PÜTCHI SÜNAINKA SÜTA TÜ REWIISÜTAKAT
¿Shiimainchejeʼe sülatüin tia?
Oʼutüna aaʼinchi Jesuu soʼu juyakat 33. Eperulajünüshi nia, aküjünüsü sünain niyaleraain nooʼomüin na sülaülashiikana mma, asheʼejünashaatashi jee akachennüshi nia sünain wanee wunuʼu lotusü, ouktakalaka nia. Asoʼireʼennüsü naaʼin Jesuu nüchikuaʼa nutuma Maleiwa. Pienchi shikii kaʼi süchikijee tia, nuʼunakalaka chaa iipünaamüin.
Makaʼa watüjaain saaʼu tia shia süka süshajünüin suluʼu tü karalouktakat Mateo, Marcos, Lucas otta Juan. ¿Shiimainchejeʼe sülatüin tia nümüin Jesuu? Müleka alawaale tü aküjünakat nüchiki Jesuu, nnojotsüjaʼa kasain saamüin namüin na anoujashiikana nanoujain nünain Jesuu jee amülaʼatsüjaʼa mata naʼatapajüin katüinjatüin noʼu waneepia suluʼu tü Paʼaraiisükat (1 Corinto 15:14). Shiimainrejeʼe sülatüin tia, shiimainjaʼa mata anashaateerüin wakuwaʼipa soʼu palit kaʼi. ¿Shiimainchejeʼe tü aküjünakat nüchiki Jesuu nutuma Mateo, Marcos, Lucas otta Juan? ¿Alawaataapa neʼe shia?
EESHII WAYUU ASHAJAKANA NÜCHIKI JESUU
Tü kuentakalüirua, nnojotsü maʼin pansaain. Aluʼuinjaʼa tü aküjünakat suluʼu Mateo, Marcos, Lucas otta Juan, pansaasü süpüshuaʼa tü kasa ashajünakat suluʼu. Jamüsüjaʼa suluʼu tia karalouktakalüirua, ashajünüsü sünülia mma eeyütkalia maaʼulu yaa otta nanülia na wayuu eejanakana namaiwa paala (Lucas 3:1, 2, 23).
Eejana wayuu namaiwajannuu ashajakana nüchiki Jesuu. * Jamüshiijaʼa na roomajeʼewaliikana, noʼutajachipa naaʼin wanee mojulaashi, nakacherüin nia sünain wanee wunuʼu lotusü süpüla niʼrüin nümüliala. Tia, shiaʼaya neʼe tü aainjünakat nüka Jesuu naashin Mateo, Marcos, Lucas otta Juan. Jaʼitakajeʼe tü kasa mojusü naaʼinrakat na nikirajüinkana Jesuu, nnojotsü ounjunnüin, ashajünüsü shia suluʼu tü Wiwüliakat (Mateo 26:56; Lucas 22:24-26; Juan 18:10, 11). Nnojotkalaka alawaain tü aküjünakat nüchiki Jesuu nutuma Mateo, Marcos, Lucas otta Juan.
¿SHIIMAINCHEJEʼE NÜSOʼIRAAIN AAʼIN JESUU?
Eeshii wayuu anoujakana sünain shiimain yaajachin Jesuu yaa mmapaʼa, nnojotpejeʼe nanoujain sünain süsoʼiraain naaʼin nüchikuaʼa. Majanainka na nikirajüinkana Jesuu, nnojotpünaasü nanoujain sünain tia (Lucas 24:11). Nanoujaleʼe anainrü tia niiʼiyataapa Jesuu namüin. Eeʼiyataashinka nia namüin watta naalii anoujashii, alatüshii suulia 500 anoujashii (1 Corinto 15:6).
Nnojoliishii eimmolojooin na nikirajüinkana Jesuu naküjapa sünain süsoʼiraain naaʼin Jesuu nüchikuaʼa. Naküjüinya tia namüin na oʼutakana naaʼin Jesuu. Naaʼinrüin tia na nikirajüinkana Jesuu mayaainjeʼe eein süpüla müliain naya atumawaa jee noʼutünüin aaʼin saaliijee tia (Aluwataaushikana 4:1-3, 10, 19, 20; 5:27-32). Nnojotsüje naaʼinrüin tia müleka nnojoireje nüsoʼiraain aaʼin Jesuu nüchikuaʼa. Süka nanoujain na wayuukana sünain shiimain nüsoʼiraain aaʼin Jesuu, wainma wainma müshii na oushikajaakana süchiirua nukuwaʼipa Jesuu.
Tü nüküjakat Mateo süchiki nuʼutünüin aaʼin Jesuu jee nüsoʼiraain aaʼin, shiimain, nnojotsü alawaain. Akaataajaʼa tü nüküjakat Marcos, Lucas otta Juan. Pikirajaale sünain tü naküjakat naya wayuukana nüchiki Jesuu, piʼreerü sünain shiimain tü namakat. Punoujaleejeetpejeʼe anain tia pütüjaale saaʼu jamüin makaʼa nukuwaʼipa Jesuu. Joʼu wekirajaai sünain tia.
^ püt. 7 Wanee wayuu ashajakai nüchiki Jesuu nia Tácito, joʼuushi nia soʼu juyakat 55. Anuu nünüiki nüchiki Jesuu: «Chi Kürisüto münakai natuma na anoujashiikana, aapünaa ekiichi nia nutuma Poncio Pilato suʼunnaa laülaain Tiberio saaʼu süpüshuaʼa tü mmakat Roma». Eetaashi joo waneʼeya ashajakai nüchiki Jesuu, nia Suetonio chi chejeʼewaikai Roma, Josefo chi Judíokai (soʼu nükalia Jesuu) otta Plinio chi jimaʼaikai, chi aluwataakai saaʼu Bitinia (süchikijee juyakat 100).
