5
Dev Abrahamank ani Tachea Kuttumbak Axirvad Dita
Abrahamache sonsotichi udorgot zali, Dev Egyptant Juzek rakhta
EKA DISA tachea chodd mogachea putak koxtt bhogun morchem poddtelem mhonn Jehovah zanna aslo. Utpoti 3:15 hantunt kel’lem bhakit hea sotacho ugddas korta. Tem moronn Devak kitlem khontichem zalem tem to monxakullak sangot kai? Eka bapaik ani tachea putak kitem ghoddlem tachem ek jivem udharon Bible dakoita. Devan Abrahamank tachea mogall putachi Izakachi boli diunk sanglem.
Abrahamank ghott bhavart aslo. Izakachea kullientlen Soddvonndar vo bim ietelem mhonn Devan taka adim bhasail’lem tem ugddas korat. Goroz poddlear Dev Izakak novean jivont kortolo hacher visvas dovrun, Abraham tachem utor pallun aplea putak boli diunk gelo. Punn teach vellar eka Devachea dutan Abrahamank addailo. Jem Abrahamank chodd molachem aslem tem to boli diunk raji zalo dekhun Devan taka xabaski dili ani tea bhavarti monxak portean bhasaunneo dileo.
Uprant Izakak don put asle, Ezau ani Jakob. Jakob, Ezaua sarko nhoi. Jakoban atmik vostunchem moll vollkolem ani taka mozuri mell’li. Devan Jakobachem nanv bodlun Israel dovorlem, ani Israelache 12 put, Israel kulliemche mukheli zale. Punn tem kuttumb koxem ek vhodd raxttr zalem?
Khub ghoddneo ghoddleo. Israelache choddxe put tanchea dhaktea bhavacher Juzecher nattkai korunk lagle. Tannim taka gulam koso vinklo ani taka Egyptant haddlo. Punn tea visvaxi ani kalljivont tornatteak Devan axirvad dilo. Bhirankull oddchonneant astanai, Egyptachea razan, Faroahan, Juzek vinchun kaddlo ani taka vhodd podvi dili. Teach vellar, ek dukoll ailo mhonn orov vinkto haddunk Jakoban aplea thoddea putank Egyptant dhaddle – ani thoim Juzech orovacho karbari aslo! Apli chuk vollkhun ghetlelea bhavam sovem ojeapanim ani umalleanim ektthaim zalea uprant, Juzen tankam bogxile ani sogllem kuttumb Egyptant haddunk manddavoll keli. Tankam ekdom bori zomin dili, thoim tankam vaddonk ani udorgot korunk zatalem. Devan apleo bhasavnneo xarti pavounk oxem ghoddun haddlem mhonn Juze sozmolo.
Egyptant aplea vaddtea kuttumba sangatan, pirai zal’lea Jakoban aplem urlolem jivit sarlem. Bhasail’lem bim vo Soddvonndar aplea puta Judahche kullientlean zolmotolo, ani to ek bolladik raza zatolo mhonn morchea adim tannem kollit kelem. Fuddem thoddea vorsam uprant apunn morchea adim Juzen bhakit kelem ki ek dis Dev Jakobachea kuttumbak Egyptantlean soddoitolo.
