Ta pricura kame trata bueno y ta dale mira amor y respeto con el todo maga gente. Si el uno del maga Testigo de Jehova gendeh mas activo o ya descanza na de suyu adoranza, ta hace kame manera para man cuento con ele. Ta asigura tambien kame con ele que ta ama kame con ele y ta pricura kame ayuda con ele para queda le otravez cerca con Dios.—Lucas 15:4-7.

 Na cuanto situacion, posible quita con el un persona na congregacion por causa na cosa le ya hace. (1 Corinto 5:13) Pero cay ta ama gayot kame con ele, ta pricura kame con ele ayuda para gendeh con ele quita. Y maskin pa quita con ele na congregacion, ta dale kame siempre mira amor y respeto con ele como cosa ta habla el Biblia.—Marcos 12:31; 1 Pedro 2:17.

Porque ta quita con el un persona na congregacion?

 Claro ya menciona el Biblia que si ya comete serioso culpa el un Cristiano y no quierre hace maga cambio, necesita con ele quita na congregacion. a (1 Corinto 5:11-13) Ya dale tambien mira el Biblia si cosa el maga serioso culpa que puede causa para quita con el un persona. Incluido aqui el adulterio, burracherias, matanza, abuso na familia, ladronadas y otro pa.—1 Corinto 6:9, 10; Galacia 5:19-21; 1 Timoteo 1:9, 10.

 Pero, gendeh dayun kame ta quita na congregacion con el persona quien ya comete un serioso culpa. Ta pricura anay con ele ayuda el maga anciano b na congregacion para puede le hace maga cambio. (Roma 2:4) Ta hace sila se na calmao y na buen manera. (Galacia 6:1) Por medio con ese, puede realiza el persona que malo el cosa le ya hace y arripinti le. (2 Timoteo 2:24-26) Si manada beses ya con ele ya ayuda pero ta hace siempre le si cosa el malo y gendeh ta arripinti, debe con ele quita na congregacion. Hay anuncia el maga anciano na congregacion que el persona gendeh mas uno del maga Testigo de Jehova.

 Cosa el resulta si quita con el un persona quien ta continua hace si cosa el malo? Una, puede continua sigui el congregacion con el maga principio del Dios acerca na moral. Ika-dos, gendeh tambien kanila puede influencia el persona. (1 Corinto 5:6; 15:33; 1 Pedro 1:16) Y ika-tres, puede se ayuda con el persona que gendeh mas hace si cosa el malo y pricura hace maga cambio.—Maga Hebreo 12:11.

Paquemodo ta trata el maga Testigo de Jehova con aquellos con quien ya quita na congregacion?

 El Biblia ya habla que el maga Cristiano ‘gendeh debe man junto’ con el persona con quien ya quita na congregacion y gane, gendeh con ele debe man junto “maskin para come.” (1 Corinto 5:11, El Nuevo Testamento na Chavacano) Poreso, gendeh kame ta asocia con el persona con quien ya quita. Pero gendeh kame ta ignora con ele completamente sino ta trata siempre kame con ele con respeto. Puede le atende na diamon maga miting y si atende le, puede con ele man greet el maga Testigo de Jehova. c Puede tambien le pidi ayuda con el maga anciano si paquemodo le puede bira otravez na congregacion.

 Paquemodo si ya quita con el un persona na congregacion pero maga Testigo de Jehova el de suyu marido o mujer y maga anak? Maskin gendeh mas le ta adora con Dios junto kanila, man familia siempre sila. Ciendo junto sila ta queda, nuay cambia el de suyu relacion na de suyu marido o mujer y na diila maga anak. Ta dale siempre sila mira amor con uno y otro.

 El persona con quien ya quita na congregacion puede pidi con el maga anciano que visita con ele. El maga anciano hay dale con ele amable consejo usando el Biblia y anima con ele que arripinti y bira con Dios. (Zacarias 1:3) Si gendeh mas le hace si cosa el malo y pricura sigui con el maga principio na Biblia, puede le bira otravez na congregacion. Despues, el congregacion ‘hay perdona y dale animo con ele’ igual na cosa ya hace el maga Cristiano na Corinto cuando el un persona ya arripinti y ya hace maga cambio.—2 Corinto 2:6-8.

Cosa ta sinti ahora aquellos con quien ya quita na congregacion de antes?

 Nota si cosa ya habla el cuanto maga Testigo de Jehova con quien ya quita na congregacion pero ya decidi bira con Dios.

 “Despues del cuanto decada, ya decidi yo bira na congregacion. Pensaba yo pregunta el maga anciano conmigo si cosa yo ya hace desde ya quita conmigo na congregacion. Pero nuay se sila hace. Sino ya habla sila que man focus lang yo na cosa yo debe hace ahora. Poreso, ya sinti gayot yo alivio.”—Maria, United States.

 “Alegre el maga hermano y hermana cuando ya bira yo. Ya sinti yo que ta ama gayot sila conmigo. Ya ayuda sila conmigo para sinti yo que ya perdona ya conmigo y para gendeh mas yo pensa con el cosa yo ya hace de antes. Ya ayuda tambien conmigo el maga anciano para puede yo otravez tene buen relacion con Jehova. Ya ayuda sila conmigo para realiza que importante siempre yo con Jehova y ta ama le conmigo.”—Malcom, Sierra Leone.

 “Ta ama gayot si Jehova con el de suyu maga siervo poreso ta asigura le que esta limpio el de suyu organizacion. Y ta aprecia gayot yo con ese. Posible pensa el otro que bien istricto el diaton organizacion. Pero el deverasan, necesita con ese hace y para se na bien del todo. Alegre yo cay amable y ta perdona el diaton Tata na cielo.”—Sandi, United States.