliitakana. Müliapuʼushii maʼin naya chaa Egipto, shiasaʼa süpülapünaa nantüin eemüin tü Mma Aapünajatkat namüin, nüküjüin Jeʼwaa namüin nnojoliinjanain jeʼiyein naya noulia na nawalayuukana. Shia nüchekaka Jeʼwaa nakaaliinjüin na nawalayuu eekana müliain aaʼin naʼakajee (Deut. 15:​7, 11; Lev. 25:35-38).

9. ¿Kasa waaʼinrajatka müleka matsüinre nunoula wanee wawala? Piʼitaa wanee shiyaawatia.

⁹ Nnojotsü mojuinjatüin wanüiki nachiki na wawalayuu alatakana amüin kasa mojusü otta nnojotsü jülüjüinjatüin waaʼin wayain alanaʼaleein sünain anain noulia. Tü waaʼinrajatkat shia wakaaliinjüin naya matsüinpa nanoula (Job 33:​6, 7; Mat. 7:1). Jülüjataa paaʼin tüü: pasiruwaale wanee wayuu saaʼu moto otta nuwateʼennamaatüle pitaaraluʼumüin, «niainjaʼa eera kasirüin tü alatakat nümüin» nnojoishi makuʼu müin chi tottootkai sümaa tü perümeerakat. Neʼrajaamaatüin chi pasiruwaashikai süpüla neiyajüin nia. Müinjanaʼaya waya nümüin wanee wawala eekai matsüin nünoula sutuma sülatüin kasa mojusü nümüin. Wakaaliinjamaatüinjachi nia sünain tü nunoulakat ( paashajeʼera 1 Tesalónica 5:14).

10. ¿Kasa weʼreetka sünain nanoula na wawalayuukana jülüjüle waaʼin tü nakuwaʼipakat?

¹⁰ Eeshii wawalayuu eekai müin matsüinkai nanoula. Nnojotpejeʼe müin shia, jülüjüle waaʼin tü nakuwaʼipakat, weʼreerü nnojoluin matsüin nanoula. Jamüshiijaʼa na wawalayuu kakaliainnakana anoujüin sümaa napüleeruaanüin aaʼin sutuma napüshi, katsüinsü naaʼin otta ichesü nanoula mayaapejeʼe müin matsüinkai nanoula. Eeshii weʼrüle wawalayuu epijaka nachonnii namüiwaʼa otta nnojoishii naya makatüin suulia tü outkajawaakat. Eeshii jimaʼalii otta majayünnüü achechetkana naaʼin sünain tü nanoulakat mayaapejeʼe napüleeruaanüin aaʼin suluʼu tü koleejiakat. Jülüjüle waaʼin süpüshuaʼa tü naaʼinrakat na wawalayuukana süpüla nachecheraain sünain aʼyatawaa nümüin Jeʼwaa, weʼreerü katsüin nanoula (Sant. 2:5).

11, 12. (1) ¿Kasa wekirajaainjatka anain süpüla watüjaain saaʼu tü jülüjakat naaʼin Jeʼwaa nanainjee na matsüinkana anoula? (2) ¿Kasa naainjaka Jeʼwaa nüka Aarón mayaapejeʼe naainjüin kasa mojusü? ¿Kasa shikirajaka anain waya tia?

¹¹ Wekirajaale sünain tü nukuwaʼipakat Jeʼwaa nanainmüin na aʼyataapuʼukana nümüin, watüjaajeerü aaʼu shiain jülüjüin naaʼin Jeʼwaa tü kasa anasü suluʼukat naaʼin wanee wayuu ( paashajeʼera Salmo 130:3 *). Jamüshijaʼa chajachire pia nümaa Moisés suʼunnaa nüküjüin Aarón jamüin nukumajaka  niyaakua wanee paaʼachon süka ooro, ¿jamüsüje pünüiki nüchiki Aarón? (Éx. 32:21-24.) Oonooshi Aarón sümaa Míriam süpüla mojuinjatüin nünüiki nümüin Moisés saaʼujee nnojoluin israeliitain nuʼwayuuse, ¿jamüsüje pünüiki nüchiki Aarón saaʼu müitpain nukuwaʼipa? (Núm. 12:​1, 2.) Nnojoishi aʼwaajünüin Jeʼwaa nutuma Aarón nümaa Moisés saaʼujee nujuʼitirüin wüin Jeʼwaa suluʼujee wanee ipa chayaa Meribá, ¿kasaje waaʼinraka sutuma nnojoliin naʼwaajüin Maleiwa? (Núm. 20:10-13.)

¹² Mayaapejeʼe naainjüin Aarón kasa mojusü, nnojoishi süsalamaatüin nia nutuma Jeʼwaa. Süka jamüin, nütüjaain aaʼu Jeʼwaa nnojolin mojulaain Aarón. Eesüjaʼa süpüla shiain naainjüin atuma kasa mojusü saaʼu nüpüleeruaanüin aaʼin. Nnojotpejeʼe mojuin nümüin Aarón nüchiaanüin nutuma Maleiwa. Otta müsia wanaa sümaa süküjünüin nümüin kaainjalain nia niyaawanajaa aaʼu mojuin tü naainjakat (Éx. 32:26; Núm. 12:11; 20:23-27). Nnojotsü shiain jülüjüin naaʼin Jeʼwaa tü kasa mojusü naainjakat Aarón, shia jülüjaka naaʼin kanoulain Aarón otta niyaawajaain suulia naainjala. Kojuya juya süchikijee, sotushi aaʼinyüü nia namaa na nuuʼuliwoʼukana sutuma mmoluwaain naya neema Jeʼwaa (Sal. 115:10-12; 135:​19, 20).

13. ¿Kasa waaʼinrajatka süpüla wanoukteʼerüin tü jülüjakat waaʼin nachiki na wawalayuukana? Püküja wanee shiyaawatia.

¹³ Eeshii kaainjarale na wawalayuukana nümüin Jeʼwaa maʼaka naaʼin Aarón. ¿Kasa jülüjaka paaʼin nanainjee naya wawalayuukana, tü kasa mojusü naainjakat shiataapa tü kasa anasü eekat suluʼu naaʼin? (1 Sam. 16:⁠7.) Jamüshijaʼa eere wanee jimaʼai eekai nüshaittüin, nünajüin jee naapajüin wanee kasa nnojotka anain nüpüla wanee anoujüshi jee eʼrüire nia wayumüin, ¿kasa waaʼinrajatka? Suulia mojuin wanüiki nüchiki, shia anaka aluʼu wakaaliinjüle nia süpüla laülaainjatüin naaʼin sünain anoujaa. Wanaa sümaa wachajaain sukuwaʼipa süpüla wakaaliinjüin na wawalayuukana, amülialaasü waaʼin otta kooʼomüinsü naalii wapüla.

14, 15. (1) ¿Kasa naainjaka Jeʼwaa wanaa sümaa niʼrüin mojuin maʼin naaʼin Elías? (2) ¿Kasa shikirajaka anain waya tü alatakat nümüin Elías?

 ¹⁴ ¿Jamüsü naaʼin Jeʼwaa naalii na mojukana maʼin aaʼin? Wekiraja sünain tü naaʼinrakat süpüla nükaaliinjüin Elías wanaa sümaa mojuin maʼin naaʼin. Mayaapejeʼe meimmoluin Elías wanaa sümaa eejiraain nia namaa na 450 nünüikimaajanakana Baal, aʼluwataashi nia suulia Jezabel wanaa sümaa naapüin süchiki suʼutirüinjatüin naaʼin. Oʼunüshi nia maʼaka 150 kiloometüro süpüla nüntüin eemüin tü mmakat Beer-seba. Nüntapa chayaa nuunjulaaka anoouishii. Mapüsashi maʼin nia, makalaka nüikkalaain suupünaa seemiouse wanee wunuʼu. Nümaka nümüin Maleiwa: «¡Puʼuta mata taaʼin Jeʼwaa!» (1 Rey. 18:19; 19:1-4, NM).

¹⁵ ¿Kasa naainjaka Jeʼwaa wanaa sümaa niʼrüin mojuin maʼin naaʼin Elías? ¿Jashichijaashiche Jeʼwaa nümüin Elías? Nnojoishi jashichin nia nümüin. Nütüjaa aaʼu Jeʼwaa eein kasa kapüleeka nümüin Elías, makalaka nüjütüin wanee aapiee nünainmüin. Piantua nümüin chi aapieekai nümüin Elías: «Pütamaa pikaiwa. Wattayülia tü mmakat püpüleerua» ( paashajeʼera 1 Reyes 19:5-8). Watüjaaitpa aaʼu naapüin Jeʼwaa nünüiki Elías otta nükaaliinjüin nia süpülapünaa nüküjüin nümüin tü naaʼinrajatkat.

16, 17. ¿Kasa waaʼinrüinjatka süpüla washatüin nukuwaʼipa Jeʼwaa?

¹⁶ ¿Kasakaʼa waaʼinrüinjatüin süpüla washatüin nukuwaʼipa Jeʼwaa? Nnojotsü waküjamaatüinjatüin nümüin wanee wawala tü naaʼinrajatkat (Prov. 18:13). Shia anaka aluʼu waapajüle palajana nünüiki chia wawalakai süka mojuin naaʼin sutuma mojutüin nia naashin (1 Cor. 12:23). Waaʼinrüle tia watüjaajeerü aaʼu kasain choʼujaain nümüin otta wakaaliinjeechi nia.

¹⁷ Jülüjataa waaʼin tü alatakat sümüin Rosario, tü wayuu waküjakalü achiki paala. Wanaa sümaa nüpütüin shia chi suʼwayuusekai sümaʼaleʼeya tü piamasükat süchonnii, ¿kasa naainjaka na wawalayuukana süpüla nakaaliinjüin shia? Müsü sünüiki: «Tayamaajüin na tawalayuukana süpüla taküjüin namüin tü alatakat tamüin, antamaatüshii naya tepialuʼumüin sümaa kerain noʼu sutuma mojuukalü aaʼin. Nnojoishii napütüin waya wamüiwaʼa soʼu apünüin kaʼi. Shiasaʼa sutuma nnojoluin müin wekayaakai aaʼin otta mojuin maʼin waaʼin, namaashii waya nepialuʼumüin süpüla naaʼinmajüinjanain waya». Sutuma tia sotojoosü waaʼin tü nümakat Santiago, tü makat mayaa: «¿Jameerü eera nukuaippa chira wayuukai nümüin wane nuwala eekai cheʼojaain nüsheʼin, eekai cheʼojaain eküülü nümüin? Müleka nümüle nümüin: ‹Eeshi Maleiwakai pümaa, kasheʼinjeechi pia emireechi pia›, sünain nnojolüin nüsülajayaain tü kasa cheʼojaakat nümüin, nnojotsü jaloulin nümüin chi mojushikai tü nümakat nümüin. Mayaasüje müin nünüiki chi anoujashikai naajüin sünain ‹Anoujashi taya nünain Cristo› nümüin, nnojotsü kasain anain apüla tü nünoulakat nuʼupala Maleiwa, süka nnojolüin naaʼinrüin tü kasa anasü nüchekakat chi Maleiwakai nüpüleerua» (Sant. 2:15-17). Aipirua kashi süchikijee tü alatakat sümüin Rosario namaa na süchonniikana, pürekutsootshii aaʼusiliaat naya sutuma nakaaliinjünüin natuma na wawalayuukana (2 Cor. 12:10).

18, 19. (1) ¿Kasa waaʼinrajatka süpüla wakaaliinjüin na matsüinkana anoula? (2) ¿Jaralii na anakana akuwaʼipa sutuma wakaaliinjüin na matsüinkana anoula?

¹⁸ Kakaliashi wanee wayuu süpüla anainjachin nia müleka ayuuipünaale nia. Müsia neʼe nukuwaʼipa wanee anoujüshi eekai sümatsüinjain nunoula sutuma kaainjalain nia jee sülatüin kasa mojusü nümüin, nnojotsü anamaatüin nunoula. Acheküshi nükatsüinrüin nunoula sükajee nikirajaain sünain tü Wiwüliakat, nuʼuraajüin otta nuʼunüin sünain tü outkajawaakat. Choʼujaapejeʼe wakaaliinjüinjachin niayaʼasa. Weeʼiyatüinjatü nümüin sünain sümülialaain waaʼin naalii, alin nia wapüla otta kojutüin nia wamüin (2 Cor. 8:8).

¹⁹ Wakaaliinjüle na wawalayuukana, talateerü maʼin waaʼin otta amülialaajeerü waaʼin naalii. Otta müsia anamieena maʼin napüshuaʼa na wawalayuukana. Müleka wakaaliinjüle na matsüinkana anoula, nia washataka akuwaʼipa Jeʼwaa. Süka jamüin, kojutüin nümüin na wayuukana waneʼewai nakua (Aluw. 20:35).