Mika 1:1-16
1 Judache raza Jotham, Ahaz ani Hezekiachea disamnim Moreshethant ravpi Mikak* Jehovacho* sondex mellʼllo. Taka Samaria ani Jeruzalema vixim hem dorxon mellʼllem:
2 “Soglea lokamno, aikat!
Prithum ani ticher aslolim soglim, dhean diat,Jehova aplea povitr mondirant asa.
Akʼkhea Vixvacho Dhoni Jehova thoim thaun tumchea add govai dium.
3 Polloiat! Jehova aplea zagear thaun ieta,To sokol ietolo ani prithume voilea unch-unch zageancher choltolo.
4 Zoxem menn ujea mukhar pigllon voita,Ani udok denvter vhanvta,Toxe dongor tachea paim-am ponda pigllon voitole,Ani falke* futtʼttole.
5 Hem soglem Jakobachea opradak lagon* zatolem,Izraelachea ghoranneachea patkank lagon zatolem.
Jakobachea opradak lagon* konn zobabdar?
Samaria nhoi kai?
Judachea unch-unch zageank lagon konn zobabdar?
Jeruzalem nhoi kai?
6 Hanv Samariek xetantlea fatranche raxi sarko kortolom,Drakxanche molle roitat toslo zago kortolom.
Hanv tiche fator falkeant uddoitolom,*Ani ticheo buniadi ustitolom.
7 Tichea soglea kantoilʼlea murteancho churo zatolo,Xindollki korun tika jim dennim mellʼlleant tim lason voitolim.
Hanv tichea soglea murteancho nas kortolom.
Xindollki korun tinnem jem zoddlam,Tem dusrea xindoll bailanchem zatolem.”
8 Hanv vhoddlean bob marun hoddʼddem boddoitolom ani bhorpur roddttolom,Hanv uktea paim-amnim ani vinglloch bhonvtolom.
Hanv koleam bhaxen kuleo ghaltolom,Ani xohamrugam* bhaxen dukh kortolom.
9 Karonn Samariecho ghavo pekonk xokona,To Juda meren posortolo,Mhojea lokanchea darvonttea poriant, mhunnche Jeruzalema poriant pavtolo.
10 “Gathant hi kollounni korinakat,Ani tanchea mukhar matxe pasun roddonakat,Bethafrant* dhulʼlint lollat.
11 Shafirant ravtoleamno,* vinglle zaun ani loz bhogun poltoddi vochat.
Zananant ravpi* bhair ieunk nant.
Bethezelant bob marun roddtta to avaz aikonk ieta, atam tem tumkam anik tenko diunchem na.
12 Marothant ravpi* kitem tori borem zatolem mhunn as dhorun asle,Punn Jeruzalemachea darvonttea poriant Jehova thaun odruxtt ailam.
13 Lakishant ravtoleamno,* tumcho roth toiar korat, taka ghodde bandat.
Tumchea thaunuch Sionachea dhuvechem patok suru zalem,Karonn tujea bhitor Izraelache oprad mellʼlleat.*
14 Taka lagon, Moreshethgath voita tednam tunvem* taka dennim diunk poddttolim,Izraelachea razank Akzibachea ghoranneamnim fosoilo.
15 Mareshant ravtoleamno,* zoit melloun ghetoleak hanv tujea lagim haddttolom.
Izraelachi mhoima Adulam-a poriant pavtoli.
16 Tumchea opurbaiechea bhurgeam pasot kens tasat ani khoddʼdde zaiat.
Gida* bhaxen khoddʼdde zaiat,Karonn tumchea bhurgeank koidi korun tumchea thaun pois vhortole.”
Footnotes
^ Hem Mikael (hacho orth “Deva Sarko Konn Asa?”) vo Mikaia (hacho orth “Jehova Sarko Konn Asa?”) hea nanvanchem shortt form zaun asa.
^ Ho don dongram modlo sokoilo zago. Inglez bhaxent taka “valley” mhunnttat.
^ Vo “Jakob add gelo dekhun.”
^ Vo “Jakob add gelo dekhun.”
^ Utran utor, “votoitolom.”
^ Inglez bhaxent taka “ostrich” mhunnttat.
^ Vo “Afrachea ghorant.”
^ Utran utor, “ravta ti.”
^ Utran utor, “ravta ti.”
^ Utran utor, “ravta ti.”
^ Utran utor, “ravta ti.”
^ Vo “Izrael add gela.”
^ Mhunnche, Sionachea dhuven.
^ Utran utor, “ravta ti.”
^ Hea utrak uzar kelʼlea Hebrev utracho orth ghonn pasun zaunk xokta.
