“Long fes taim mipela i toktok wantaim pikinini meri bilong mipela long alkohol, em i gat 6-pela krismas. Mipela i kirap nogut olsem em i save long planti samting long sait bilong alkohol.”​—Alexander.

•  Samting yu mas save

•  Samting yu inap mekim

•  Tok Baibel i mekim long alkohol

 Samting yu mas save

 Toktok wantaim ol pikinini long alkohol em i bikpela samting tru. No ken wet i go inap long pikinini bilong yu i kamap tineja. Wanpela man long Rasia em Khamit, i tok: “Em bai gutpela sapos mipela i bin toktok wantaim pikinini man bilong mipela long pasin bilong yusim gut alkohol long taim em i liklik yet. Mi luksave long dispela bihain long bikpela hevi tru i bin kamap. Mi painimaut olsem pikinini bilong mi i save dring long olgeta taim kirap long taim em i gat 13 krismas.”

 Bilong wanem yu mas tingim ol?

•   Ol klasmeit, edvetaismen, na TV inap stiaim tingting em pikinini bilong yu i holim long sait bilong alkohol.

•   U.S. Centers for Disease Control and Prevention i tok olsem, 11 pesen bilong ol man i dring alkohol long Amerika em ol yangpela pikinini.

 Yumi no kirap nogut olsem ol wokman bilong helt i tok olsem ol papamama i mas skulim ol pikinini long taim ol i liklik yet long ol hevi em alkohol i save kamapim. Hau bai yu inap mekim olsem?

 Samting yu inap mekim

 Redi long bekim ol askim bilong pikinini. Ol liklik pikinini bai i gat laik long save, na ol pikinini i bikpela pinis bai i gat laik long save moa. Olsem na, em bai gutpela long yu redi long bekim ol askim. Olsem:

•   Sapos pikinini bilong yu i laik save long teis bilong alkohol, yu inap tok olsem wain i olsem dring ol i wokim long prut we i sawa liklik na bia i pait.

•   Sapos pikinini bilong yu i laik teistim alkohol, yu ken tokim em olsem alkohol i strong moa long ol pikinini. Stori long ol samting alkohol i save kamapim: Alkohol i save mekim man i rileks, tasol planti alkohol inap mekim man i pilim airaun, mekim ol longlong pasin, na kolim ol tok we bihain ol bai rigret.​—Provep 23:29-​35.

 Skulim yu yet. Baibel i tok: “Man i gat pasin bilong tingting gut na mekim samting, em i save mekim samting wantaim save.” (Provep 13:16) I gutpela long yu save long samting alkohol i save mekim na ol lo bilong kantri long alkohol. Taim yu mekim olsem, yu bai redi gut long helpim pikinini bilong yu.

 Painim rot long stori long dispela topik. Wanpela papa long Inglan em Mark, i tok: “Ol yangpela i no gat stretpela save long pasin bilong yusim alkohol. Mi askim pikinini man bilong mi i gat 8-pela krismas long tingting bilong em sapos em orait long dring alkohol o nogat. Mi mekim long pasin we em i no ken sem, na dispela i helpim em long kamapim tingting.”

 Yu soim olsem yu tingim tru ol sapos planti taim yu stori long ol samting long sait bilong alkohol. Skelim krismas bilong pikinini bilong yu na stori long ol samting long sait bilong alkohol na ol narapela skul bilong laip, olsem ol lo bilong ron long rot na maritpasin.

 Stap olsem eksampel. Ol pikinini i olsem spans—ol i save bihainim olgeta samting ol i lukim na harim—na ol wok painimaut i soim olsem ol pikinini i save bihainim toktok na pasin papamama i mekim. Dispela i makim olsem sapos yu dring alkohol olsem namba wan rot bilong kisim bel isi o daunim presa, pikinini bilong yu bai ting olsem alkohol em rot bilong karim hevi bilong tingting planti. So stap gutpela eksampel. Yu mas bihainim savetingting long yusim alkohol.