EL PINAKA-TEMA | EL BIBLIA—UN ISTORIA SI PAQUEMODO YA PUEDE PRESERVA
Ya Preserva con el Biblia Maskin Pa Posible Este Queda Malo
EL PROBLEMA: El papiro y pergamino amo el maga materiales que ya usa el maga escritor del Biblia y el quien ya copia con ese. * (2 Timoteo 4:13) Na cosa manera este maga materiales ya hace dificil para puede preserva con el Biblia?
El papiro pronto lang rompe, cambia el color y queda malo. “Despues de cuanto tiempo, el un pojas puede man buluk y queda polvos,” ya habla si Richard Parkinson y Stephen Quirke que maga Egyptologist. “Si recujido este, el rollo puede man moho o man buluk si muha este y puede tambien con este come el maga raton o insecto, especialmente el maga anay si enterao este.” Despues con este discubri, el cuanto papiro que ya tupa sobra claridad del sol o hamuk mas pronto ta man buluk.
El pergamino mas durable contra na papiro pero hay queda lang tambien este malo si gendeh cuida con este enbuenamente o si tupa con este sobra calor, hamuk o claridad. * Puede tambien con este destroza el maga insecto. Asegun na libro Everyday Writing in the Graeco-Roman East, amo se el razon si porque bien poco lang maga manuscrito de antes el ya puede preserva hasta na diaton tiempo ahora. Si man buluk el maga manuscrito del Biblia, hay perde tambien el mensaje de este.
SI PAQUEMODO YA PRESERVA CON EL BIBLIA: Asegun na Ley del maga Judio, el todo maga rey obligao que hace “de suyu mismo copia de este Ley,” el primer cinco libro del Biblia. (Deuteronomio 17:18) Mas pa, el maga experto copia ya produci bien manada manuscrito. Como resulta del primer siglo C.E., puede incuntra con el maga Escritura na maga sinagoga na entero Israel y maskin na Macedonia! (Lucas 4:16, 17; Maga Actividad 17:11) Paquemodo el cuanto del maga bien daan manuscrito ya puede preserva hasta na diaton tiempo ahora?
El maga manuscrito que ta llama Dead Sea Scrolls ya puede preserva por cuanto siglo na maga bangga que ya pone na maga cueva na un seco lugar
“El maga Judio ta pone maga rollo de Escritura na maga pichel o bangga para preserva con este,” ya habla si Philip W. Comfort, un scholar de Nuevo Testamento. Ta sale que el maga Cristiano ya continua con este tradicion. Amo se el razon si porque el cuanto maga manuscrito de Biblia de antes ya puede discubri na maga bangga, diutay cuarto, cueva y na maga bien seco lugar.
EL RESULTA: Miles de porcion del maga manuscrito de Biblia—el cuanto mas de 2,000 año ya—el ya puede preserva hasta na diaton tiempo ahora. Nuay otro libro el tiene ansina de manada manuscrito que bien daan ya.
^ par. 3 El papiro amo un material donde puede escribi que hacido na un siembra que ta crici na agua que ta llama na igual nombre. El pergamino hacido de maga pellejo de animal.
^ par. 5 Por ejemplo, ya escribi con el firmao U.S. Declaration of Independence na pergamino. Despues del maga 250 año, bien dificil ya para le con este ahora.
