U-Isaya 39:1-8
-
Izithunywa ezivela eBhabhiloni (1-8)
39 Ngaleso sikhathi inkosi yaseBhabhiloni uMerodaki-bhaladani indodana kaBhaladani yathumela izincwadi nesipho kuHezekiya, + ngoba yayizwile ukuthi wayekade egula kodwa eseluleme. +
2 UHezekiya wazamukela ngenjabulo* izithunywa wazibonisa indawo yakhe yokugcina ingcebo +—isiliva, igolide, amafutha ebhalsamu namanye amafutha ekhethelo, izikhali zakhe nakho konke okwakutholakala endaweni yakhe yokugcina ingcebo. Akukho lutho uHezekiya angazange azibonise kona esigodlweni sakhe* nakuwo wonke umbuso wakhe.
3 Ngemva kwalokho u-Isaya umprofethi waya eNkosini uHezekiya wathi kuyo: “Atheni la madoda futhi avelaphi?” Ngakho uHezekiya wathi: “Avela ezweni elikude, eBhabhiloni.” +
4 Wayesethi: “Aboneni endlini yakho?”* UHezekiya wathi: “Abone konke okusendlini yami.* Akukho lutho engingawabonisanga kona endaweni engigcina kuyo ingcebo yami.”
5 U-Isaya wathi kuHezekiya: “Yizwa izwi likaJehova wamabutho,
6 ‘Ziyeza izinsuku lapho konke okusendlini yakho* nalokho okhokho bakho abakuqongelela kuyothwalwa kuyiswe eBhabhiloni. Akukho lutho oluyosala,’ + kusho uJehova. +
7 ‘Abanye enzalweni yakho, bayothathwa babe yizikhulu zegceke esigodlweni senkosi yaseBhabhiloni.’ ” +
8 UHezekiya wathi ku-Isaya: “Izwi likaJehova olikhulumile lihle.” Waqhubeka wathi: “Ngoba kuzoba nokuthula nokuzinza* phakathi nesikhathi sokuphila* kwami.” +
Imibhalo yaphansi
^ NgesiHebheru, “wazijabulela.”
^ Noma, “endlini yakhe.”
^ Noma, “esigodlweni sakho.”
^ Noma, “okusesigodlweni sami.”
^ Noma, “okusesigodlweni sakho.”
^ Noma, “neqiniso.”
^ NgesiHebheru, “nezinsuku zokuphila.”
