Hanv Abril 1951-ant Kenya-chea Nairobi xarant zolmolʼlem. Mhojim avoi-bapui Bharotantlim aslim ani tim Sikh dhormachim aslim. Mhojea bapaik don bailo asleo. Poili bail mhoji avoi asli. Ani mhozo bapui dusre pavtti kazar zalo tednam, mhoji avoi kainch korunk pavonk na. Mhojea avoichim ani sovte avoichim bhurgim borabor vaddlolim. Hanv mhojea bhav-bhoinnam, mhojea sovtea bhav-bhoinnam ani eka cousin-a borabor vaddlem. Ami soglim mellon sat bhurgim. 1964-ant hanv 13 vorsanchem zalem tednam mhozo bapui bhair poddlo.

Sogleank Neai Mellʼllolo Mhaka Zai Aslo

 Hanv vaddot gelem toxem, zaite vad-vivad zatat ani ekleak dusrea poros boro lekhtat tem hanvem polloilem. Uprant hanv Bible xiklem tednam, amchea familichi poristhiti, Leah ani Rakelachea famili sarki asa mhunn mhaka kollʼllem. Amchea Kenya-ntlea chakram sangata amchi famil khub vaitt toren vagtali. Karonn tim unnea molachim oxem amkam xikoilʼlem. Toxench, amchea xezaream modem Europe-achea lokam sangata ami ixttagot kelʼli daddy-k zai aslem. Karonn tanchea koddem amkam xikonk mellttolem mhunn to sangtalo. Punn Afrikechea lokam thaun amkam kainch xikonk mellchem na mhunn sangon, tanchea koddlean to amkam pois ravonk sangtalo. Tea bhair, Pakistan-ache lok amche dusman dekhun tanchea sangata koslench natem dovornakat mhunn to sangtalo. Punn mhojem chintop daddy-chea chintpa poros vegllem aslem. Karonn mhaka konnacheach sangata onʼneai zalʼlo naka aslo.

 Sumar 15-vea xekddeachea xevottak, Guru Nanak-an Sikh dhorm suru kelo. Tachi xikounn mhaka sarki distali dekhun hanvem ti apnnaili. Tantuntli ek xikounn mhunnttlear, ekuch khoro Dev asa. Punn Sikh dhormantlo lok heram sangata onʼneai korta tem polloun, hantunt kitem tori goddbodd asa oxem mhaka dislem.

 Hachea bhair, mhojea monant thodde prosn asle. Sikh dhorm suru zaun sumar 500-inch vorsam zalʼlim. Tor hanv chintʼtalem: ‘Hachea poilim khoincho dhorm aslo? Survatek Devak kosle torechi bhokti manvotali?’ Toxench, amchea ghorant Sikh dhormantlea dha gurunche fottu aslole calendar lailʼle astale. Tankam polloun hanv chintʼtalem: ‘Te khoreponnim koxe distale tem amkam koxem kollʼllem? Hea gurumnim ekleach khorea Devachi bhokti korunk zai mhunn sanglem. Tor amchi famil ani her zannam tea gurunchi bhokti kiteak kortat?’

 1965-ant hanv 14 vorsanchem astana, ami Bharotant gelim. Amchea lagim chodd poixe nasle dekhun, thoim jivit jievop khub kotthin aslem. Sumar ek vorsa uprant, ami England-achea Leicester xarant vochonk chintlem. Punn soglim borabor vochonk amchea lagim title poixe nasle dekhun ami dog-dog zannam korun thoim gelim.

 16 vorsanche piraier, hanv England-ant lhan-vhodd kamam korunk laglem. Ani mhojem xikop kabar zaunk naslem dekhun hanv night school-ak vochonk laglem. Punn thoddea kamdaram sangata onʼneai zatalo tem hanvem polloilem. Zoxem, England-achea lokank bhailea lokam poros chodd pagar mellttalo. Tea pasot, bhailea lokankui England-achea lokank melltta titloch pagar mellonk, hanv tea bailank ektthaim korun morcha kaddunk laglem. Karonn konnacheach sangata onʼneai zalʼlo mhaka naka aslo.

Mhaka Mhojea Prosnanche Zobab Mellʼlle

 Poilech pavtt, 1968-ant, don Jehovachea Sakxeamnim mhojea darar marlem. Devachem Raj ietolem tednam konnacheach sangata onʼneai zauncho na mhunn tannim amkam sanglem. Hem aikon mhaka khub borem dislem. Uprant tanchea modlo eklo, aple bailek gheun amchea ghora porot ailo. Tednam hanv, mhoji bhoinn Jaswinder, ani mhoji sovti bhoinn Chani, Bible obheas korunk laglim. Amche fokot sov odheai zalʼle, punn amkam khatri zali ki Jehovach khoro Dev zaun asa, Bible tachem Utor zaun asa, ani fokot tachea Rajea udexim sogleank neai mellttolo.

 Punn famili thaun amkam khub virodh sosunk poddlo. Mhozo bapui melea uprant, mhozo sovto bhav amchea familint fuddakar gheunk laglo. Tachi avoi tache kan bhortali dekhun, to amcho khub virodh kortalo. Mhojeo dhaktteo bhoinno Jaswinder ani Chani-k, to safety shoes ghalun fonttamnim martalo. Punn hanv 18 vorsanchem asa ani mhaka hokʼk asat mhunn taka khobor asli dekhun, to mhaka hat lainaslo. Punn tim lhan aslim dekhun to tanchea sangata kitem-i korunk xokta mhunn taka distalem. Ek pavtti tannem Bible ugoddlo, taka uzo lailo, ani to tanchea tondda fuddeant vhoron tannem oxem mhunnttlem: “Tumchea Jehovak ho uzo palovunk sangat!” Amkam khoro Dev Jehovachi seva korunk khub itsa asli. Punn amchea poristhitik lagon toxem zaunchench na oxem amkam distalem. Tea vellar, ami lipon fokot ek vo don mittingenk hajir zalʼlim. Tor anik bore toren Jehovachi seva korunk ami ghor soddun vochonk tharailem.

 Jevnna khatir ani bus-in vochonk amkam je poixe mellttale te ami samballun dovortalim. Toxench, mhaka mhozo pagar mhojea sovte avoik diunk poddttalo. Punn tantuntle thodde poixe hanv samballun dovortalem. Uprant ami tin suitcase-i vikteo gheun amchea ghora thaun pois eka zagear lipoun dovorleo. Sovkas-sovkas korun tantunt ami amche kopdde bhorunk laglim. May 1972-ant, Jaswinder sumar 18 vorsanchem zalem. Tea vella meren ami 100 pound (sumar ₹2000) ektthaim kele. Uprant ami ek train dhorun England-achea Penzance xarant gelim. Thoim pavon ami phone booth-antlean thoinchea Sakxeank fon kelo. Tannim amkam khub mogan ieukar dilo. Ghor bhaddean gheunk ani ghor cholounk ami lhan-vhodd kamam korunk laglim. Zoxem nustem uzraupachem vo oslinch dusrim her kamam.

 Ami eka zannttea zoddpea sangata porot Bible obheas suru kelo. Tanchim nanvam aslim, Harry ani Betty Briggs. Uprant, Setembr 1972-ant ami Truro Raj-ghorachea khala aslolea eka lhanxea pool-ant bautizm ghetlo. Ami khoim asat tem amchea ghorcheank azun khobor nasli. Bautizma uprant Chani-n pioneer seva suru keli, ani hanv ani Jaswinder ghor cholounk kam kortalim.

Chodd Goroz Asa Thoim Ami Seva Korunk Gelim

 Bhav Harry ani bhoinn Betty 90 vorsanchim zaunk ailolim. Torui tim chukonastana England-achea doria deger, Isles of Scilly hanga porgottnni korunk voitalim. Tanchi urba polloun amkam-i toxench kitem tori korunk dislem. Uprant hanvem survatek sanglolem toxem, 1973-ant, ami bhav Skinner-ak mellʼllim. Tachea lagim uloun ami khoim vochonk zai tem amkam kollʼllem.

 Janer 1974-ant, ami Bharotantlea New Delhi xarant gelim. Thoim bhav Dick Cotterill-an thoddea vella pasot amkam mixinori ghorant ravonk dilem. Tea vellar Chani niemit pioneer mhunn seva kortalem ani hanv ani Jaswinder porgottnnent chodd vell sartalim.

 Thoddea tempan amkam Punjab vochonk sanglem. Thoim thoddea vella pasot ami Chandigarh-ant eka mixinori ghorant ravlim. Uprant ami eka bhaddeachea flat-ant ravonk gelim. Setembr 1974-ant hanvem pioneer seva suru keli. Ani uprant 1975-ant, mhaka khas pioneer mhunn seva korunk apounnem ailem. Thoim porgottnni korun mhaka kollon ailem ki Punjabi bhaxent prokaxonam asop kitlem mhotvachem asa. Karonn hea udexim choddan-chodd lokank Jehova tancho kitlo mog korta ani to sodanch neai korpi asa mhunn kollttolem aslem. 1976-ant, Bharotachea xakha ofisan amkam tigankui Punjabi bhaxent prokaxonam bhaxantor korunk apoilim. Tea disamnim typewriter vo computer nasle. Tor hem kam korop titlem sompem naslem. Ami hatamnim boroitalim ani tantunt kitem chuk zalea kai mhunn pollounk, checking ani proofreading kortalim. Uprant ami tem chhapunk vhortalim. Tea printery-nt khub pornim printing machine-am aslim. Tor ami thoinchea kamdaram borabor hatamnim ek-ek okxor zagear bosoitalim.

Hanv Khub Duent Zalem, Punn Khuxalkaien Seva Korit Ravlem

 Amchi poristhiti rokddich bodolʼli. Jaswinder eka bhava lagim kazar zalem ani tim Canada-k gelim. Chani Amerikent ravtolea, Germany-ntlea bhava lagim kazar zalem ani tim Amerikent ravonk gelim. Tea vellar hanv khub duent poddlem ani Otumbr 1976-ant hanv porot England-ant gelem. Mhoji avoi ani mhozo bhav Leicester xarant ravtalim. Tim sotacho virodh korinaslim ani tannim mhaka aplea borabor ravonk dilem. Mhaka Evans syndrome nanvachem ek duens zalem, jem khub thoddea lokank zata. Hantunt ek munxachi kudd aplech blood cell piddʼddear korta. Tea pasot, mhaka veg-veglle ilaz korunk poddle. Zoxem, mhozo spleen pasun kaddunk poddlo ani mhaka pioneer seva soddunk poddli.

 Hanvem kallzantlean Jehova lagim magnnem kelem ani taka sanglem ki hanv borem zalem zalear, hanv porot purnn vellachi seva kortolem. Ani hanvem toxench kelem! Hanv modem-modem khub duent poddttalem tem khorem, punn 1978-ant hanv Wolverhampton xarant gelem ani thoim oslea zagear pioneer seva korunk laglem, zoim choddso lok Punjabi bhas uloitalo. Lokank mittingek apounk ami hatamnim mittingechim amontronnam boroitalim ani dukanar vochon tanchi xerox kaddttalim. Uprant tim amontronnam Punjabi bhas uloupi lokank diun ami tankam jahir bhaxonnak apoitalim. Aiz Britain-ant panch Punjabi sobha ani tin grup asat.

 Hanv Bharotant astana, Punjabi bhaxent bhaxantorachem kam kortalem mhunn Britain xakhek khobor asli. Tor tannim mhaka bhaxantorachem kam korunk London Bethel-ant ieunk zata kai mhunn vicharlem. Hanv sumanache thodde dis Bethel-ant vochonk laglem, ani Gurmukhi lipint font ani software toiar korunk modot korunk laglem. Tea vellar hanv khub bizi astalem. Hanv kamak voitalem, pois ravtole mhoje avoik modot kortalem, toxench Bethel-ant kam kortalem. Punn hanv khuxal aslem.

 Setembr 1991-ant, mhaka purnn vellachi seva korunk Bethel-ant apoilem ani amchim prokaxonam Punjabi bhaxent bhaxantor korunk sanglem. Mhaka hi sondhi mellttoli mhunn hanvem chintunk pasun naslem. Karonn tea pasot hanv purtem na oxem mhaka distalem. Toxench, hanv duent aslem ani Bethel-ant ieunk ji pirai asonk zai ti mhoji zaun gelʼli. Torui Jehovan mhaka hi moladik sondhi dili. Hanv khuxalkaien Bethel-ant seva kortalem tem khorem, punn mhojea duensantlean hanv purnn toren borem zaunk naslem. Mhaka chemotheraphy ani her ilaz korunk poddle, ani zaite pavtti rogot gheunchi poristhiti pasun aili. Punn hanv rogot ghenastana borem zatalem tem polloun dotor ojap zale. Tannim mhaka London-achea eka vhoddlea hospital-ant, sumar 40 dotor aslolea eka seminar-ak apoilem. Hanv rogot kiteak ghena tea vixim hanv 10 minttam uloilem. Tea uprant Hospital Information Desk-ant aslolea eka bhavan tanchea prosnanche zobab dile.

 Tea kotthin vellar, mhoji bhoinn Jaswinder ani Chani-in mhaka khub sangat dilo ani mogan mhaka samballʼllem. Bethel-antlea bhav-bhoinnamnim ani her ixttamnim jea toren mhaka tenko dilo, tea pasot hanv tanche khub upkari. Kotthin vellar Jehovan sodanch mhaka xokti dili, jea udexim tachem kam hanv korunk pavlem.—Stotr 73:26.

Jehovachim Besanvam Amkam Girestkai Ditat

 Gelʼlea 33 vorsam thaun hanv Bethel-ant seva kortam. Ani ‘Jehova kitlo boro tem hanv chakun pollounk’ xoklam. (Stotr 34:8, NW; Mhonnʼnneo 10:22) Zannttea bhav-bhoinnanchea udharonnantlean mhaka dhir melltta. Mhojim zaitim Punjabi Bible vidʼdhearthi atam visvaxiponnan Jehovachi seva kortat tem polloun hanv khuxal zatam. Toxench, mhojea famili sangata mhojem natem borem asa. Mhoji avoi ani mhozo bhav Jehovachim Sakxi nant, punn mhoji avoi zaite pavtti oxem mhunntta: “Tum khorench kallzantlean Devachi bhokti korta.” Toxench, mhoje zanntte avoichi kallji gheunk hanv Bethel seva soddunk toiar asam mhunn hanvem sanglem tednam, mhozo bhav mhaka oxem sangonk laglo: “Tum thoinch rav. Karonn tum khub borem kam korta.” Atam mhoji avoi nursing home-ant asa, ani mhojean zata title pavtti hanv tika mellonk voitam.

 Kosle-i kotthin poristhitincho fuddo kortana, hanv monantlea-monant oxem mhunnttam: ‘Kamal, bhienaka. Jehova tuzo ddhal zaun asa. To tuka zaitim besanvam ditolo.’ (Utpoti 15:1) “Neai korpi Dev” Jehovak, hanv khub upkari asam. Karonn hanv lhanuch astana tannem mhojer dhean dilem ani jivitbhor mhaka sogleam-von mhotvachem kam korunk dilem. (Izaias 30:18) Ani hanv tea vellachi vatt polloitam jednam “‘Hanv boro na,’ oxem . . . konnuch mhunnchona.”—Izaias 33:24.