Watta maʼin naalii na wayuu woutiisakana juyawai, müsüjeseʼe choʼujaain sooʼomüin piichi outkajaalee süpüla nuʼwaajünüinjachin Jeʼwaa. Sutuma tia, alatüsü suulia 2.700 Piichi Outkajaalee otta süpüla aʼyatawaa nümüin Jeʼwaa nakumajüinjatka otta nanouteʼerüinjatka na wawalayuu aʼyataakana suluʼu Departamento Local de Diseño y Construcción. Naaʼinrajatü tia sainküin mmakat süpüshuaʼa soʼujee settienpüroʼu 2019 sünainmüin settienpüroʼu 2020. a

 Kapüleepejeʼe namüin na wawalayuukana nountuin tia sutuma tü ayuuliikat COVID-19. Suulia suttuin tia ayuuliikat nanain na wawalayuukana jee süpüla noonooin sümaa tü namakat na sülaülashiikana mma, jülüjasü saaʼin Comité de Publicación süshawaleʼenüinjatüin waneirua aʼyatawaa. Alatapejeʼe suulia 1.700 Piichi Outkajaalee akumajünaka jee shiale sunouteʼennüin soʼujee settienpüroʼu 2019 sünainmüin settienpüroʼu 2020. Kettaasü tia süpülapünaa süʼttüin tü ayuuliikat. Eesü maʼaka aka saaʼin 100 piichi süpüla aʼyatawaa nümüin Jeʼwaa akumajünaka sainküin mmakat süpüshuaʼa. Waashajaa süchiki piamasü otta süchiki tü kasa anasü neʼrakat na wawalayuukana sutuma sukumajünüin.

 Tü Weteet chakat Camerún. Kakalia maʼin otta joʼuuchonsü maʼin tü Weteet chajatkat Duala otta watta saalii kasa anouteʼennüinjatka sünain. Jülüjasü saaʼin Comité de Publicación, sunouteʼerüinjatüin tia Weteetkat wainma tü kasa aainjünajatkat sünain. otta jülüjasü naaʼin na wawalayuukana nakumajüinjatüin wanee miichi jeketü jee shiale naʼyalajüin wanee süpüla nanouteʼerüinjatüin shia, nnojotpejeʼe shiain naaʼinrüin tia.

 Naapüin achiki na wawalayuukana sukumajünüinjatüin wanee karateet palaajeeruʼu sünain Duala, pejepünaa sünain wanee piichi süpüla outkajawaa miyoʼu. Sükajee tia karateetkat mapüleeinjatü anta Weteetmüin otta anashiijeerü süpüla nantüinjatüin sünain tü kasa choʼujaakat süpüla tü aʼyatawaakat maʼaka saaʼin tü wüinkat otta waneirua kasa. Shiaʼaya choʼujaakat tia namüin na wawalayuukana. Anaka shia namüin na Laülaashii Jülüjakana Aaʼin na Aküjaliikana pütchi sainküin Mma sukumajünüin Weteet suluʼu wanee shiʼipa maa eejatka aluʼu tü piichi süpülajatkat outkajawaa miyoʼu.

 Asakajünüshii waneinnua wayuu süpüla nayainjanain aaʼinrüin waneirua aʼyatawaa. Sutuma müin sukuwaʼipa mayaa, apütaasü kaʼi otta kasetirasü tü nneetkat. Alatüsü suulia piama miyoone dólares apütaakat. Akolojooshii na wawalayuukana suluʼumüin tü Weteet jeketkat süpülapünaa süttüin tü ayuuliikat COVID-19.

 Anaitpa maʼin eere kepiain otta naʼyataain na wawalayuukana suluʼu tü Weteet chakat Camerún. Jülüjasü naaʼin na wawalayuukana niain Jeʼwaa asülajüin tia namüin. Anuu tü nümakat wanee wawala sümaa tü nuʼwayuusekat: «Wakooʼomüinreein waʼyataain nümüin Jeʼwaa otta talatüsü maʼin waaʼin süka yaain waya nutuma».

 Piichi eere süshajünüin pütchi suluʼu tojolabal (México). Waaʼinmaa juya naʼyataain na wawalayuu ashajakana pütchi suluʼu tojolabal suluʼu tü Weteet chakat Centroamérica, pejesü tia sünain Ciudad de México. Tü pueulokot Altamirano otta Las Margaritas shia aashajaanakalü maaʼin aluʼu tü anüikiikat tojolabal, wattasü tia suulia tü Weteet eejanale naya aʼyataain, eetaasü maʼaka 1.000 kiloometüro yalejeechiki. Makalaka motowalin naaʼin na wawalayuukana jamüin maʼin sukuwaʼipa nanüikipala na wayuu aashajaakana tojolabal otta nnojoishii eein wawalayuu kepiakana peje eekana süpüla nakaalinjain sünain akürawaajaa otta ashajaa pütchi suluʼu tia anüikiikat.

 Süneekaka Comité de Redacción nakolojooinjanain na wawalayuukana eere saashajaanüin maʼin tü anüikiikat tojolabal, müshiijeseʼe naʼyalajüin na wawalayuukana wanee piichi jee nanouteʼerüin shia. Anaʼleesia tia suulia sukumajünüin wanee piichi jeketü jee saʼanapajünale.

 Anuu nünüiki wanee wawala aʼyataakai sünain ashajaa pütchi suluʼu tojolabal: «Soʼunnaa tü poloo juya taʼyataakat suluʼu Weteet nnojotsü eejatüin wayuu tapüla eekai naashajaain tojolabal, aluʼuinjaʼa jooluʼu yaashii waya eere saashajaanüin maʼin tia anüikiikat. Yootowaishi taya weinshi sümaa wayuu aashajaaka suluʼu tanüiki, kooʼomüinsü tü pütchi teʼraajakat sutuma tia otta anaʼleeipa maʼin sukuwaʼipa taʼyataainkat sutuma».

 Soʼunnaa settienpüroʼu 2020 sünainmüin settienpüroʼu 2021, anale sukuwaʼipa tü kasakalüirua, akumajüneesü 75 piichi eere süshajünüin pütchi suluʼu naata anüikii jee piichiirua ekirajülee. Eeinjatü aʼyatawaa suluʼu 8 Weteet sainküin mmakat süpüshuaʼa, sümaʼaleʼeya tü piichi akumajünajatkat chaa Ramapo (Nueva York). Alatennüinjatü tü Weteet chakat Argentina otta müsia tü chakat chaa Italia. Alatüsü suulia 1.000 Piichi Outkajaalee choʼujaayütka süpüla sukumajünüin. Eesü 6.000 Piichi Outkajaalee nnojotka anain akuwaʼipa makalaka suʼwanajaanüinjatüin otta 4.000 tü anouteʼennajatkat.

 ¿Jalejeekuwat napüla na Aküjaliikana Pütchi tü nneerü choʼujaakat süpüla tia aʼyatawaakat? Asoutushi chi wawalakai Lázaro González shiʼipajee tia, naʼakashi nia na laülaashii jülüjakana aaʼin tü aʼyatawaakat suluʼu tü Weteet chakat Centroamérica, nüküjain süchiki tü aainjünakat wanaa sümaa sukumajünüin tü piichi eere süshajünüin pütchi suluʼu tojolabal: «Maʼletsesalii na wawalayuukana yaʼayaa, nnojotsüjeʼe süpüla sukumajünüin tü piichi eere süshajünüin pütchi suluʼu tojolabal, nnojoliire wakaalinjünüin natuma na wawalayuukana sainküin maakat süpüshuaʼa. Sükajee nasülajüin nneerü na wawalayuu suluʼujejanakana mmakat süpüshuaʼa eeshii süpüla wajütüin na wawalayuu ashajakana pütchi suluʼu naata anüikii noumainpaʼa na wayuu aashajaakana maʼin tia anüikiikat. Waapüin analuʼut namüin na wawalayuukana süka kamaneein maʼin naya». Wountuin aʼyatawaakat tüü sükajee süsülajünüin nneerü sainküin mmakat süpüshuaʼa süpüla süküjünüinjatüin tü pütchikat. Asülajünawaisü nneetkat tüü suluʼupünaa donate.jw.org.