Namüinjatü na aikana apüla Jeʼwaa otta na kojutukana amüin tü Wiwüliakat:

«Jiyaawateerü aaʼu tü shiimainkat süpüla jujuittüinjanain sütüma suulia achepchiaa», müshi Jesuu (Juan 8:32). Talatüsü waaʼin watüjaapa saaʼu tü shikirajakalü anain tü Wiwüliakat. Anasü maʼin ekirajawaa sünain tü shiimainkat mayaainjeʼe jouluin maaʼulu tü alawaakat (2 Timoteo 3:1).

Nücheküin Jeʼwaa watüjaain saaʼu tü shiimainkat. Süka alin wapüla na wayuukana, waküjeein namüin tü shiimainkat. Eepajaʼa wanee kasa waaʼinrajatka süpüla waʼyataain maʼin nümüin Maleiwa. Jaʼyainjatü saaʼu wakuwaʼipa shiimain kojutuin wamüin tü nümakat Jeʼwaa. Nüküjain wamüin Jesuu wanee sukuwaʼipa süpüla weeʼiyatüin alin wapüla Maleiwa. Müshi nia: «Joonoole sümaa tü taluwataakat anain jia, ayateena jia alin tapüla, maa aka ayatüin alin taya nüpüla chi Tashikai saaʼu toonooin sümaa tü nuluwataakat anain taya» (Juan 15:10).

Aishi maʼin nüpüla Jesuu chi Nüshikai otta naaʼinrüin süpüshuaʼa tü nuluwataakalü anain nia. Washatüle nukuwaʼipa Jesuu, aijeena waya nüpüla Jeʼwaa jee talateerü maʼin waaʼin. Müsü nünüiki Jesuu: «Jütüjaale saaʼu kasakalüirua tüü, talateena jia jaainjale shia» (Juan 13:17, TNM).

Karaloʼutakat tüü, sükaalinjeechi pia süpüla piʼitaain suluʼu pukuwaʼipa tü sümakat tü Wiwüliakat otta süpüla aleewain pia nümaa Maleiwa. Puʼuraajüle nümüin, kooʼomüinjeerü naalin püpüla otta piyaawateerü waneepia paalin nüpüla Maleiwa süpüla eeinjachin pia süpüla kaʼikat süpüshuaʼa (Judas 21).