TÜ SÜMAKAT TÜ WIWÜLIAKAT: «Chi wayuu jülüjakai aaʼin palajana tü kasa naainjainjatkat, aneerü sukuwaʼipa nutuma. Aluʼusaʼa chi wayuu ashapajaakai aaʼin sünain tü naainjainjatkat, mojeerü sukuwaʼipa nutuma» (Proverbios 21:5).

TÜ SÜNAINPÜNAAKAT. Keraainjatü watuma palajana tü kasa waaʼinrajatkat süka wanneetse jee waaʼinrajatü tia, müle shia watuma aneerü wakuwaʼipa. Soto paaʼin eein süpüla isain püchiki piyaʼlajüin süpüshuaʼa tü püchekakat. Makalaka piyaawatüinjatüin saaʼu kasain pükataajüin anain pünneetse.

TÜ PAAʼINRAJATKAT

• Piʼitaa jeʼrainjatüin nneerü pükataajaka. Püshaja suluʼu karaloʼuta tü kasa puwalaajawaikalü otta tü kasa piyaʼlajüinjatkat. Pükatala tü nneerü süliainjatkat wanee kasa maʼaka saaʼin tü süliainjatkalü eküülü, püsheʼin jee tü kasa choʼujaakat pipialuʼu. Piʼrüle süchoʼujaain tü nneerü pükatalakat süpüla wanee kasa, paapaa shia saʼakajee tü pükatalakat paala süpüla wanee kasaʼaya. Jamüsüjaʼa wainmaleere nneerü süliaka kosoliina, eesü süpüla paapaain tü pükatalakat süpüla wanee kasa nnojotka choʼujaain maʼin, maʼaka saaʼin ojuʼitaa sünain ekaa yalapünaa.

• Nnojo pujuyaajüin kasa nnojotka choʼujaain pümüin. Jalia pia suulia ojuyaajaa nneerü nnojotka choʼujaain maʼin pümüin. Shia anaka aluʼu pünaajaale nneerü süpülapünaa piyaʼlajüin wanee kasa. Piyaʼlajüle kasa süka tarjeta de crédito, püwalaaja kashiwai tü nneerü paʼanapajakat suulia süchekajünüin süchon pümüin. Kojuyaalaichipale pia, pukumaja sukuwaʼipa süpüla puwalaajüin shia jee ayataʼaya pikeraajüin tia.

  Naashin na ekirajaakana süchiirua tia, wainmaleʼeya nneerü wakataajaka wayaʼlajüle kasa  süka tarjeta de crédito. Makalaka wayaawatüinjatüin saaʼu tü wayaʼlajakat süka.

TÜ SÜMAKAT TÜ WIWÜLIAKAT: «Chi shokulashikai nnojoishi apünajeein juyapü; ojulijakuʼu meechi nia kachonpa tü aʼttieekat süka nnojoleerüin eein kasa nümaʼana» (Proverbios 20:4).

TÜ SÜNAINPÜNAAKAT. Nukulajaale aaʼin wanee wayuu sünain aaʼinraa wanee kasa, maʼletseechi. Makalaka anain jülüjale paaʼin jameerüin pukuwaʼipa mapa, anashi keʼepüire pia sünain aʼyatawaa otta piisatta pünneetse.

TÜ PAAʼINRAJATKAT

• Aʼyataalinjachi pia. Müleka paainjale süpüshuaʼa tü piʼyateʼennakalü anain jee keʼepüire pia sünain, kojuteechi pia nümüin chi pülaamainkai jee nnojoleerü nüsütüin puulia piʼyataain.

• Lotuinjatü pukuwaʼipa waneepia. Müleka puʼuluwajüle kasa nuulia chi pülaamainkai, nnojoleerü anain pütchi püchiki. Müsia joo, nnojoleerü aapüneein aʼyatawaa pümüin.

• Nnojo washireein paaʼin. Nneerüyuuire wanee wayuu, amojujaaweerü nukuwaʼipa namaa na waneinnua sutuma jee eeshi süpüla ayuulin nia. Soto paaʼin nnojoluin shiain tü nneetkat tü kasa choʼujaʼaleekat maʼin nümüin wanee wayuu.

NNOJO WALATIRÜIN KAʼI JEE WAKATAAJÜIN NNEERÜ SÜNAIN KASA NNOJOTKA ANAIN

«Chi eekai nüsülin otta chi eekai koʼutunain maʼletseena, otta sutuma kuʼlajaain naaʼin mojushalaʼateerü nasheʼin» (PROVERBIOS 23:21).

NNOJO SÜSHAPATAAIN WAAʼIN SAAʼU WANEE KASA

«Nnojo jüshapataain aaʼin saaʼu tü jiküinjatkat je tü jüsüinjatkat, katüinjatkat atüma joʼu, je saaʼu tü kuluulu jaʼatajatkat anainjatkat atüma jiyolojo» (MATEO 6:25).

NNOJO SUCHUMÜJAIN WAAʼIN

«Chi wayuu eekai kachumüralin, kachiirueerü naaʼin washirüü, nnojotpajaʼa nütüjaain aaʼu sünteerüin naaʼu tü maʼletseekat» (PROVERBIOS 28:22).