1. ¿Kasa pütüjaaka aaʼu nüchiki chi Kakumalakai kasa süpüshuaʼa?

NANOUJATÜJÜLIIRE na wayuu kachooinkana pia, eeshijaʼa nekirajüle pia nüchiki Jeʼwaa joʼuuiwaʼaya pia. Ekirajünüshi pia sünain niain chi Kakumalakai kasa süpüshuaʼa, sünain anain maʼin nukuwaʼipa otta süchiki tü kasa anasü naapeetkat namüin na wayuukana (Gén. 1:1; Aluw. 17:24-27).

2. ¿Jamüsü nanüiki waneinnua wayuu nachiki na anoujakana sünain eein chi Kakumalakai tü kasakalüirua?

² Wainma wayuu nnojoliika anoujain sünain eein chi Maleiwakai jee nnojoluin nukumajüin tü kasakalüirua. Shia nanoujaka anain eejaʼalaa sümüin tü kasakalüirua sümüiwaʼa. Noʼutku na wayuu anoujakana sünain tia, ekirajaashii suluʼu eʼikülee miyoʼu. Eesüjaʼa naküjale nnojoluin pansaain tü sümakat tü Bibliakat jee malain na wayuu anoujakana sünain eein chi Kakumalakai tü kasakalüirua.

3. ¿Jamüsü wakooʼomüinrüinjatka wanoula?

³ Sutuma wainmain na anoujakana sünain eejaʼalaa sümüin tü kasakalüirua sümüiwaʼa, ¿wainmajeetche waaʼin sünain nnojoluin nukumalain Jeʼwaa tü kasakalüirua? Nnojoleerü wainmajüin waaʼin watüjaale saaʼu kasain wanoujain aaʼujee niain Jeʼwaa Kakumalain kasa süpüshuaʼa. Wasakireʼera waaʼin sünain tüü: «¿Wanoujainche niain Jeʼwaa Kakumalain kasa süpüshuaʼa sünainjee süküjünüin wamüin? ¿Shiataapa sutuma wekirajaain süchiirua tia?» (1 Cor. 3:12-15). Jaʼitainna kakaliainnain waya sünain anoujaa, ayatüinjatü wakooʼomüinrüin wanoula nünain Jeʼwaa. Waaʼinrüle tia, nnojoleerü wanoujain naʼalain  na ekirajakana sünain alawaain tü sümakat tü Bibliakat (Col. 2:8; Heb. 11:6). Sünain ekirajaayakat tüü, wekirajaajeerü anain jamüin wainmaka wayuu manoujainka sünain eein chi Kakumalakai kasa süpüshuaʼa, tü waaʼinrajatkat süpüla wakooʼomüinrüin wanoula nünain Jeʼwaa chi Kakumalakai waya otta tü waaʼinrajatkat süpüla ayatüinjatüin ichein wanoula nünain.

4. ¿Jamüsü sukuwaʼipa tü anoujaakat saashin Hebreokana 11:1?

⁴ Saashin soʼutku wayuu, kanourale wanee wayuu nnojotsü choʼujaain nütüjaainjatüin saaʼu shiimainrejeʼe wanee kasa. Naatapejeʼe tü sümakat tü Bibliakat süchiki tü kanoulaakat (paashajeʼera Hebreokana 11:1, TNM). Mayaainjeʼe nnojolin weʼrüin Jeʼwaa nümaa Jesuu, eesü tü kasa wanoujakalü aaʼujee eein naya. Akaataajaʼa tü Sukuwaʼipakat Aluwatawaa nutuma Maleiwa, eesü tü wanoujakalü aaʼujee eein shia (Heb. 11:3). Anuu nünüiki wanee wawala cientiifico: «Nnojoishii anoujain süpaʼa mma na aküjaliikana pütchi nüchiki Jeʼwaa jee nnojotsü mojushiin namüin tü nountakat na cientiificokana».

5. ¿Jamüsü wainmaka wayuu manoujainka eein chi Kakumalakai kasakat süpüshuaʼa?

⁵ Müleka shiimainrejeʼe eein chi Kakumalakai kasa süpüshuaʼa, ¿jamaka wainmaka wayuu manoujainka sünain tia? Shia süka nnojoluin nekirajaain süchiirua müleka shiimainre eein chi Kakumalakai kasa süpüshuaʼa. Anuu nünüiki wanee wawala, Robert nünülia: «Nnojotpuʼusü tanoujain eein chi Kakumalakai kasa süpüshuaʼa süka nnojoluin shikirajünüin anain tia suluʼu takoleejiase. Waneʼereʼeya tanoujain sünain tia wanaa sümaa 22 touyase. Nekirajüin taya sünain tia na aküjaliikana pütchi nüchiki Jeʼwaa sükajee tü Bibliakat. Tayaawataka saaʼu pansaain maʼin nanüiki jee shiimain tü  namakat». * (Paashajeʼera tü pütchikat « Wanee pütchi namüinjatü na kachonshiikana»).

6. ¿Jamüshii eeka waneinnua wayuu nnojoliikana anoujain sünain eein chi Kakumalakai kasa süpüshuaʼa?

⁶ Eeshii na nnojoliikana anoujain sünain wanee kasa nnojotka neʼrüin. Müsüjeseʼe nnojoluin nanoujain sünain eein chi Kakumalakai kasa süpüshuaʼa süka nnojolin neʼrüin nia. Eepejeʼe waneirua kasa nanoujaka anain mayaainjeʼe nnojoluin neʼrüin shia, maʼaka saaʼin tü joutaikat. Saashin tü Bibliakat, tü kanoulaakat shia «shiimainre wamüin wanee kasa mayaainjeʼe nnojoluin weʼrüin shia» (Heb. 11:1, TNM). Ekirajaainjana waya süchiirua wanee kasa süpüla watüjaain saaʼu jamüin wanoujaka aaʼujee shia süpüla pansaainjatüin shia wamüin. Wainmapejeʼe na wayuu akulajaakana aaʼin sünain ekirajawaa süchiirua tü nanoujakalü anain. Nnojoire nikirajaain wanee wayuu süchiirua jamüin nunoujaka sünain wanee  kasa, eeshijaʼa süpüla nnojolin nunoujain sünain eein chi Maleiwakai.

7. ¿Jamüsü watüjaaka saaʼu eein süpüla nanoujain na ekirajaakana suluʼu eʼikülee miyoʼu niain Maleiwa kakumalain kasa süpüshuaʼa?

⁷ Nayaawata aaʼu waneinnua cientiifico niain Maleiwa Kakumalain tü kasa chakat iipünaa süka nekirajaain süchiirua tia. * Eeshii wainma wayuu maʼaka naaʼin Robert, chi wachuntayüikai anülia paalapa, nnojoliikana anoujain sünain eein chi Kakumalakai tü kasakalüirua süka nnojoliin nekirajünüin sünain tia suluʼu tü eʼiküleekat miyoʼu. Wainmapejeʼe na cientiifico anoujakana nünain Jeʼwaa sümaa alin nia napüla. Maʼaka naaʼin naya cientiificokana, wakooʼomüinrüinjatü wanoula nünain Jeʼwaa jaʼitainna nnojoliin koleejiain waya. Waaʼinrajatü tia waneʼewai wakua.

8, 9. (1) ¿Kasa wekirajaainjatka anain jooluʼu? (2) ¿Jamüsü anaka pikirajaale süchiki tü kasa nukumalakat Maleiwa?

⁸ ¿Kasa waaʼinrajatka süpüla wakooʼomüinrüin wanoula nünain chi Kakumalakai kasa süpüshuaʼa? Wekirajaa sünain pienchisü kasa eeka süpüla waaʼinrüin.

⁹ Wekirajaa süchiki tü kasa nukumalakat Maleiwa. Eesü süpüla pükooʼomüinrüin punoula nünain Maleiwa pikirajaale süchiki sukuwaʼipa mürüt, tü wunuʼukalüirua jee tü jolotsükalüirua (Sal. 19:1; Is. 40:26). Pikirajaale maʼin süchiirua tia, kooʼomüinjeerü punoula nünain Jeʼwaa sünain niain chi Kakumalakai kasa süpüshuaʼa. Suluʼu tü karaloʼutairua wamaʼanakat, eesü pütchiirua aashajaaka süchiki tü kasa nukumalakat Maleiwa. Anasü pikirajaale sünain tia jaʼitairü müin kapüleekai shia saaʼin pümüin. Otta müsia, anasü püchajaale suluʼu tü paajinakat jw.org tü videoirua ojuʼitakat sünain tü outkajawaa miyoʼu apünüinkat kaʼi eere shiiʼiyatünüin tü kasa nukumalakat Maleiwa.

10. Püküja wanee sukuwaʼipa wayaawataka aaʼu eein chi Kakumalakai kasa süpüshuaʼa (Roma 1:20).

¹⁰ Jülüja paaʼin tü akuwaʼipaa jaʼyakat naaʼu Maleiwa sünainjee tü kasa nukumalakat (paashajeʼera Roma 1:20). Jülüjataa waaʼin nukuwaʼipa chi Kaʼikai, choʼujaasü naaʼayula wamüin. Ayuuijeenapejeʼe waya sutuma sülanaʼaleere tü naaʼayulakat. Süpüla nnojoliin ayuulin waya eesü wanee kasa müsü aka saaʼin wanee kuluulu arülasü wayaataka iipünaa suulia sülanaain süpüshuaʼa naaʼayula chi Kaʼikai, ozono münüsü tia. Sünainjee tia, wayaawata aaʼu kekiin maʼin chi Kakumalakai shia sümaa aipüralin maʼin nia wayuu.

11. ¿Kasa paaʼinrajatka süpüla pükooʼomüinrüin punoula nünain Maleiwa sünain niain chi Kakumalakai kasa süpüshuaʼa? (Paashajeʼera tü pütchikat « Tü akatsüinreetkat wanoula»).

¹¹ Püchajaale suluʼu Índice de las publicaciones Watch Tower (alijunaikiruʼusü) jee shiale suluʼu jw.org süchiki tü kasa nukumalakat Maleiwa, puusüteerü anain wainma pütchi akooʼomüinreetka punoula nünain Maleiwa. Eeshi pikirajaweere palajana sünain tü karaloʼutairua jee shiale pünajüin tü videokalüirua eere sümüin «¿Akumajaasüche kasa sümüiwaʼa? ¿Eetaapa chi Kakumajalakai shia?». Tia videokalüirua süchikimaajatü shia sukuwaʼipa mürüt jee waneirua kasa nukumalaka Maleiwa. Otta müsia, eesü waneirua pütchi aküjaka süchiki tü naaʼinrakat na cientiificokana süpüla nashatüin sukuwaʼipa tü kasa nukumalakat Maleiwa.

12. ¿Kasa jülüjainjatka waaʼin wekirajaapa sünain tü Bibliakat?

¹² Wekirajaa sünain tü Bibliakat. Chi cientiifico waküjakai achiki paala suluʼu pütchika 4,  nnojoipuʼushi nia anoujain sünain eein chi Kakumalakai kasa süpüshuaʼa. Anuu nünüiki: «Nnojoishi kanoulain neʼe taya nünain Maleiwa sünainjee tü kasa tekirajaakalü achiirua, kanoulashia taya süka tekirajaain maʼin sünain tü Bibliakat». Mayaainjeʼe eein süpüla pansaain pümüin tü kasa pütüjaakalü aaʼu süchiki tü Bibliakat, ayatüinjachia pia ekirajaain sünain süpüla pükooʼomüinrüin punoula nünain chi Kakumalakai kasa süpüshuaʼa (Jos. 1:8; Sal. 119:97). Pikirajaapa sünain tü Bibliakat jülüjainjatü paaʼin jamüin pansaaka tü sümakat süchiki wanee kasa alatüitpaka, süchiki tü alatüinjatkat otta jamüin wanaawaka tü aküjünakat suluʼu. Paaʼinrüle tia, katchinjeerü punoula sünain niain Maleiwa kakumalain waya jee kekiin maʼin nia sümaa alin waya nüpüla. Otta piyaawateerü aaʼu niain Maleiwa kashajiralain tü Bibliakat (2 Tim. 3:14; 2 Ped. 1:20, 21). *

13. Püküja wanee pütchi jalouika suluʼujee tü Bibliakat.

¹³ Paashajeʼerapa tü Bibliakat, jülüja paaʼin jamüin jalouika tü sümakat. Süküjatüjülia tü Bibliakat mojeerüin nukuwaʼipa wanee wayuu kachiiruale naaʼin washirüü (1 Tim. 6:9, 10; Prov. 28:20; Mat. 6:24). Ayatayülia jaloulin wamüin pütchikat tia. Anuu sünüiki wanee karaloʼuta aashajaaka süchiki nakuwaʼipa na wayuukana maaʼulu: «Eeshii na wayuu kachiiruakana aaʼin kamaʼanaa wainma kasa shiiʼiree talatüin naaʼin. Mojupejeʼe naaʼin, shapaasü naaʼin otta jooshii naya süpüla ayuulii». Makalaka anain maʼin tü sümakat tü Bibliakat suulia kachiiruain waaʼin washirüü. ¿Sotusüche paaʼin wane pütchi jalouijeetka pümüin suluʼuka tü Bibliakat? Jülüjale waaʼin anain maʼin tü süchiaakalü oulia waya tü Bibliakat, wayaawateerü aaʼu keeʼireein naaʼin Jeʼwaa anainjatüin wakuwaʼipa (Sant. 1:5). Talateetkalaka maʼin waaʼin sutuma tia (Is. 48:17, 18).

14. ¿Kasa pütüjaweetka aaʼu nüchiki Jeʼwaa pikirajaale sünain tü Bibliakat?

¹⁴ Pikirajaa sünain tü Bibliakat süpüla piʼraajüin nukuwaʼipa Jeʼwaa (Juan 17:3, TNM). Paaʼinrüle tia, piʼraajeerü tü nukuwaʼipa jaʼyakat maʼin sünain tü kasa nukumalakat. Piyaawateerü maʼin saaʼu shiimain eein nia (Éx. 34:6, 7; Sal. 145:8, 9). Pikirajaale nüchiki Jeʼwaa kanouleechi maʼin pia shiʼipaʼaya, aijeechi maʼin nia püpüla jee aleeweechi maʼin pia nümaa.

15. ¿Kasa piʼreetka sünainjee pikirajüin wayuu nüchiki Maleiwa?

¹⁵ Pikiraja wayuu nüchiki Maleiwa. Kooʼomüinjeerü maʼin punoula paaʼinrüle tia. ¿Jameerü pünüiki nümüin wanee wayuu asakirakai pia shiimainre eein chi Maleiwakai? Nnojorüle pütüjaain maʼin saaʼu tü pünüikinjatkat nümüin, pikirajaa sünain tü karaloʼuta wamaʼanakat aashajaaka süchiki tia jee pikiraja chia wayuukai süka tia (1 Ped. 3:15). Eesü süpüla puchuntuin kaalinwaa nümüin wanee wawala kakaliaichikai anoujain. Jaʼitairü nnojoluin naapaain chia wayuukai sümaa tia pütchikat, ayateeria akatchinraain punoula süka pikirajaain sünain tia. Akaʼaya pia, nnojoleechi nemeejüin pia na wayuu ekirajakana nnojolin eein Maleiwa.

16. ¿Kaseetche alataka wamüin nnojorüle wakatchinrüin wanoula?

¹⁶ Jaʼitainna kakaliainnain waya sünain anoujaa, choʼujaasia wakatchinrüin wanoula nünain Jeʼwaa. Nnojorüle eejüin waaʼin amalajaweerü wanoula. Soto waaʼin: tü kanoulaakat shia shiimainre wamüin wanee kasa mayaainjeʼe nnojoluin weʼrüin shia. Jamüshiijaʼa waya, motomaatüsü waaʼin wanee kasa nnojorüle weʼrüin shia. Nüküjainjeseʼe Pablo iseerüin wachiki woonooin sümaa nünüiki Maleiwa manourale waya (Heb. 12:1). ¿Kasa waaʼinrajatka suulia sümalajaain wanoula? (2 Tes. 1:3).

17. ¿Kasa katsüinjeetka atuma wanoula?

 ¹⁷ Masütaajuinjana waya sünain achuntaa nümüin Jeʼwaa chi naaʼinkai. Choʼujaasü waaʼinrüinjatüin tia süpüla kanoulainjanain waya (Gal. 5:22, 23). Nnojorüle wachuntuin nümüin Jeʼwaa chi naaʼinkai, nnojoleerü katsüin wanoula nünain. Naapeerü wamüin Jeʼwaa chi naaʼinkai wachuntule shia nümüin (Luc. 11:13). Eesü süpüla müin wanüiki nümüin: «Anakaja müleka pükaaliijüle waya süpüla kooʼomüinjatüin sütsüin tü wanoulakat» (Luc. 17:5).

18. Saashin Salmo 1:2, 3, ¿kasa eeka süpüla waaʼinrüin?

¹⁸ Ayata wekirajaain wamüiwaʼa sünain Nünüiki Maleiwa (paashajeʼera Salmo 1:2, 3). Wanaa sümaa süshajünüin tia Salmokot, palitchon na israeliita kamaʼanakana sükoopiase tü Pütchi Ashajuushikat. Naya kamaʼanakana tia, na aluwataashiikana jee na sacerdootekana. Sülatapa akaratshi juya aashajeʼennawalinjatü tü Pütchi Nüchikimaajatkat Maleiwa namüin na tooloyuukana, na jieyuukana, na tepichikana otta na wayuu wattajeʼewaliikana (Deut. 31:10-12). Nükalioʼu Jesuu, palitchon na wayuu kamaʼanakana tü Pütchi Nüchikimaajatkat Maleiwa otta anaajaanapuʼusü shia suluʼu tü ekirajüleekat na judíokana. Naatapejeʼe maʼin sukuwaʼipa maaʼulu, watta maʼin saalii wayuu kamaʼanaka tü Bibliakat. ¿Kasa waaʼinrajatka süpüla kojutuin tia wamüin?

19. ¿Kasa waaʼinrajatka süpüla katsüin wanoula?

¹⁹ Kojutusü wamüin tü Nünüikikat Maleiwa waashajeʼerüle shia waneepia. Nnojotsü anain waashajeʼerüle shia eepa kaʼi wapüla. Katsüinjeerü wanoula müleka waashajeʼerüle jee wekirajaale sünain tü Bibliakat waneepia.

20. ¿Kasa ayatüinjatka waaʼinrüin?

²⁰ Nnojotsü wanaawain wakuwaʼipa namaa wayuu eekai naʼwaataain suluʼu natüjain maʼin naashin, süka jamüin, wanoujain sünain tü Nünüikikat Maleiwa (Mat. 11:25, 26). Sutuma wekirajaain sünain tü Bibliakat, wayaawata aaʼu jamüin mojuka sukuwaʼipa tü mmapaʼakat otta tü naaʼinrajatkat Jeʼwaa süpüla nunouteʼerüin shia. Ayataʼaya wakatchinrüin wanoula jee wakaalinja wayuu süpüla kanoulainjatüin nünain chi Kakumalakai kasa süpüshuaʼa (1 Tim. 2:3, 4). Waʼatapajüin maʼin tü kaʼikat eeinjatüle sümüin wayuu süpüshuaʼa tü sümakat Alateetkat Mapeena 4:11: «Alanaʼaleeshia maʼi pia [Maleiwakalee] sünain anain je sünain pülashin, süka piainjaʼa kakumalain kasakat süpüshua».