NgokukaLuka 20:1-47
20 Ngolunye lwalezo zinsuku lapho efundisa abantu ethempelini futhi ememezela izindaba ezinhle, kweza abapristi abakhulu nababhali namadoda amadala,
2 bathi kuye: “Sitshele ukuthi uzenza ngagunya lini lezi zinto? Noma ukuthi ubani okunike leli gunya?” +
3 Wabaphendula wathi: “Nami ngizonibuza umbuzo, nina ningiphendule:
4 Ingabe ubhapathizo lukaJohane lwaluvela ezulwini noma kubantu?”
5 Babe sebefinyelela eziphethweni bebodwa, bethi: “Uma sithi, ‘Ezulwini,’ uzothi, ‘Kungani ningamkholwanga?’
6 Kodwa uma sithi, ‘Kubantu,’ abantu bonke ngothi lwabo bazosishaya ngamatshe basibulale, ngoba bayaqiniseka ukuthi uJohane wayengumprofethi.” +
7 Ngakho baphendula ngokuthi abazi ukuthi lwaluvelaphi.
8 UJesu wathi kubo: “Nami ngeke nginitshele ukuthi ngizenza ngagunya lini lezi zinto.”
9 Watshela abantu lo mfanekiso: “Umuntu othile watshala insimu yamagilebhisi, + wayiqashisa kubalimi, wayesehamba isikhathi eside waya kude. +
10 Ngenkathi efanele, wathumela inceku kubalimi ukuze bamnike ezinye zezithelo zensimu yamagilebhisi. Nokho, abalimi bayihambisa ingaphethe lutho ngemva kokuyishaya. +
11 Kodwa waphinda futhi wathumela enye inceku. Naleyo futhi bayishaya, bayihlazisa, bayihambisa ingaphethe lutho.
12 Nokho waphinda wathumela eyesithathu; nalena futhi bayilimaza bayixosha.
13 Umnikazi wensimu yamagilebhisi wathi, ‘Kufanele ngenzenjani? Ngizothumela indodana yami ethandekayo. + Cishe yona bazoyihlonipha.’
14 Lapho abalimi beyibona, babonisana bethi, ‘Lena indlalifa. Masiyibulale ukuze ifa libe elethu.’
15 Babe sebeyiphonsa ngaphandle kwensimu yamagilebhisi bayibulala. + Yini-ke umnikazi wensimu azoyenza kubo?
16 Uzoza ababulale laba balimi, insimu yamagilebhisi ayinike abanye.”
Lapho bezwa lokhu, bathi: “Kwangathi kungelokothe kwenzeke lokho!”
17 Kodwa wababheka ngqo, wathi: “Kusho ukuthini-ke lokhu okulotshiwe: ‘Itshe elenqatshwa abakhi, selibe yitshe legumbi* eliyinhloko’? +
18 Wonke umuntu owela phezu kwalelo tshe uyophihlizeka. + Noma ubani eliwela phezu kwakhe, liyomgaya.”
19 Ababhali nabapristi abakhulu bafuna ukumbeka isandla ngalo kanye lelo hora, kodwa besaba abantu, ngoba baqonda ukuthi wayekhulume lo mfanekiso ecabanga ngabo. +
20 Ngemva kokumqaphisisa, bathumela abantu ababebaqashe ngasese ukuba bazishaye abalungile ukuze bathole iphutha enkulumweni yakhe, + ukuze bamnikele kuhulumeni nakumbusi.
21 Bambuza bathi: “Mfundisi, siyazi ukuthi ukhuluma futhi ufundisa iqiniso futhi awukhethi, kodwa ufundisa indlela kaNkulunkulu ngokuvumelana neqiniso:
22 Kungokomthetho* yini ukuba sikhokhe intela kuKhesari noma cha?”
23 Kodwa wabubona ubuqili babo, wathi kubo:
24 “Ngiboniseni udenariyu.* Okabani umfanekiso nombhalo oqoshwe kuwo?” Bathi: “OkaKhesari.”
25 Wathi kubo: “Ngakho-ke, buyiselani izinto zikaKhesari kuKhesari, + kodwa izinto zikaNkulunkulu kuNkulunkulu.” +
26 Abakwazanga ukumbamba ngenkulumo yakhe phambi kwabantu, kodwa bemangazwe impendulo yakhe, bavele bathula.
27 Nokho, abanye kubaSadusi, labo abathi alukho uvuko, + beza kuye bambuza bathi: +
28 “Mfundisi, uMose wasilobela wathi, ‘Uma umfowabo womuntu efa eshiya umfazi, kodwa engazange abe nabantwana, umfowabo kufanele amngene* lowo mfazi avezele umfowabo inzalo.’ +
29 Manje kwakukhona izelamani eziyisikhombisa. Owokuqala wathatha umfazi kodwa wafa engenabantwana.
30 Nowesibili
31 nowesithathu bamshada. Bonke abayisikhombisa benza into efanayo; bafa bangashiya bantwana.
32 Ekugcineni, owesifazane naye wafa.
33 Ngakho ovukweni ubani ayoba ngumkakhe? Ngoba waba yinkosikazi yabo bonke abayisikhombisa.”
34 UJesu wathi kubo: “Abantwana balesi simiso sezinto* bayashada futhi bayashadiswa,
35 kodwa labo ababalwe njengabakufanele ukuzuza lesiya simiso sezinto nokuvuka kwabafile abashadi futhi abashadiswa. +
36 Eqinisweni, ngeke besafa, ngoba banjengezingelosi futhi bangabantwana bakaNkulunkulu ngokuba abantwana bovuko.
37 Kodwa ukuthi abafile bayavuswa, ngisho noMose wakwenza kwaziwa endabeni ephathelene nesihlahla sameva, lapho ebiza uJehova* ngokuthi ‘uNkulunkulu ka-Abrahama noNkulunkulu ka-Isaka noNkulunkulu kaJakobe.’ +
38 UnguNkulunkulu wabaphilayo, akayena owabafile, ngoba bonke bayaphila kuye.” *+
39 Besabela kulokhu, abanye bababhali bathi: “Mfundisi, ukhulume kahle.”
40 Ngoba babengasenaso nesibindi sokumbuza ngisho nombuzo owodwa.
41 Yena wababuza wathi: “Basho kanjani ukuthi uKristu uyindodana kaDavide? +
42 Ngoba uDavide ngokwakhe uthi encwadini yamaHubo, ‘UJehova* wathi eNkosini yami: “Hlala ngakwesokudla sami
43 ngize ngibeke izitha zakho zibe yisenabelo sezinyawo zakho.” ’ +
44 Njengoba uDavide embiza ngokuthi Nkosi, angaba kanjani indodana yakhe?”
45 Lapho bonke abantu besalalele, wathi kubafundi bakhe:
46 “Xwayani ababhali abathanda ukuhambahamba begqoke izingubo ezinde, nokubingelelwa ezimakethe, nezihlalo eziphambili* emasinagogeni, nezindawo ezivelele kunazo zonke ezidlweni zakusihlwa, +
47 abashaqa izindlu* zabafelokazi, benze nemithandazo emide ukuze babukise.* Laba bayothola isahlulelo esinzima kakhulu.”
Imibhalo yaphansi
^ NgesiGreki, “lasekhoneni.”
^ Noma, “Kulungile.”
^ Bheka iSithasiselo B14.
^ Noma, “amthathe abe umkakhe.”
^ Noma, “bale nkathi.” Bheka uHlu Lwezincazelo Zamagama.
^ Bheka iSithasiselo A5.
^ Noma, “bayaphila ngokombono wakhe.”
^ Bheka iSithasiselo A5.
^ Noma, “ezingcono.”
^ Noma, “izinto.”
^ Noma, “bezenzisa.”
