¿Joujaleena kettaaka waya suulia aküjaa tü pütchi anakat maʼin?

Anuu tü nümakat Jesús: «Aküjüneerü sainküin mma tü pütchi anakat maʼin süchiki nuluwataainjachin Maleiwa süpüla saapüinjatüin shia wayuu maʼleekalia. Kettaapa tia, anteerü sükalia süpüla sajaʼlajaainjatüin tü kasa alatakat sainküin mma» (Mat. 24:14). Ashajünüsü suluʼu tü wetsiikulokot 6, 13 otta 14 tü pütchikat télos suluʼukat griego, tia maluʼulu sajaʼlajaainjatüin tü kasa alatakat sainküin mma soʼu Armagedón (Apoc. 16:14, 16). Wayaawata aaʼu sutumajee tia waküjeenain maʼin tü pütchi anakat maʼin süpülapünaa süntüin Armagedón. Tüü shia wanee kasa jeketü apansaajünakat.

Wayaawatapuʼu aaʼu kettaʼaleeinjatüin aküjünüin tü pütchi anakat maʼin sajaʼttinnaleepa Babilonia tü kojutukalü atumawaa jee suʼttapa tü kaʼi shiʼrüinjatkat maʼin oʼu wayuu müliaa (Apoc. 17:3, 5, 15, 16). Wayaawatapuʼu aaʼu kettaain «tü juya eeinjatkalü oʼu anaa nutuma Maleiwa» suʼttapa tü kaʼi shiʼrüinjatkat maʼin oʼu wayuu müliaa (Is. 61:2). Jülüjapüʼüsü waaʼin nayain neʼe oʼttaainjanain na jüüjüükana waneepia nümüin Jehová süpülapünaa suʼttuin tü kaʼi shiʼrüinjatkat maʼin oʼu wayuu müliaa. Jülüjapüʼüsü waaʼin müinjanain naya maʼaka naaʼin na judío oʼttaakana soʼu sajaʼttinnüin Jerusalén soʼu juyakat 607 Sü.W., aneekünatüjülii naya süpüla noʼttaainjanain süka naʼwaajüin Jehová otta nayoutuin naaʼinrüin kasa mojusü (Ezeq. 5:11; 9:4). Nnojotpejeʼe pansaain tia sümaa tü nümakat Jesús suluʼu Mateo 24:14, nüküjain Jesús yala eein süpüla saapaain wayuu sümaa tü pütchikat süpülapünaachon süntüin Armagedón.

Sutuma wayaawatüitpain saaʼu tü sümakat Mateo 24:14, aʼwanajaasü tü jülüjapuʼukat waaʼin süchiki tü shiʼichiise juya miyoʼuyuukat maʼin aküjünaka suluʼu Apocalipsis 16:21. Sünainjee tü piamasü pütchi wekirajaaitpakalü anain wayaawata aaʼulu eejeenain wayuu aapaweekana sümaa tü pütchi süchiki nuluwataainjachin Maleiwa otta eejeenain na ayoutakana tia. Nüküjain chi aluwataaushikai Pablo müin tü pütchi anakat maʼin maʼaka saaʼin «seejuu wanee kasa kaluʼuka outaa namüin na wayuu ajaʼttinnajanakana jee müsü aka seejuu wanee kasa kaluʼuka kataa oʼuu namüin na wayuu oʼtteʼennajanakana» (2 Cor. 2:15, 16). Nayoutuin tia pütchikat naya wayuukana süka sütüjaanüitpain saaʼu tü kasa mojusü naaʼinrakat, süka niain Satanás aluwataain naaʼu jee alüʼütsü süpüla najaʼttinnüin (Juan 7:7; 1 Juan 2:17; 5:19).

Aküjünüsü suluʼu Apocalipsis 16:21 miyoʼuyuujeerü maʼin shiʼichiise juya ojunuujaajeetka. Eesüjaʼa süpüla shiyaawasein tia süküjünapa pütchi süchiki nünülia Jehová soʼu tü kaʼi shiʼreetka oʼu wayuu müliaa (Ezeq. 39:7). Süchikijee sajaʼttinnüin Babilonia tü kojutukalü atumawaa eejeena na wayuu aapaweekana tü pütchi anakat maʼin, jama meerüin shia maʼaka saaʼin wanee kasa jemetakat eejuu. Eesüjaʼa soteerüle naaʼin waküjapuʼuin maʼin tü pütchikat süchiki sajaʼttinnajatüin tü iküleesia ekirajakalü alawaa.

Meematsü aka saaʼin tü alataka chayaa Egipto wanaa sümaa nuluwataain poloosü kasa mojusü Jehová nooʼomüin na egipciokana süpüla süsalainjatüin naainjala namaleiwase na egipciokana. Soʼu tia, oʼunushii namaa na israelitakana watta naalii wayuu naatakana oumain süpüla naʼwaajüin Jehová (Éx. 12:12, 37, 38). Eeshiijaʼa noʼunule naya wayuukana namaa na israelitakana sükajee neʼrüin shikeraajüin tü nümakat Jehová süchiki nuluwataainjatüin poloosü kasa mojusü nooʼomüin na egipciokana.

Na wayuu aneekakana naʼwaajüin Jehová süchikijee sajaʼttinnüin Babilonia tü kojutukalü atumawaa meerü nakuwaʼipa maʼaka saaʼin sukuwaʼipa anneerü jee akaalinjüneena na anoujashii chainjanakana iipünaa natuma (Mat. 25:34-36, 40). Naneeküinjana na wayuukana naʼwaajüin Jehová süpülapünaa süntüin Armagedón jee süpülapünaa nasaajaanüin na anoujashii chainjanakana iipünaa.

Sutuma jeketüin tü kasa apansaajünakat wayaawata aaʼulu alin wayuu nüpüla Jehová jee amülialaasü naaʼin naalin süka nnojoluin süshapajaain naaʼin suulia amüloulin wayuu, «aluʼu shiainjaʼa nücheküin shiyaawajaainjatüin wayuu süpüshuaʼa suulia saainjala» (2 Ped. 3:9).