“Au Sega ni Kila Vinaka na Kalou”

“ENA yabaki sa oti, era dau sikovi au mai na iVakadinadina i Jiova mera mai wasea na itukutuku uasivi me baleta na Matanitu ni Kalou. E walu na yabaki na noqu lotu Katolika voli mai, ia au sega ga ni kila vinaka na Kalou. Ia, ena loma ni yabaki ga oqo sa levu sara na ka au vulica,” e vola e dua na turaga e tiko mai Kerala e Idia. E tomana: “Au marau niu kila ni sa tabaki tiko Na Vale ni Vakatawa ena 139 [ena gauna oqo sa 146] na vosa. E drukataki dina na nodra sa mai kila na duivosavosa na itukutuku me baleta na Kalou.”

E dina nira kaya e levu na vuku ni sega ni rawa ni kilai na Kalou, ia na yapositolo o Paula e vakamatatataka ni na rawa ni kilai. Nona vosa tiko vei ira na ilawalawa kai Aceni, e so vei ira era dau sokalou tiko ena icabocabonisoro ni ‘Kalou e tawakilai,’ a kaya o Paula: “Ko koya ko ni sa soro kina ni kemuni sa sega ni kila, au sa qai tukuna vei kemuni. A Kalou ka buli vuravura kei na ka kecega sa tu kina . . . sa solia ga ko koya vei keda kecega na bula, kei na cegu, kei na ka kecega; a sa buli ira, era sa dra vata, na lewe ni veivanua kecega, me ra tiko e na dela i vuravura taucoko.”​​—⁠Cakacaka 17:​23-​26.

E uqeti ira na vakarorogo o Paula mera vakasaqarai koya na Dauveibuli, ni “sa sega ga ni yawa ko koya vei keda yadua.” (Cakacaka 17:27) Era marautaka na iVakadinadina i Jiova mera vukei kemuni mo ni kila na Kalou dina kei na nona veitovo qoroi.