OBHESACHO LEKH 15
GIT 30 Jehova Mhozo Dev, Mhozo Bap ani Ixtt
‘Devak Lagim Sorop Amkam Borem!’
‘Hanv zalear Deva sorxim vo Devak lagim sortam tednam dhadoxi asam.’—ST. 73:28.
KITEM XIKTOLIM
Ami Jehovak anik lagim koxim soronk xoktat, ani oxem kelear amkam kosle faide mellttole?
1-2. (a) Ami konnachea-i lagim lagxilʼli ixttagot zoddunk sodhtat zalear ami kitem korunk zai? (b) Hea lekhant ami kitem xiktolim?
TUJEA eka lagxilʼlea ixtta vixim chint. Tumi ixtt koxe zaunk pavle? Tumi ghoddie sangata vell sarlo astolo. Tannem tuka aplo onnbhov sanglo astolo. Toxench, taka kitem avoddtta ani avoddna tem pasun tuka kollon ailem zait. Tea bhair, tum apnnaunk sodhta tosle sobit gunn taka asat mhunn tuka kollʼllem. Ani tum tujea ixttacho mog korunk pavlo.
2 Ami konnachea-i lagim amchi ixttagot ghott korunk sodhtat zalear, ami tachea sangata vell sarunk zai. Teach bhaxen, ami Jehovachi vollokh gheun tachea sangata amchi ixttagot ghott korunk sodhtat zalear, ami tachea sangata vell sarunk zai. Tor hea lekhant, ami Jehovachim ixttam koxim zaunk xoktat ani tachim ixttam zalʼlean amkam kosle faide asat tem ami xiktolim.
3. Jehovak lagim sorop kiteak borem hea vixim ami kiteak niall korunk zai? Somzaiat.
3 Jehova sangata ek lagxilʼli ixttagot asop borem mhunn ami zannant. Punn tem kiteak borem tea vixim ami bariksannen chintʼtat tednam ami taka anikui lagim soronk pavtolim. (St. 63:6-8) Udharonnak, dor disa borem jevonn jevop, exercise korop, favo to visov ghevop ani goroz titlem udok pievop borem mhunn amkam khobor asa. Torui zaite lok hacher dhean dinant ani tea pasot tim aplea bholaikechi kallji gheunk pavonant. Punn hem soglem korop kiteak faideachem tea vixim ami jitle chodd pavtti chintʼtat, titlench ami tem korit ravtolim. Teach bhaxen, Jehovak lagim sorop borem mhunn amkam khobor asa. Punn tem kiteak mhotvachem tea vixim niall kelear, ami taka anikui lagim sorot ravonk pavtolim.—St. 119:27-30.
4. Stotr 73-acho boroupi kitem korop borem mhunn zannam aslo? (Stotr 73:28)
4 Stotr 73:28 vachat. Stotr 73-acho boroupi ek Levit aslo, ani taka Jehovachea mondirant songitkar mhunn nemlolo. Tannem zaitim vorsam visvaxiponnan Jehovachi seva kelʼli. Ani ‘Deva sorxim vo Devak lagim sorop,’ borem mhunn to zannam aslo. Tori astana, tea vixim svotak ani dusreank ugddas korop gorjechem mhunn taka dislem. Tor Jehovak lagim sorlolean kosle faide asat?
‘DEVAK LAGIM SORLOLEAN’ KHUXALKAI MELLTTA
5. (a) Jehovak lagim sorlolean amkam kiteak khuxalkai melltta? (b) Mhonnʼnneo 2:6-16 pormonnem, Jehova amkam dita ti zannvai apnnailʼlean amkam koxi modot zata ani amchi rakhonn koxi zata?
5 Jitlim ami Jehovak lagim sortolim, titli amkam anikui khuxalkai mellttoli. (St. 65:4) Kiteak? Hachim zaitim karonnam asat. Ek mhunnttlear, Devachea Utrant asloli zannvai apnnailear amkam faido zata. Hi zannvai amkam vaitt vostum thaun pois ravonk ani gombhir patkam korina zaunk modot korta. (Mhonnʼnneo 2:6-16 vachat.) Tea pasot Bible sangta: “Zannvai ani somjikai mellʼllea, tim monxam subhagi!”—Mho. 3:13.
6. Stotrkar kiteak niraxi zalo?
6 Punn Jehovachim ixttam pasun niraxi zaunk xoktat. Stotr 73-achea boroupeak pasun oxench ghoddlem. Noxttea munxank Devachem poddonuch vochonk na ani te tacheo adnea pallinant, punn tanchem jivit ekdom borem asa mhunn tannem polloilem tednam, to khub ragan bhorlo ani taka tanchi nattkai zali. Toxench hinvsen bhorlole ani gorvixtt munis girest asat, tanchi bholaiki bori asa, ani tankam koslech tras nant oxem to chintunk laglo. (St. 73:3-7, 12) Hem soglem chintun to itlo niraxi zalo ki Jehovachi seva korun kosloch faido na mhunn tannem chintlem. Taka lagon to oxem mhunnonk pavlo: “Nirmoll kalliz gheun boslear kiteak upkarta? Nennttuvaien hat dhulear kitem faido?”—St. 73:13.
7. Ami niraxi astat tednam kitem korunk zata? (Chitr pasun polloiat.)
7 Stotrkar khub niraxi aslo tem khorem, punn aplem chintop bodlunk tannem panvl ghetlem. To “Devachea povitr mondirant gelo” ani thoim tachem chintop sarkem korunk Jehovan taka modot keli. (St. 73:17-19, NW) Ami niraxi astat tednam, amcho lagxilʼlo Ixtt Jehova, amchem dukh bore bhaxen somzota. Ami tache lagim magnnem korunk zata ani to aplea Utra vorvim dita tem margdorxon, toxench bhav-bhoinnam vorvim dita ti modot apnnaunk zata. Hea vorvim, niraxi aslear pasun Jehovachi seva korit ravonk amkam goroz ti ghottai mellttoli, ani khubuch usko zata tednam pasun Jehova amkam xant ravonk modot kortolo.—St. 94:19. a
Stotr 73 boroupi Levit “Devachea povitr mondira mukhar” ubo ravta (Peregraf 7 polloiat)
‘DEVAK LAGIM SORLOLEAN’ AMKAM UD’DHEX ANI BHORVONSO MELLTTA
8. Devak lagim sorlolean amkam anik khoinchea vattamnim faide zatat?
8 Devak lagim sorlolean amkam anik don vattamnim faide zatat. Ek mhunnttlear, amchea jivitant ek udʼdhex asta. Ani dusrem, fuddarak amkam ek ghott bhorvonso melltta. (Jer. 29:11) Hea vixim ami atam anik bariksannen polloum-ia.
9. Ami Jehovak lagim sortat tednam amchea jivitant ek udʼdhex asta mhunn koxem sangonk zata?
9 Ami Jehovak lagim sortat tednam amchea jivitant ek udʼdhex asta. Aiz zaito lok Dev na oxem mhunnttat. Tor munxam hea prithumer kiteak asat tem tankam khobor na. Ani fuddarak ek dis munxam anik aschinch nant, oxem tankam dista. Punn Bible-acho obheas kelolean, Dev “khoroch asa, ani zo konn taka kallzantlean sodhta taka to inam dita” mhunn amkam tacher ghott visvas asa. (Heb. 11:6) Tea bhair, Jehovan amkam tachi seva korunk rochleant. Tor ami toxem kortat tednam ami khorench khuxal astolim.—D.S. 10:12, 13.
10. Apleacher visvas dovortoleank Jehova kitem bhasaita? (Stotr 37:29)
10 Aiz zaitea zannank dista ki kam korop, kazar zavop, bhurgeank zolmak haddop ani zanntteponna pasot poixe ektthaim korun dovrop hoch jivitacho udʼdhex zaun asa. Fuddara pasot Devan kitem bhasailam tem tankam khobor na. Punn Jehova aplea sevokanchi kallji ghetolo mhunn amkam khobor asa. (St. 25:3-5; 1 Tim. 6:17) Jitlim ami tachea lagim sortat, titlo tacher amcho visvas anikui vaddtta. Ani fuddara pasot jem tannem bhasailam tem to purnn kortolo mhunn amkam tacher ghott visvas asa. Toxench fuddarak Jehova amkam anikui zaitim besanvam ditolo, ani ami sodankal tachi seva korit ravonk pavtolim.—Stotr 37:29 vachat.
11. Devak lagim sorlolean amkam anik koslim besanvam mellttat?
11 Devak lagim sorlolean amkam anikui zaitim besanvam mellttat. Udharonnak, ami poschatap kelear Jehova amkam bhogxitolo mhunn bhas dita. (Iz. 1:18) Tor ami adim kelʼlea patkank lagon usko korit ravchi goroz na. (St. 32:1-5) Toxench amkam Jehovachem kalliz khuxal korunk pasun sondhi melltta. (Mho. 23:15) Jehovak lagim aslolean anik kosle faide asat tea vixim pasun ami chintunk zata. Tor taka lagim sorot ravonk ami kitem korunk zata tem atam polloum-ia.
AMI KOXIM ‘DEVAK LAGIM SOROT’ RAVONK ZATA?
12. Jehovak lagim soronk tumi kitem-kitem kelam?
12 Bautizm gheunk ani Jehovachim ixttam zaunk ami zaito vavr kela. Ami tache vixim ani Jezu Krista vixim sot zannam zalim, amchea adlea patkancho poschatap kelo, Devacher amcho bhavarth vaddoilo ani tache khuxe pormonnem amchem jivit jieunk khub vavr kelo. Punn ami Devak lagim sorot ravtolim zalear, ami hem soglem korit ravonk zai.—Kol. 2:6.
13. Jehovak lagim sorot ravonk ami khoincheo tin vostu korunk zai?
13 Ami Jehovak lagim sorot ravonk kitem korunk zai? (1) Ami Bible vachun tacher obheas korit ravonk zai. Ami Bible vachtat tednam Deva vixim sot zannam zalearuch puro nhoi, punn tachem chintop ani ami kitem kelʼlem taka zai tem somzoncho proitn korun tem amchea jivitant apnnaunk zai. (Ef. 5:15-17) (2) Dev amcho dor ekleacho khub mog korta mhunn zaite purave asat. Tea vixim niall korun ami amcho visvas ghott korunk zai. (3) Devak jeo vostu avoddnant tancho ami dves korunk zai, ani je lok teo vostu kortat tanchea thaun ami pois ravonk zai.—St. 1:1; 101:3.
14. Jehovak manvota tem korunk ami dor disa kitem korunk zata? (1 Korintkarank 10:31) (Chitram pasun polloiat.)
14 1 Korintkarank 10:31 vachat. Ami Jehovak manvota tem korop khub mhotvachem. Ami fokot mittingek gelear ani porgottnni kelearuch puro nhoi. Ami dor disa koxim jietat tem pasun hantunt mellon asa. Zoxem ami soglea vostumnim promannik asonk zai, ani amche lagim jem kitem asa tem dusreank vanttunk zai. Oxem kelear Jehova khuxal zatolo. (2 Kor. 8:21; 9:7) Toxench, Jehova jiv moladik mhunn lekhta dekhun, ami kitlem khatat vo pietat tacher ami dhean diunk zai ani her vattamnim amchea bholaikechi kallji gheunk zai. Hea toren ami soglea vattamnim Jehovak manvota tem kortat tednam ami taka anikui lagim soronk pavtolim.—Luk. 16:10.
Jehovak manvota tem korunk thoddeo vatto mhunnttlear, samballun driving korop, dusreancho poramos korop toxench exercise korun ani borem jevonn jevun amchi kallji ghevop (Peregraf 14 polloiat)
15. Ami dusream sangata koxim vaglolim Jehovak zai?
15 Jehova nitivont toxench onitivont lokank pasun doia dakhoita. (Mt. 5:45) Ani ami pasun toxench kelʼlem taka zai. Bible sangta ki ami “konnanchem-i nanv piddʼddear korchem nhoi ani zhogddim korchim nhoi . . . ani soglea lokam thaim movallaien vagchem.” (Tit. 3:2) Tor lok Jehovachi seva korinant dekhun ami tankam unnea molachim mhunn lekhchim nhoi. (2 Tim. 2:23-25) Ami sogleam sangata doiallaien vagtat tednam ami Jehovak anikui lagim soronk pavtolim.
AMI CHUKTAT TEDNAM PASUN ‘DEVAK LAGIM SOROT’ RAVONK ZATA
16. Aplea chukim vixim Stotr 73-achea boroupeak koxem bhoglem?
16 Tumchea chukink lagon tumi Jehovak lagim soronk xokonant, oxem tumkam dista kai? Hoi zalear, Stotr 73-achea boroupeacho ugddas korat. Tannem mhunnttlem: “Mhoje pai halonk pavlole, mhojim panvlam nisortat mhonn distalim.” (St. 73:2) Tannem fuddem sanglem ki, Jehova mukhar to “koddu,” “murkh” ani “monzat koso” zalo. (St. 73:21, 22) Punn aplea chukink lagon Jehova aplo mog korchona ani apleak bhogxichona oxem tannem chintlem kai?
17. (a) Stotrkar khub niraxi aslear pasun tannem kitem kelem? (b) Tachea thaun ami kitem xiktat? (Chitram pasun polloiat.)
17 Oxem tannem chintlear pasun, tem fokot thoddeach vella pasot aslem. Karonn to ekdom dukhi aslo tednam, tannem Jehovak lagim soronk zai mhunn taka kollʼllem. Tannem mhunnttlem: “Tori astana Tuje mukharuch ravlom [Jehova], ani Tunvem mhozo uzvo hat ghott dhorloi; atam Tuji budh diun mhaka vatt dakhoi, ani Tujea voibhovant mhaka pavoi.” (St. 73:23, 24) Amcho bhavarth oskot zala oxem dista vo amchea chukink lagon amkam niraxiponn bhogta tednam, ghottai di mhunn ami pasun Jehova lagim magnnem korunk zai. (St. 73:26; 94:18) Ami gombhir chuki kelear pasun, ami Jehova lagim porot ieunk zata ani to amkam “bhogsunk toiar” asa mhunn ami khatri dovrunk zata. (St. 86:5, NW) Toxench ami ekdom niraxi astat tednam Jehovak ami anikui lagim sorop khub mhotvachem zaun asa.—St. 103:13, 14.
Amcho bhavarth oskot zata mhunn dista tednam ami anikui chodd pavtti magnnem korun ani chukonastana mittingek vochon Jehovak lagim sorot ravonk zai (Peregraf 17 polloiat)
AMI SODANKAL ‘DEVAK LAGIM SOROT’ RAVONK ZATA
18. Ami sodankal Jehovak lagim sorot ravonk xoktat mhunn koxem kolltta?
18 Ami sodankal Devak lagim sorot ravonk zata. Karonn tachea vixim xikop kednanch bond zaunchem na. Bible sangta ki Jehovacheo vatto, toxench tachea zannvaiecho ani gineanacho ami “thav lavunk zaina!”—Rom. 11:33.
19. Stotrantlean amkam kitem khatri melltta?
19 Stotr 79:13 sangta: “Ami, Tuji porza, Tunch chorvak vhortai teo xellio, sasnnachea sasnnak Tuka dhinvastoleanv, pinddkeche pindkent Tuji vakhannʼnni kortoleanv!” Tor ami Devak lagim sorot ravtat toxim, to amkam sasnak besanvam ditolo mhunn ami khatri dovrunk zata, ani stotrkara bhaxen oxem mhunnonk zata: “Tum mhojea kallzacho Dev, [“kallzachem Khoddop,” NW] mhojem Daiz sasnnachea sasnnak!”—St. 73:26.
GIT 32 Jehovachi Bazu Gheiat!
a Khubuch usko zata vo zaito temp poriant dukhi astat tankam dotorachi goroz poddot. Anik mahiti zannam zaunk 2023-acho, The Watchtower, No. 1 polloiat.
