NNOJOTPUʼUSÜ eein anua eʼejetuui soʼu nükalia Pablo. Süpüla nuʼunajaainjachin wanee wayuu, asakirüinjachi müleka eere wanee anua chisouimaajatü eekai chainjatüin eemüin tü mma nuʼunajatkalü aluʼumüin jee müleka eere süpüla nuʼunüin suluʼu (Aluw. 21:2, 3). Eeshi süpüla noʼotooin chi wayuukai suluʼu tü anuakat jaʼitasü nnojoluin chainjatüin shia eeʼewaire nia. Eepünaale soʼotuin tü anuakat, eeshi süpüla nüsakirüin eere wanee anua chainjatka suluʼumüin tü mma eeʼewaire nia (Aluw. 27:1-6).

Eeʼewaisü kashi nnojotka sujuʼitüin oʼu anua jee müsia nnojotsü yaawain tü oora sujuʼitajatkalü oʼu. Eepuʼushii anuapüʼü nnojoliikana oʼunirüin tü anuakat sünainjee neʼrüin kamünain palaa, nanoujain sünain sülateerüin kasa mojusü namüin. Jamüsüjaʼa suʼttüle tü wüchii kanüliakat cuervo sümaa shiʼyalajüin saaʼu tü anuakat, makatüshii naya, akaʼaya neʼrüle soʼotuin saʼata anua sotpaʼamüin tü palaakat, makatüshii naya. Shia noʼunaka aluʼu müleka anale sukua joutai, jama shiain kakuain atuma anua. Nuʼunajachire wanee wayuu suluʼu anua, chainjachi nia eemüin soʼonule tü anuakat jee naʼatapüinjatü neenajünüin süpüla oʼunaa.

Anuu tü sukuwaʼipapuʼukat sümaiwa naashin Lionel Casson: «Anapuʼusü maʼin sukuwaʼipa natuma na romaanokana tü soʼonulekalü anua, tia suuliajatü yalejewaain nümüin wanee wayuu sünain achajawaa anua neʼejenainjatü müleka nuʼunajaainjachire. Chapuʼusü soʼonule anua eekai saanükü tü süchikat Tíber. Jee suluʼu tü pueulo kanüliakat Ostia, eepuʼusü miichi chaa pülaasapaʼa eere nuwalaajüinjachin wayuu nüsapia süpüla anualuʼuin nia. Wattajeʼewannuu tü anua awalaajünakalü asapia suluʼu tia miichikat. Eepuʼusü tü chainjatkat Narbona [tü kanüliakat Francia maaʼulu], eekai chainjatüin Cartago [tü kanüliakat Túnez maaʼulu], [...] jee suluʼu waneirua. Nuʼunajachire wanee wayuu, asakirüinjachi nia suluʼu tia miichikat müleka eere wanee anua oʼunajatka chaa eeʼewaire nia».

Antamaatüshi wanee wayuu anualuʼule nia, eepejeʼe süpüla najachijain sutuma palaa. Jamüshijaʼa chi aluwataaushikai Pablo, kojuyatua najachijain sutuma palaa (2 Cor. 11:25).