Watta naalii wawalayuu aʼyataakana waneepia nümüin Jeʼwaa oʼunawaikana juyawai sünain tü Ekirajaalee Galaad sutuma Watchtower chaa Patterson (Nueva York). a Sünain ekirajawaakat tüü, ekirajünüshii na wawalayuukana süpüla anaʼleeinjatüin natuma sukuwaʼipa naʼyataain suluʼu tü nupueulosekat Jeʼwaa. Sükajee tü ekirajünakat anain naya, nakatchinreʼerüin naaʼin otta natütüleʼerüin naaʼin na wawalayuukana suluʼu tü outkajaaleekalüirua otta tü Weteetkalüirua sainküin mmakat süpüshuaʼa.

 Sünain tü Ekirajaaleekat Galaad, ekirajünüshii wawalayuu suluʼujeenaka mma naata. Soʼu tü juyakat 2019, sünain tü ekirajaaleekat 147 eejana maʼaka 56 wawalayuu suluʼujeejana 29 mma. Na wawalayuu oʼunakana sünain tü Ekirajaaleekat Galaad, aʼyataashii naya maʼaka Weteliita, misioneero, pürekutsoot pesiaat otta wawalayuu alapalaakana naaʼu na wawalayuukana

 Kakalia süpülapünaa süttüin tia ekirajawaakat nakumajaatüjülin na wawalayuukana tü sukuwaʼipainjatkat. Jamüsüjaʼa Departamento de Viajes de la Central Mundial, shiyaʼlajüin tü boletokot namüin na wawalayuu oʼunajanakana sünain. Sünain tü ekirajawaakat 147 eetaasü maʼaka 1.075 dólares sülia nasapia waneʼewai nakua na wawalayuukana, nasapia noʼunapa jee naleʼejapa. Jamüshiijaʼa waneinnua wawalayuu chejeʼewaliikana Islas Salomón oʼunushii suluʼu pienchisü katünasü süpüla nantüinjanain eemüin tü Ekirajaaleekat Galaad otta apünüinsü katünasü noʼunaka aluʼu naleʼejapa nachikuaʼa nepialuʼumüin. Alatüsü suulia 35.400 kiloometüro noʼunaka naya wawalayuukana otta 2.300 dólares sülia nasapia. Süpüla kasetirainjatüin tü nneetkat, süchajaain Departamento de Viajes jaralin tü boleto eekat jayain. Sükajee wanee programa namaʼanakat na wawalayuukana, nousütüin asapia eekai jayain, sükatalüin eekai jayattatüin sülia otta süchajaain shia soʼu kojuyasü semaana jee jeʼrale kashi süchajaain. Eesü shiyaʼlajüle Departamento de Viajes tü boletokalüirua sükajee tü créditos de aerolínea jee tü millas naapaakat wanee wawala oʼunajaakai pejeewa.

 Wainma na wawalayuukana choʼujaakana amüin wanee visa süpüla noʼunuinjanain chaa Estados Unidos. Akaalinjünüshii na oʼunuinjanakana Galaad sutuma Departamento de Asuntos Legales de la Central Mundial süpüla eeinjatüin namaʼana visa de estudiante. Eetaasü maʼaka 510 dólares oʼunaka süpüla sukumajünüinjatüin tia karaloʼutakat nüpüla wanee wayuu.

 ¿Jamüsü anaka wakuwaʼipa wapüshuaʼa sutuma nekirajünüin waneinnua wawalayuu suluʼu Galaad? Chi wawalakai Hendra Gunawan Laülaashi nia suluʼu wanee Outkajaalee chaa Sureste Asiático. Anuu tü nümakat nüchiki wanee wawala sümaa nuʼwayuuse agraduaajakana suluʼu tü Ekirajaaleekat Galaad: «Nnojoliiwaʼaya nantüin na wawalayuukana, nnojoipuʼushii eein pürekutsoot rekulaat yaʼayaa. Atütülaasü maʼin naaʼin na wawalayuukana süka neʼrüin talatüin maʼin naaʼin na misioneerokana sünain aküjaa pütchi. Eekalaka na aneekakana pürekutsoolüin naya otta müsia mapa, oʼunusü wanee wawala outkajaakat wamaa sünain tü Ekirajawaakat napüla na Aküjaliikana Pütchi».

 Chi wawalakai Sergio Panjaitan aʼyataashi suluʼu tü Weteet chakat Sureste Asiático namaa waneinnua wawalayuu agraduajakana suluʼu Galaad. Müshi nia: «Anashaatasü maʼin tü ekirajünakalü anain na wawalayuukana, nnojoishii nayain neʼe anain akuwaʼipa, anasü wakuwaʼipa wapüshuaʼa nanainjee. Watta saalin kasa ekirajünakalü anain naya. Nnojotpejeʼe yaletayaain naaʼin na wawalayuukana otta nekirajüin na waneinnua tü kasa natüjaka. Sütütülaain waaʼin tü naaʼinrakat na wawalayuukana otta washateein nakuwaʼipa».

 ¿Jalejeekuwat tü nneerü süpülajatkat tia ekirajawaakat? Sünainjeejatü tü nneerü süpülajatkat süküjünüin pütchi sainküin mma. Eesü süsülajünüle tü nneetkat suluʼupünaa donate.jw.org. Sükajee nasülajüliin na wawalayuukana, eesü süpüla sukumajünüin sukuwaʼipa ekirajawaa makalü aka saaʼin tüü.