1-2. Jehovachea sevokank koslo boro bhorvonso asa?

BHORVONSO asop khub gorjecho. Aplem kazari jivit iesosvi zatolem, vo aplea bhurgeank borea bolaiken vaddoitolim, vo apunn ek duensa thaun borim zatolim mhunn thoddea lokank bhorvonso asta. Amkam pasun tosoch bhorvonso asta. Amcho bhorvonso itleach vostuncher nhoi, punn ami sasnak jietolim ani amchim mogachim meleant tim fuddarak jivont zatolim mhunn pasun ami bhorvonso dovortat.

² Paulun mhunnttlem: “Borea toxench vaitt munxanchem punorjivontponn astolem mhonn . . . hanv Devacher bhorvanso dovortam.” (Itihas 24:15) Punorjivontponnachea bhorvonxea vixim fokot Paulunuch sangonk na, punn tachea poilim Joban pasun sanglolem. Dev taka aplea iadint dovortolo ani portun jivont kortolo mhunn Jobak khatri asli.—Job 14:7-10, 12-15.

3. 1 Korintkarank odheai 15 vachlolean amkam koxi modot zata?

³ ‘Mel’leanchem punorjivontponn’ Kristanvanchea xikounne modlem ek ‘mullavem sot’ vo ‘mullavi xikounn’ zaun asa. (Heb. 6:1, 2) Paulun punorjivontponna vixim sanglolem tem amkam 1 Korintkarank odheai 15-ant vachunk melltta. Tachea utrantlean poilea-xekddeantlea Kristanvancho bhorvonso ghott zalo astolo. Ani hem ami kitlea vorsam thaun patiet aileant astolim. Tori astana, Pauluchim him utram amcho bhorvonso pasun anik ghott korunk xokta.

4. Amchim mogachim meleant tanchem punorjivontponn zatolem mhunn ami kiteak khatri dovrunk zata?

⁴ Jezuchea purnorjivontponnam vorvim amchim mogachim meleant tim porot jivont zatolim mhunn amkam khatri melltta. Tachem punorjivontponn Paulun Korintkarank sanglolea “xubhvortomanacho” ek bhag zaun aslo. (1 Kor. 15:1, 2) Jezuchea punorjivontponnacher patienant tea Kristanvancho bhavarth nirfoll mhunn tannem sanglem. (1 Kor.  15:17) Tor hea punorjivontponna vorvim fuddarak zatolea punorjivontponnachea bhorvonxeacher amchi khatri ghott zata.

5-6. 1 Korintkarank 15:3, 4-ant sanglam tantuntlean amkam kitem faido zata?

⁵ Punorjivontponna vixim Paulun boroilem tednam, tannem tin sotam sanglim. Tim mhunnttlear (1) “Krist amchea patkam pasot melo,” (2) “Taka nikhipilo,” vo purlo, (3) “Povitr Pustokam pormannem tisrea disa Devan Taka punorjivont kelo.”—1 Korintkarank 15:3, 4 vachat.

⁶ Jezu melo, taka purlo, ani tachem punorjivontponn zalem hem zannam zalolean amkam kitem faido asa? Mesiasak ‘jivea mon’xanche prithumevelo umttun’ kaddttole ani “vaittoveam modem taka somadhi favo” zatoli mhunn Izaias provadean bhakit kelolem. Punn hea vixim Izaiasan anik kitem sanglem? Mesias “somest mon’xanchea patkancho bhar” apnnacher ghetolo mhunn pasun Izaiasan sanglem. Ani hem Jezun aplo jiv bolidan diun kelem. (Iz. 53:8, 9, 12; Mt. 20:28; Rom. 5:8) Tor Jezu melo, taka purlo ani tachem punorjivontponn zalem. Hea vorvim amkam patkantlean ani mornnantlean suttka mellttoli ani amchim mogachim amkam portun mellttolim mhunn bhorvonso melltta.

7-8. Jezuchea punorjivontponnacher bhavarth dovrunk amkam koslim karonnam asat?

⁷ Punorjivontponnacher ami patietolim zalear, poilim ami Jezu punorjivont zalo mhunn manun gheunk zai. Punn Jehovan Jezuk jivont kelo mhunn ami khatren kiteak sangonk zata?

⁸ Jezu jivont zalo tednam zaiteamnim taka polloilo. (1 Kor. 15:5-7) Tantuntlo poilo apostl Pedru (Kefas) aslo mhunn Paulun boroilem. Tea bhair, punorjivont zal’lea Jezuk Pedrun polloilo mhunn xisamnim pasun sanglem. (Lukas 24:33, 34) Toxench, Jezu jivont zalea uprant apostlamnim taka polloilo. Uprant to Galileiant “ekach farak, paixeam-von” chodd bhav-bhoinnink dixtti poddlo. Hea khuxalkaiechea ghoddnne vixim Matev 28:16-20-ant sanglam. Magir ‘Jezu Jakobakui dixtti poddlo’. To chodd korun tacho sovto bhav aslo, zannem Jezu Mesias mhunn adim bhavarth dovrunk naslo. (Juanv 7:5) Punn Jezu punorjivont zalo tem polloilea uprant, toch Mesias mhunn Jakobak khatri zali. Mhotvachem mhunnttlear, sumar 55 K.X.-ant, Paulun hi chitt boroili tednam Jezu porot jivont zala tem pollounk zaito lok aslo. Tor Pauluchea utrancher konnak dubhav aslo zalear tannem tea lokank vicharunk zatalem.   

9. Itihas 9:3-5-ant, Jezuchea punorjivontponna vixim Paulun anik kosli khatri dili?

⁹ Uprant, Jezu Pauluk dixtti poddlo. (1 Kor. 15:8) Paulu (Saulu) Damaskak voitalo tednam tannem punorjivontponn zal’lea Jezucho avaz aikol’lo, ani Jezu sorginchea mhoiment asa tem ek dorxon tannem polloilem. (Itihas 9:3-5 vachat.) Hantuntlean, Jezuchem jivontponn zalam mhunn anik khatri mell’lli.—Itihas 26:12-15.

10. Jezu punorjivont zalo tem Pauluk khatri asli dekhun to kitem korunk pavlo?

¹⁰ Paulun dil’li hi khatri thoddeank khub mhotvachi asli, karonn tannem eka vellar Kristanvank dhumallo dil’lo. Jezuchem punorjivontponn zalam mhunn Pauluk khatri zali tednam tannem dusreank hea vixim xikounk ani khatri diunk khub vavr kelo. Taka marlo, bondkhonnint ghatlo, ani tachem tarum futtlem. Tori astana Jezu melo ani portun jivont zalo hem sot to lokank sangot ravlo. (1 Kor. 15:9-11; 2 Kor. 11:23-27) Taka hea patiennecher itli khatri asli ki hem sot to porgott’ttana moronk pasun toiar aslo. Jezuchea punorjivontponnacher  adlea Kristanvank aslolo bhavarth polloun Jezu jivont zalo mhunn amkam khatri melltta. Ani punorjivontponnacher pasun amcho bhavarth vaddtta.

11. Korintant aslolea thoddeank punorjivontponna vixim kiteak chukichi somzonni asli?

¹¹ Korint, hea Grek xarant thoddeank punorjivontponna vixim chukichi somzonni asli. Ani thoimche lok “mel’leanchem punorjivontponn na mhonn” pasun sangtale. Kiteak? (1 Kor. 15:12) Aten hea anik ek Grek xarant aslole totvgeanim Jezuchea punorjivontponna vixim fokannam kortale. Taka lagon, Korintantle thodde lok pasun ghoddiek oxench chint’tale. (Itihas 17:18, 31, 32) Tea bhair munxam patki dekhun tim mel’lea sarkim asat, ani tim Kristanv zatat ani tankam bhogsonnem melltta tednam tim jivont zatat mhunn ghoddiek thoddim chint’talim. Punorjivontponna vixim tea lokanchem chintop kitem-i asum, tankam punorjivontponnacher bhorvonso naslo zalear tancho bhavarth nirfoll zata aslo. Karonn Devan Jezuk punorjivont korunk naslo zalear, soddvonnechem mol farik zainaslem, ani ami soglim patkich urta aslim. Tor punorjivontponn patienant tankam kainch fuddar na.—1 Kor. 15:13-19; Heb. 9:12, 14.

12. 1 Pedru 3:18, 22-ant sanglolea pormonnem, Jezuchem punorjivontponn poilim zalolea jivontponnam thaun koxem vegllem aslem?

¹² ‘Kristak mel’leantlo punorjivont kelo’ tea vixim Pauluk khobor asli. Ani hem punorjivontponn sogleam-von vortem zaun aslem. Karonn hachea poilim punorjivont zalolim tim prithumeruch porot jivont zal’lim, ani ek-na-ek dis tim porot morchim aslim. Krist “mel’leam modlo malgoddo” mhunn Paulun sanglem. Khoinchea ritin Jezu mel’leantlo sogleam-von poilo punorjivont zal’lo? Jezuk otmik kuddin sogleam-von poilo jivont kelo ani sorgar voitolea modlo to poilo aslo.—1 Kor. 15:20; Itihas 26:23; 1 Pedru 3:18, 22 vachat.

13. Paulun Adanv ani Jezu modem kitem ontor dakhoilo?

¹³ Eka munxachea mornna thaun lak’khanim lokank koxem jivit melltta? Paulu hea prosnacho spoxtt zobab dita. Adanvachea patka udexim munxakullak kitem ailem, ani Kristachea bolidana udexim munxakullak kitem melltta hanchea modlo ontor Paulu somzaita. Paulun boroilem: ‘Eka munxa udexim moronn ailem.’ Adanvan patok kelem tednam tannem apleacher ani aplea sonsticher moronn haddlem. Ani tacho vaitt porinnam ami aiz pasun bhogtat. Punn Devan aplea Putak punorjivont kelo dekhun amkam ek boro fuddar mellonk xokta. Tor Jezu vorvim mhunnche, “eka monxa vorvim mel’leanchem punorjivontponn” zata. Paulun mhunnttlem, “Adanva sovem sogllim mortat, toxench Krista sovem soglleank Dev punorjivont kortolo.”—1 Kor. 15:21, 22.

14. Adanv punorjivont zatolo kai? Somzaiat.

¹⁴ ‘Adanva sovem soglim mortat,’ oxem mhunnttlem tednam Paulu kitem mhunnonk sodhtalo? Paulu soglea munxakulla vixim uloitalo, karonn sogleank Adanva vorvim patok ani opurnntai favo zalea zaka lagon tim soglim mortat. (Rom. 5:12) Dev punorjivont kortolo tanchea modem Adanv ascho na. Adanv poripurnn aslo ani tannem zannam zaun Devachem Utor pallunk na. Tor taka Kristachea bolidanacho faido mellcho na. “Monxacho Put” zankam ‘bokkddio’ mhunn tharaitolo tankam pasun Adanva bhaxen ‘sasnachi khast’ favo zatoli.—Mt. 25:31-33, 46; Heb. 5:9.

15. Dev ‘sogleank punorjivont kortolo’ mhunnttlam tantunt konn mellon asa?

¹⁵ Dhean diat “Krista sovem soglleank Dev punorjivont kortolo” mhunn Paulun sanglem.  (1 Kor. 15:22) Paulun hi chitt sorgar punorjivont zatolea Korintantlea obhixikt Kristanvank boroili. Tea Kristanvank ‘povitr zaunk Devan apoileant ani tankam Jezu Kristak ekvottaun povitr keleant.’ Ani Paulun “Kristachea ekvottant meleant” tanchea vixim sanglem. (1 Kor. 1:2; 15:18; 2 Kor. 5:17) Anik eke chittint Paulun boroilem ‘Jezu bhaxen moron ekach jivachim zaleant tim tachea bhaxen punorjivont zaun ekach jivachim zatolim.’ (Rom. 6:3-5) Jezu otmik kuddin jivont zalo ani sorgar gelo. ‘Kristachea ekvottant aslole’ obhixikt Kristanv pasun teach bhaxen sorgar voitole.

16. Paulun Jezuk mel’leam modem “malgoddo” mhunnttlo tednam to kitem mhunnonk sodhtalo?

¹⁶ Krist “mel’leam modlo malgoddo” mhunn Paulun boroilem. Tachea poilim Lazar ani her, prithumeruch punorjivont zal’le tem khorem. Punn otmik kuddin punorjivont zaun sasnachem jivit mell’lloleam modem Jezu poilo aslo. Paulun Jezuk mel’leam modem “malgoddo” mhunnttlo. Hacho orth, tachea uprant pasun dusrim sorgar punorjivont zatolim mhunn kollon ieta. Tor “Kristachea ekvottant” aslolea apostlank ani her lokank pasun uprant Jezu bhaxen sorgar punorjivontponn mellche asle.

17. “Kristachea ekvottant” asat te sorgar kednam punorjivont zatole?

¹⁷ Paulun Korintkarank hi chitt boroili tednam “Kristachea ekvottant” asloleanchem sorga voilem punorjivontponn suru zaunk naslem. Punn fuddarak oxem zatolem mhunn tannem sanglem: “Sogllim Devan tharail’lea kroma pormannem: poilo, Malgoddo mhonn, Krist; magir, Krist ietolo tednam, Kristachim tim sogllim” (1 Kor. 15:23; 1 Tes. 4:15, 16) Aiz ami Krist “ietolo” tednam vo Kristachea ienneachea vellar jietat. Punn, meleant tea apostlank ani her obhixikt Kristanvank sorgincho inam mellonk ani ‘Jezu bhaxen punorjivont zaun ekach jivachim zaunk’ tachea iennea poriant ravchem poddlem.

18. (a) Sorgar punorjivontponn zalea uprant anik ek punorjivontponn astolem oxem ami kiteak mhunnonk zata? (b) 1 Korintkarank 15:24-26 pormonnem, sorgar kitem ghoddttolem?

¹⁸ Krista sangata sorgar jieuncho bhorvonso naslolea visvaxi Kristanvanchem kitem zatolem? Tankam pasun punorjivontponnacho bhorvonso asa. Sorgar voitolea Pauluk ani herank ‘poilem punorjivontponn’ mellttolem mhunn Bible sangta. (Prok. 20:6) Tacho orth, anik ek punorjivontponn astolem mhunn kollon ieta. Jobak pasun heach  punorjivontponnacher bhorvonso aslo. (Job 14:15) Jezuchea iennea vellar “to sogllea Pordhanancho ani sogllea Odhikariancho ani Podviancho bhosm” kortolo tednam Kristachim tim soglim tachea sangata sorgar astolim. Tea vellar “nimanno dusman moronn” pasun bhosm zatolo. Sorgar punorjivont zaloleank moronn aschem na. Punn heram vixim kitem?—1 Korintkarank 15:24-26 vachat.

19. Prithumer jieuncho bhorvonso asloleank fuddarak kitem mellttolem?

¹⁹ Prithumer jieuncho bhorvonso asloleank fuddarak kitem mellttolem? Tankam Pauluchea utrantlean khatri melltta. Tannem mhunnttlem: “Borea toxench vaitt monxanchem punorjivontponn astolem mhonn . . . hanv Devacher bhorvanso dovortam.” (Itihas 24:15) Vaitt vo onitivont munxank sorgar vochonk mellona. Tor him utram fuddarak zatolea punorjivontponna vixim sangta mhunn kollon ieta.

20. Hea lekhacho obheas kelea uprant punorjivontponnacher aslolo tumcho bhorvonso koso ghott zala?

²⁰ “Punorjivontponn astolem” mhunn dubhavuch na! Prithumer punorjivont zaloleank sasnak jieunk mellttolem. Hi bhasaunni purnn zatoli mhunn tumi khatri dovrunk zata. Tumchim mogachim meleant zalear ho bhorvonso tumkam buzvonn diunk xokta. Krist ani her zannam “ek hozar vorsam raj . . . choloitolim” tednam tim punorjivont zatolim. (Prok. 20:6) Tea bhair, Ek Hozar Vorsachea Razvottkechea poilim tumi melim zalear pasun tumkam punorjivontponn mellttolem mhunn tumi ghott bhorvonso dovrunk zata. Karonn “ho bhorvanso amkam fottoina.” (Rom. 5:5) Ho bhorvonso tumkam ghott korta ani Jehovachi seva kortana khuxalkai haddtta. Punn 1 Korintkarank odheai 15 thaun, amkam anik xikonk melltta. Tea vixim ami fuddlea lekhant polloitolim.