Naashin na Maayakana, ajaʼlajaainjatia paala tü Mmakat tisienpüroʼu 21 soʼu 2012, shia naashajaaka maʼin achiki tia na wayuukana. ¿Jamüsüjaʼa pünüiki süchiki tia? Süka sülatüitpain tia kaʼikat, eesüjaʼa süpüla jimatüin paaʼin, mojuin paaʼin jee nnojorüle jamajatüin shia pümüin. Nnojotsü ekeraajüin tia aküjünakat sünain sajaʼlajaainjatüin tü Mmakat.

¿Jamaluʼutka joo tü sümakat Mateo 24:3 sünain ‹sajaʼlajaainjatüin kasakat süpüshua›? Eeshii na wayuu mmotkana seema sajaʼttinnüinjatüin tü Mmakat süka siki naashin. Otta eeshii na eʼreekana maʼin jameerüin sukuwaʼipa tia. Eeshii na kulajaainnakana aaʼin sünain aapaa süchiki pejein sükalia sünain sajaʼlajaainjatüin tü Mmakat. Müsü nanüiki na wayuukana sutuma jülüjüin naaʼin tü sümakat neʼe tü wayuukalüirua suulia tü sümakat tü Wiwüliakat.

Aneerü paaʼin piyaawatapa saaʼu tü sümakat tü Wiwüliakat süchiki sukuwaʼipainjatka tü Mmakat. Süküjüin tü Wiwüliakat kaseerüin alataka mapa jee müsia süküjüin eein süpüla sukulajaain saaʼin wayuu sünain aʼatapanajaa. Jülüja paaʼin tü sümakat tü Wiwüliakat shiʼipajee waneeirua pütchi asakinnakalü anain.

TÜ SÜMAKAT TÜ WIWÜLIAKAT: «[Nia Maleiwa] kakumalaka tü Mmakat jee tü kasa eekat saaʼu otta nnojotsü jaralüinjatüin ajaʼttirüin shia» (SALMO 104:5, NM).

Nnojoleerü ajaʼttinnüin tü Mmakat süka siki, nnojoleerü kasain ajaʼttinnüin aka shia. Saashin tü Wiwüliakat akumajuushi tü Mmakat süpüla kepiainjatüin wayuu saaʼu. Müsü Salmo 37:29, NM: «Tü mmakat namüinjatü na lotokana akuwaʼipa otta kepiainjana waneepia saaʼu» (Salmo 115:16; Isaías 45:18).

Süchikijee nukumajüin Maleiwa tü Mmakat, anashaatasü süpüshuaʼaleʼeya tü nukumajakat naashin, ayatsia talatüin naaʼin maaʼulu sutuma tia (Génesis 1:31). Nnojotsü najaʼttirüinjatüin tü Mmakat, naya ‹najaʼlajeʼerüinjanakana na amojujakana tü mmakat›, ayateeria naaʼinmajüin Maleiwa tü Mmakat waneepia (Alateetkat Mapeena 11:18, NM).

Eesüjaʼa süpüla jülüjüin paaʼin süchiki tü sümakat 2 Pedro 3:7, NM makalü mayaa: «Tü sirumatuʼu eekat maaʼulu ooʼulaka tü mmakat anaajünüsü süpüla siki». ¿Ajaʼttinnüinjatü tü Mmakat süka siki saashin türa pütchika? Nnojo, saashajaapa tü Wiwüliakat süchiki tü Mmakat, sirumatuʼuka jee siki, eesü shiyaawaseyaale neʼe tia. Jamüsajaʼa suluʼu Génesis 11:1 müsü maʼaya: «Waneesiaiwaʼaya neʼe sünüiki tü wayuukolüirua süpüshua sainküin mma», yaʼayaa naya saashajaaka achiki na wayuukana.

Suluʼu 2 Pedro 3:7, tü sirumatuʼukat, tü mmakat otta tü sikikat, shiyaawaseyaa neʼe. Saashin tü wersiikulokot 5 jee 6 ajaʼttinnüsü tü mmakat jee tü sirumatuʼukat süka wanee Juya miyoʼushaata, alatüsü tia nükalioʼu Noé, ayatapajaʼaya eein tü Mmakat süchikijee tia. Soʼu saashajaanüin süchiki tü «mmakat» yala, naya saashajaakana achiki na mojulaashii ouktakana sutuma tü juyakat, müsia tü «sirumatuʼukat» naya saashajaaka achiki na aluwataakana saaʼu tü mmakat (Génesis 6:11). Suluʼu 2 Pedro 3:7 ajaʼttinnüshii naya wayuukana süpüla kaʼikat süpüshuaʼa maʼaka saaʼin najaʼttinnüle süka siki.

TÜ SÜMAKAT TÜ WIWÜLIAKAT: ‹Tü nakuaippakat na manoujainsaliikana sümaa tü kasa mojusü keeʼireekat naaʼin, yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua› (1 JUAN 2:17).

Na ajaʼttinnüinjanakana naya na wayuu nnojotkana oonooin nümaa Maleiwa. Chi Maleiwakai najaʼlajeʼereena na wayuu mojulaashiikana süpüla kepiainjanain na wayuu anamiakana saaʼu tü Mmakat, müshi maʼaka naaʼin wanee tottoot awaʼtkai wanee wayuu süpüla niyuʼlüin wanee ayuulii nuulia süpüla katüinjatüin noʼu (Salmo 37:9). Müinjatülejeʼe sukuwaʼipa tia, anashaateerü maʼin.

Wanee suwalaʼata akuwaʼipaa eeʼiyataka aneerüin sukuwaʼipa tü mmakat shia tü sümakat waneeirua Wiwülia sümaa sümüin: «tü kaʼi sajaʼttüinjatkat oʼu tü kasakalüirua» jee shiale [«tü kaʼi suʼwanajaainjatkalü oʼu tü kasakalüirua Biblia Textual]» (Mateo 24:3). Nnojoleerü ajaʼttinnüin tü wayuukalüirua otta tü Mmakat, sajaʼlajaainjatpa kasaka süpüshuaʼa. Süküjüin tü Wiwüliakat eejeerüin tia mapeena (Lucas 18:30).

Nüküjüin Jesuu sünaatünajatüin tü kasakat süpüshuaʼa mapeena. Soʼu tia kaʼikat aneerü nakuwaʼipa na wayuukana maʼaka saaʼin tü keeʼireepuʼukat naaʼin Maleiwa (Mateo 19:28, NM). Tü talateetkat atuma waaʼin shia:

• Paʼaraiiseerü tü Mmakat otta aneerü nakuwaʼipa na wayuu kepiakana saaʼu (Isaías 35:1; Miqueas 4:4).

• Eejeerü aʼyatawaa talateetka atuma saaʼin wayuu (Isaías 65:21-23).

• Nnojoleerü ayuulin wayuu (Isaías 33:24).

• Nnojoleerü laülaain wayuu (Job 33:25).

• Asoʼiraajeerü naaʼin na ouktüshiikana (Juan 5:28, 29).

Waaʼinrüle «tü keeʼireekat naaʼin Maleiwa», nnojoleena waya mmoluin seema sajaʼlajaain kasaka süpüshuaʼa. Müinjatülejeʼe shia, keeʼireejeerü maʼin waaʼin süntamaatüin tia kaʼikat.

TÜ SÜMAKAT TÜ WIWÜLIAKAT: «Jiʼrapeena tü taküjaitpakat achiki jümüin, jütüjaweerü aaʼu sünain sülüʼülüin nükalia Maleiwa süpüla aluwatawaa» (LUCAS 21:31).

«Sutuma tü kasa eejaʼalaa makat jee müsia sutuma mojuin maʼin sukuwaʼipa tü wayuukalüirua, kooʼomüinsü nanüiki süchiki sajaʼlajaainjatüin tü kasakat süpüshuaʼa», shiaʼalekajaʼa müleka nnojorüle nayaawatüin saaʼu na wayuukana jamakuwaʼipalüin wanee kasa, ayateeria nanoujüin sünain sajaʼttüinjatüin tü kasakat süpüshuaʼa, müsü nünüiki chi ekirajüikai Richard Kyle suluʼu tü karalouktakat: The Last Days Are Here Again (Los últimos días han vuelto).

Tü sümakat tü Wiwüliakat süchiki tü kasa alatajatkat, nnojotsü shia ashajünüin süpüla süküjüinjatüin süpüshuaʼa tü kasa süsakirakat anain wayuu süchiki tü kasa alatakat maaʼulu. Nükaaliinjüin Maleiwa na nünüikimaajanakana süpüla nashajüinjatüin süchiki tü alatajatkat süpülapünaa sajaʼttüin tü kasakat süpüshuaʼa. Pikirajaa sünain tü pütchi alatajatkat saashin tü Wiwüliakat jee jülüja paaʼin shikeraajüle tia.

• Atkawaa, jamü, akutkujaasü tü Mmakat jee ayuuisü wayuu (Mateo 24:7; Lucas 21:11).

• Kooʼomüinjeerü wayuu kaainjarat (Mateo 24:12).

• Namojujüin na wayuukana tü Mmakat (Alateetkat Mapeena 11:18, NM).

• Kapülasü naaʼin nakuwaʼipa neʼe namüiwaʼa na wayuukana, kachiiruasü naaʼin tü washirüükat jee eeshii eekai shaitteein waneepia saaʼu maalin Maleiwa napüla (2 Timoteo 3:2, 4).

• Nnojoleena paaʼinwajiraain na wayuukana sümaa napüshi (2 Timoteo 3:2, 3).

• Nnojoleerü sunoujüin tü wayuukalüirua sünain sajaʼlajaainjatüin tü kasakat süpüshuaʼa (Mateo 24:37-39).

• Aküjünüsü tü pütchi anasükat nüchiki Maleiwa sainküin Mmaka (Mateo 24:14).

Naashin Jesuu weʼrapeena tü nüküjüitpakat achiki wamüin, watüjaajeerü aaʼu sünain sülüʼülüin süpüla sajaʼlajaainjatüin tü kasakat süpüshuaʼa (Mateo 24:33). Na aküjüliikana pütchi nüchiki Jeʼwaa nanoujüin maʼin sünain shikeraajüin tia maaʼulu, müsüjeseʼe naküjüin pütchi süchiki tia suluʼu 236 mma.

TÜ SÜMAKAT TÜ WIWÜLIAKAT: «Je maa aka wane wayuu ipoolu sünain süntalaa sümüin tü saaliikat sümüin, akaweeria tü wayuukalüirua süpülapünaa tü nükaliakat chi Senyotkai. Wanaa sümaa saashajaʼalaataain süchiki anaa akuaippa, anta meeria wane müliaa miyoʼushaata nanainmüin sünain süsaleenain naya tü naainjalakat. Nnojoleena ojuittüin naya suulia tü müliaa neʼreetkat» (1 TESALÓNICA 5:3).

Saashin tü Wiwüliakat, sajaʼttüinjatpa kasaka süpüshuaʼa, müsü aka saaʼin wanee wayuu ipuolu sünain süntalaa sümüin tü saaliikat. Tü kasa alatayaa makat sünainmüinreʼeya sajaʼttüinjatpa kasaka süpüshuaʼa, müsü aka saaʼin wanee wayuu ipuotsü süka sütüjaain saaʼu nükalijaapa maʼin naalii wanee joʼuu sümüin. Chi tottootkai eesü süpüla nüküjüin sümüin tü wayuukot joujeerüin jemeyuluin shia, nnojorülejeʼe jemeyuluin shia soʼu tia kaʼikat, ayatsia sütüjaain saaʼu jemeyulumaateerüin shia. Akaajaʼaya neʼe sukuwaʼipa sajaʼlajaainjatpa kasaka süpüshuaʼa, jaʼitairü süküjünüin wainma alawaa ayateeria antüin tia kaʼikat (2 Timoteo 3:1).

Eeshijaʼa süpüla pümüin: «Shiimainrejeʼe sümaa pejein sajaʼlajaainjatüin kasaka süpüshuaʼa», ¿jamakaʼa joo nnojotka shiyaawatüin saaʼu tü wayuukalüirua? Saashin tü Wiwüliakat pejepa maʼin süpüla sajaʼttüin kasaka süpüshuaʼa, nnojorüleejeeria nayaawatüin saaʼu tia na wayuukana. Tü naaʼinreetkat naya shia nemeʼerainpaleerüin neʼe tia sümaa namüin:  «Nnojotsü kasain eeʼiranajaayaain süchikijee ouktüin na watuushinuukana. Müsü wanaawakai saaʼin wamüin kasa süpüshua maa aka paala sümaiwa sükumajaiwaʼaya tü mmakat» (2 Pedro 3:3, 4). Jaʼyasü maʼin saaʼu sünain sajaʼlajaainjatüin kasaka süpüshuaʼa, nnojotpajaʼa kachipünaayaain neʼe naaʼin tia na wayuukana (Mateo 24:38, 39).

Tü aashajaanakat achiki sünain karalouktakat tüü, süpüshi neʼe tü sümakat tü Wiwüliakat süchiki shiimain pejein süpüla sajaʼlajaainjatüin kasaka süpüshuaʼa. * ¿Ekirajaweeshi pia sooʼomüin? Pikirajaweerejeʼe, püma namüin na aküjüliikana pütchi nüchiki Jeʼwaa nekirajaiwa pia sünain tü Wiwüliakat. Ekirajüneechi pia pipialuʼu jee shiale eere anashiin pümüin otta eesü süpüla piyamaajünüin süpüla pikirajünüin. Shia neʼe choʼujaaka piʼitaain tü kaʼi pikirajaweekat oʼu, piʼreerü sümaa anashaatain shia.