Wainma wayuu atüjaweeka saaʼu müleka suʼwanajaanüle tü pütchi nüshajiralakat Maleiwa. Anuu tü nümakat chi aluwataaushikai Pedro süchiki tü Nünüikikat Maleiwa: «Ayateeria sünain shiimüin süpüla kaʼikat süpüshuaʼa» (1 Pedro 1:24, 25). ¿Jamüsü watüjaaka saaʼu ayatayülia suluʼuin tü Wiwüliakat süchiki tü kasa anasü naaʼinrajatkat Maleiwa mapeena?

Süka pülashin maʼin Maleiwa, eesü süpüla ayatüin nutuma tü Nünüikikat süpüla kaʼikat süpüshuaʼa sümaa nnojoluin suʼwanajaanüin. Eejana waneinnua ashajülii namaiwajannuu jülüjakana maʼin naaʼin tü naʼyataainkat suulia naʼwanajaain, nasünneʼerüin otta kooʼomüin natuma tü pütchi ashajünakat suluʼu tü Wiwüliakat. Mayaainjeʼe müin natuma, eejana noʼutku naya ashajüliikana notchejaaka ama waneirua kasa.

Wattashaata saalii sukoopiain tü pütchi sümaiwajatkat süpüshi tü nüshajiralakat Maleiwa. Eere wanee pütchi sümaiwajatü naataka tü süküjakat, aʼwanaajineʼennüsü sümaa wane süpüla sütüjaanüin saaʼu pansaale tü sümakat. Pütüjeerü sooʼomüin, paashajeʼera tü pütchikat: «¿Se ha cambiado o manipulado la Biblia?» suluʼusü shia jw.org.

Jülüjataa waaʼin tü rooyo sümaiwajatü chajatkat mar Muerto, nanta anainrü shia waneinnua wayuu kanüliakana Beduinos soʼu juyakat 1947, suluʼujatü wanee koʼushii pejepünaa sünain mar Muerto. Suluʼu tia rooyokalüirua eesü süpüshi tü pütchi nüshajiralakat Maleiwa alataka suulia 2.000 juya süchikijee süshajünüin. Waneinnua wayuu ekirajaakana süchiirua sukuwaʼipa tü Wiwüliakat, naʼwanaajireʼerüin tü pütchi sümaiwajatkat sümaa tü Wiwülia eekat maaʼutpünaa, ¿kasa nayaawataka aaʼu?

Naashin waneinnua wayuu atüjaakana süpüleerua tü Wiwüliakat, ayatayülia pansaain tü pütchi ashajuushikat sümaiwa sümaa tü Wiwülia eekat maaʼulu. * Süka shikirajaanüin achiirua tü pütchi ashajuushikat sümaiwa, ayaawatüna aaʼu shiainya nünüiki Maleiwa tü pütchi suluʼukat tü Wiwülia eekat maaʼulu. Watüjaa aaʼu nüchajaashaatain sukuwaʼipa Maleiwa süpüla pansaainjatüin wamüin tü pütchi suluʼukat tü Wiwüliakat.

Eesü süpüla waashajeʼerüin tü Wiwüliakat otta wanoujain sünain tü sümakat süka pansaain tü pütchi suluʼukat. Wekirajaa süchiki tü watüjakat nüchiki Maleiwa nakajee na nünüikimaajanakana.