Mhlawumbe nawe ngenxa yokukhula awusakwazi ukwenza ezinye izinto owawukwazi ukuzenza. Nakuba sewukhonze uJehova ngokwethembeka iminyaka eminingi, kungase kukudumaze ukuthi awusakwazi ukwenza izinto owawukwazi ukuzenza. Ngokwesibonelo, ungase uzithole usuvame ukuqhathanisa lokho okwenzayo njengamanje nalokho owawukwenza esikhathini esidlule. Uma kunjalo, yini ongayenza ukuze ulwisane nemicabango enjalo?

LOKHO UJEHOVA AKULINDELE KUWE

Zibuze, ‘Yini uJehova ayilindele kimi?’ Angakududuza amazwi akuDuteronomi 6:​5, athi: “Kumele uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangawo wonke amandla akho.”

Ngokwalelo vesi, uJehova ulindele ukuba umkhonze ngenhliziyo yakho yonke, ngomphefumulo wakho wonke nangamandla akho wonke. Lelo qiniso lingakusiza ukuba ugweme ukuziqhathanisa nabanye—noma ukuqhathanisa lokho okwazi ukukwenza njengamanje nalokho owawukwazi ukukwenza esikhathini esidlule.

Cabanga ngalokhu: Ngesikhathi usemusha, yini owawuyenzela uJehova? Iningi labantu bakaJehova lingathi lalenzela uJehova okungcono kakhulu. Kuwe, lokho owawukwenza kwakungcono kakhulu ngaleso sikhathi njengoba  kwakuhambisana nezimo zakho. Yini okwazi ukuyenzela uJehova njengamanje? Cishe umenzela okungcono kakhulu ngokwezimo zakho namuhla, wenza lokho onamandla okukwenza njengamanje. Uma uzibheka ngaleyo ndlela izinto, ungaphetha ngokuthi lokho omenzela kona uJehova kuyafana nalokho owawumenzela kona esikhathini esidlule. Wawumenzela okungcono kakhulu ngaleso sikhathi futhi namanje umenzela okungcono kakhulu.

UNGABAZUZISA KAKHULU ABANYE

Nayi enye indlela ongayibheka ngayo le ndaba: Kunokuba ubheke ukukhula kwakho ngeminyaka njengento ekuvimba ukuba wenze ezinye izinto, ungazama ukucabanga ngamathuba amaningi onawo okusiza abanye njengomuntu osekhulile. Ngempela, njengomKristu osekhulile ungenza ezinye izinto owawungeke ukwazi ukuzenza ngesikhathi usemusha. Ngokwesibonelo, ungenza lezi zinto ezilandelayo:

Ungaxoxela abanye ngezinto ozifundile ekuphileni. Cabanga ngalokho iBhayibheli elikushoyo kula mavesi alandelayo:

INkosi uDavide: “Ngake ngaba musha, manje sengikhulile, kodwa angikaze ngimbone olungile eshiywe dengwane, noma izingane zakhe ziswele ukudla.”—IHu. 37:25.

UJoshuwa: “Manje sengizokufa, futhi nazi kahle ngayo yonke inhliziyo yenu nangawo wonke umphefumulo wenu ukuthi akukho nesisodwa isithembiso kuzo zonke izithembiso ezinhle uJehova uNkulunkulu wenu anithembise zona esingafezekanga. Zigcwaliseke zonke. Asikho nesisodwa esingagcwalisekanga.”—Josh. 23:14.

Mhlawumbe nawe wake washo amazwi afana nalawo ashiwo uDavide noJoshuwa. Ngamunye wabo washo la mazwi ngenxa yalokho okwakwenzeke ekuphileni kwakhe. Ngenxa yokuthi lezi zinceku zikaJehova ezithembekile zaziveza lokho ezazikubonile nezazikuzwile phakathi namashumi eminyaka, amazwi azo ayenamandla ngempela.

Uma usukhonze uJehova isikhathi eside, nawe ungakhuluma ngalokho okubonile ngezinzuzo zokumkhonza. Sikhona yini isikhathi osikhumbulayo owabona ngaso uJehova ebusisa abantu bakhe ngendlela ekhethekile? Uma sikhona, zizwe ukhululekile ukuxoxela abanye ngalokho okwenzeka! Kungabakhuthaza ukukuzwa, njengoba nje nawe kwakukhuthaza ukukubona kwenzeka. Ngakho, lapho abanye bezwa ngalokho okwenzeke ekuphileni kwakho njengoba ukhonza uJehova, ungaba yisikhuthazo esikhulu kubo.—Roma 1:​11, 12.

Enye indlela ongakhuthaza ngayo abanye ukuba ube khona ngokoqobo emihlanganweni yebandla, ngezinga ongakwazi ngalo. Emihlanganweni yebandla ungazuzisa wena nokholwa nabo. UConnie, okukhulunywe ngaye ekuqaleni, uthi: “Ukuya emihlanganweni yebandla ngokoqobo kungisiza ukuba nginganqotshwa ukudikibala. Ngingadangala kanjani nje kube kunabantu abaningi kangaka abangibonisa uthando eHholo LoMbuso? Ngiyazama ukubonisa abanye ukuthi ngibabonga kangakanani ngokubapha izipho ezincane. Ngiyaqikelela nokuba ngiqhubeke ngenza izinto ezingokomoya nabafowethu nodadewethu.”

UJEHOVA UYAJABULA NGOKUMKHONZA KWAKHO NGOKWETHEMBEKA

ImiBhalo inezibonelo eziningi zabantu izimo zabo ezazingabavumeli ukuba benze okwengeziwe, kodwa ababethandwa uJehova. Cabanga ngoSimeyoni, umIsrayeli osekhulile, owayephila ngesikhathi uJesu ezalwa. Ngesikhathi uSimeyoni evakashele ethempelini, cishe wayebona izinsizwa zenza umsebenzi obalulekile ethempelini. Kodwa kuthiwani ngoSimeyoni? Ngokombono womuntu, wayengase azitshele ukuthi njengoba ayesekhulile wayengabalulekile kangako kuJehova. Kodwa uJehova wayengambheki ngaleyo ndlela. Wayebheka uSimeyoni njengomuntu ‘olungile nowayemesaba’ futhi wambusisa ngelungelo lokubona uJesu owusana. UJehova waze wasebenzisa uSimeyoni ukuba abikezele isiprofetho esasiphathelene noMesiya owayethenjisiwe! (Luka 2:​25-35) Kusobala ukuthi uJehova wabuka ngale komzimba kaSimeyoni owayesekhulile, wabona  indoda enokholo oluqinile, ‘umoya ongcwele owawuphezu kwayo.’

Nawe ungaqiniseka ukuthi uJehova uyajabula ngokuthi umkhonza ngokwethembeka nakuba kungenzeka kunezinto ongasenawo amandla okuzenza. KuJehova, ukuzidela kwakho “kwamukeleka ngokukhethekile ngokwalokho umuntu anakho, hhayi ngokwalokho umuntu angenakho.”—2 Kor. 8:12.

Unalokho engqondweni, gxila kulokho onamandla okukwenza. Ngokwesibonelo, yiziphi izinhlobo zokushumayela osengakwazi ukuzenza—ngisho noma uzenza isikhashana nje? Ungakwazi yini ukusiza abanye ngokubafonela isikhashana noma ngokubabhalela ikhadi? Izenzo ezincane zothando zingaba namandla kakhulu kokholwa nabo, ikakhulukazi uma lezo zenzo zenziwa inceku kaJehova esimkhonze isikhathi eside.

Abanye abasenawo amandla okwenza izinto ezithile. Cabanga ngalokho okwenzeka eMpumalanga Afrika ebhokisini elihambisana nalesi sihloko elithi, “ Lasindisa Ukuphila Kwakhe.”

Khumbula ukuthi umlando wakho wokholo nokuba qotho kwakho kungabakhuthaza abanye. Uyisibonelo esihle sokukhuthazela futhi ungaqiniseka ukuthi ‘uNkulunkulu akayena ongalungile ukuba akhohlwe umsebenzi wakho nothando owalubonisa egameni lakhe, ngokukhonza abangcwele nangokuqhubeka ubakhonza.’—Heb. 6:10.

UNGAYEKI UKUSIZA ABANYE NGOKWALOKHO OKUSEMANDLENI AKHO

Ucwaningo lubonisa ukuthi iningi lamadoda nabesifazane asebekhulile abasiza abanye banempilo engcono, ingqondo esheshayo futhi baphila isikhathi eside.

Yiqiniso ukuthi ukwenzela abanye izinto ezinhle ngeke kuyiqede imiphumela yokukhula ngeminyaka. UMbuso kaNkulunkulu kuphela oyokwazi ukukwenza lokho ngokuqeda isono esasizuza ku-Adamu—esiyimbangela yangempela yokuguga nokufa.—Roma 5:12.

Noma kunjalo, inkonzo oyenzela uJehova—ehlanganisa ukusiza abanye ukuba bamazi—igcina ithemba lakho liqinile futhi ingazuzisa ngisho nempilo yakho. Nina esenikhulile, sicela nazi ukuthi uJehova ujabula kakhulu ngalokho enimenzela kona enkonzweni yakhe nokuthi niyigugu kakhulu ebandleni ngenxa yesibonelo senu sokholo.