Achiawaa na tepichikana sünainpünaasü oʼuniraa nakuwaʼipa otta ekirajaa naya. Sünainpünaasü shiaʼaya anouteʼeraa nakuwaʼipa otta ekirajaa naya sünain tü kasa anasükat.

Maaʼutpünaa yaa, eeshii wayuu nnojoliikana achiaain nachonnii suulia mojuin naaʼin natuma naashin. Na wayuu anakana maʼin atuma nepijia nachonnii nnojoishii naluwataain naya sünain wanee kasa eeka kapüleein otta nekirajüin süpüla anainjatüin sukuwaʼipa tia natuma.

«Aküjüneesü namüin na tepichikana tü kasa nnojotkat süpüla naaʼinrüin süpüla wayuuinjanain laülaa aaʼinchii naya otta süpüla natüjain süpüleerua nakuwaʼipa. Nnojorüle saaʼinnüin tia, meerü nakuwaʼipa maka saaʼin wanee anuwa eekai mojununtiain, sülüʼüjeerü neʼe shia tü joutaikat otta ojuichijaweerü shia» (Pamela).

Pansaa putuma tü pümakat nümüin chi püchonkai. Nnojoire noonooin chi püchonkai pümaa, süsala nia putuma sünainjee tia. Shiasaʼa noonoole sümaa tü pümakat nümüin, «talatüsü taaʼin pümaa», eesü süpüla pümüin nümüin.

«Süka matüjain jaa maa na tepichikana maaʼulu, anasü tanüiki namüin na tachonniikana wanaa sümaa jaa namüin tamüin. Sünainjee tia, nnojotsü mojushiin namüin tachiaapa naya mojule natuma wanee kasa» (Christine).

TÜ SÜMAKAT TÜ WIWÜLIAKAT: «Shieerü nütpajaka chi wayuukai süchon tü nüpünajakat» (Galacia 6:7, TNM).

Piyaawatüinjatü saaʼu palajana jamüin naaʼinraka wanee kasa. Püchiajaainjanapa püchonnii, jülüja paaʼin jeʼrain juya naya, tü isakat nachiki jee mojule maʼin tü naaʼinrakat. Nachiaanüle na tepichikana sünainjee tü kasa mojusü naaʼinrakat, nayaawateerü aaʼu nnojoluin anain tü naaʼinrakat. Jamüsüjaʼa püküjale nümüin püchon tü nnojotkat süpüla naaʼinrüin sükajee serulaat otta niʼrayaale wayumüin pümüin, eesü süpüla püsütüin shia nuulia. Nnojoipejeʼe süsalainjachin nia putuma sünainjee neʼe jashichin pia nümüin.

«Jülüjawaisü taaʼin jamüin nnojoika noonooin chi tachonkai sümaa tanüiki. Jülüjasü taaʼin nnojorüle naaʼinjeein shia jee shiale sutuma niʼrülin wayumüin. Naaʼinjeere shia süsalashi tatuma, nnojorüle müin shia, yootushi taya nümaa süpüla niyaawatüin saaʼu mojuin maʼin tü naainjakat» (Wendell).

TÜ SÜMAKAT TÜ WIWÜLIAKAT: «Jia kachooinshiikana, anakaja müleka jikirajüle na jüchooinkana süka anakat akuaippa suulia jashichijüin naya jümüin otta suulia mojujain naaʼin sütüma jünüiki» (Colosas 3:21).

Kamanee pia. Nnojoire jashichin wanee wayuu nüchiaapa nüchonnii, mapüleejeerü namüin na tepichikana aapawaa sümaa tü achiaanakalü anain naya süka natüjaain saaʼu alin naya apülawaa.

«Naaʼinrüle kasa mojusü chi wachonkai müshii waya nümüin: ‹Talatüshii maʼin waya sünainjee tü kasa anasü püneekakat paala, nnojotpejeʼe anain waaʼin sünainjee tü kasa mojusü paaʼinrakat›. Otta waküjain nümüin nnojoleerüin mojuin nukuwaʼipa waneepia sünainjee tü naainjalakat müleka nüchajaale sukuwaʼipa süpüla nunoutuin shia, jee waküjain nümüin wakaalinjeechin nia» (Daniel).

TÜ SÜMAKAT TÜ WIWÜLIAKAT: «Müleka shiimüinre sünain alin tapüla wayuu, nnojoleerü akulajaain taaʼin sünain kamanewaa namüin» (1 Corinto 13:4).