Jehova Devan hi prithum rochun, munxank dili. Prithum amchem ghor zaun asa. Adanv ani Eve-k hea poilea zoddpeak, Devan sorgar ravunk rochunk nam karonn sorgar ravunk devdutank adinch rochlole. (Job 38:4, 7) Devan poilea munxak, Eden mhunnttlole eke sobit bhagent dovorlo. (Utpoti 2:15-17) Jehovan taka ani tache sonstik, he prithumecher sodankal khuxalkaien jieunk besanv dilem.​—Stotram 37:29; 115:16 vachat.

Survatek, fokot Eden ek sobit bhag asli. Adanv ani Eve-chi sonsot vaddon-choddon, prithum bhorloli Devak zai asli. Tannim ak’khe prithumecho samball korun, ti sobit bhag sonvsarache xime porian vaddoiloli Devak zai asli. (Utpoti 1 :28) He prithumecho kednach nas zauncho nam. Munxakullachem hem ghor sodankall urtolem.​—Stotram 104:5 vachat.

Devan Prithum Kiteak Rochlim? ho viddeo polloiat

Adanv ani Eve-n Jehova Devachi adnea moddli dekhun Tannem tankam tea sobit bhagentlim bhair ghatlim. Ti sobit bhag tannim hogddaili. Ti novean korunk konnacheanuch ghoddona. Bible amkam sangta: “Ho sonvsar Devan noxtteachea hatant dila.”—Job 9:24. ​—Utpoti 3:23, 24 vachat.

Munxakulla passot aplo mull udhex Jehovan soddun dilo kai? Nam! To Sorvpodvedar Dev. Tachem utor kednanch nirfoll zaunchem nam. (Izaias 45:18) Hi prithum novean ek sobit bhag korun, munxakulla passot aplo mull udhex To purnn kortoloch.​—Stotram 37:11, 34 vachat.

Jezu Devacho raza mhunn he prithumecher raj choloitolo tedna hi prithum novean ek sobit bhag zatoli. Armageddon mhunnttlolea zhuzant, Jezu devdutank gheun Devacher add  vetolea sogllea lokancho nas kortolo. Tea uprant Jezu, ek hozar vorsam soitanak, mhunnge Devache khuxe add gel’lea devdutak, bondkhonnint ghaltolo. Jezu, Devachea lokank vatt dakhoun nisonttonnantlean salvar kortolo. Sobit bhag zal’le prithumecher, to lok sasnak khuxalkaien jietolo.​—Prokasovnni 20:1-3; 21:3, 4 vachat.

Dev hea prithumevelea vaittponnacho xevott kedna kortolo? Xevott lagim pavla mhunn dakhounk, Jezun amkam ek “khunna” dilea. Ami khoreaninch ‘kallachea xevottak’ jietat mhunn aiz ghoddtat tea vostum velean kollta. Sonvsarachi poristhiti itli vaitt zalea ki, ti oxich urli zalear munxakullacho nas zaunk xokta.​—Matev 24:3, 7-14, 21, 22 vachat.

Jezu sorgar thaun prithumecher ek hozar vorsam raj choloitolo tedna, to soglle koxtt sompoitolo. (Izaias 9:6, 7; 11:9) Jezu Razach mhunnon nhoi, punn ek iadnik-ui mhunn seva kortolo ani Devacho mog kortoleanchim patkam bhogxitolo. Jezu udhexim, Dev prithumevelem duens, zanntteponn ani moronn kaddun uddoitolo.​—Izaias 25:8; 33:24 vachat.

Devachem Utor palltat tosle lok te sobit bhagent jietole. (1 Juanv 2:17) Jezun, khaltikaiechea lokank sodunk ani tankam Devachi adnea xinkounk, aplea xisank dhaddle. Fuddarak he prithumecher sobit bhagent jieunk Jehova aiz lakh’anim lokank toiar korta. (Zefania 2:3) Jehovachea Sakxeanchea Raj Ghor-ant ieun lok, bore poti–potin ani bore avoi-bapui zaunk xinktat. Bore khobrek lagun, avoi-bapui ani bhurgim, sangata, Devachi bhokti korun aplem jivit sudharunk xinktat.​—Mika 4:1-4 vachat.