Sɛ yesuma Bayɩbʋlʋ yɩ a, ɩma yɛ anyɩ de, naasʋ̃ sɛ yɛ nɩɩ mmenii kyɛ mɔɔ yesuma nɩ a, ɩma yɛtwɩ̃ yebike Gyehova paa. Ɛɣɛlɛwulɛ 11:25 kã kɛɛ: “Abiyela mɔɔ ɩma mmenii mvʋlɔ bɔ nwʋ twe bɛ nɩ, bɛkɛma yɩzayɩ sʋ̃ yɩ nwʋ kodwe yi.”

Sɛ yɛ nɩɩ mmenii mvʋlɔ kyɛ mɔɔ yesuma nɩ a, ɩbʋwa yɛ ma yɛkakɛ mɔɔ yezuma nɩ na yɛtɩ yɩ tʋ bʋwɔ sʋ̃. Na iluwakɛɛ mmenii mvʋlɔ kɔhʋla kenyia mɔɔ yezuma nɩ zʋ mfasʋ ti, sɛ yɛ nɩɩ bɛ kyɛ a, ɩma yɛ anyɩ de.—Egy. 20:35.

Twe eyi kila: Wɔ dapɛnɩ mɔɔ ɩbaa yɩ, bɔ mmɔdɩnɩ kɛɛ ɛ nɩɩ abiye kɛhyɛ mɔɔ ozuma nɩ. Sa ɔkʋla kã ebiye kile wu mmusunwamaa, wʋ asafʋ nu maa, wu egyima nu maa, wu sukuulumaa, wʋ apaa nu maa, anzɛnyɩɩ bɛzabɛ mɔɔ eyiyia bɛ wɔ dasɩlɛlilɛ nu nɩ. Bɔ mmɔdɩnɩ kɛɛ ɛkɛva wʋzawʋ wu ndwokɔ kehilehile nu ma numɔ kɛla kɛ na yɩ tʋdɩlɛ sʋ̃ ɩayɛ mɛlɛkɛ.

Kakɛ: Kã mɔɔ ozuma nɩ be kile mmenii kɛɛ ɛlɛ ɛhyɛɛ bɛ ɛzɩzɩbɛ, na kɛ ebiye a ɛma bɔkɔnwʋ kɛɛ ezi dɩyɛ.—1 Kɔl. 8:1.