Genesise 50:1-26
50 UJosefa wabe eseziphonsa kuyise + wamkhalela, wamqabula.
2 Ngemva kwalokho uJosefa wayala izinceku zakhe, odokotela, ukuba bagcobe* + uyise. Ngakho odokotela bamgcoba u-Israyeli,
3 bathatha izinsuku ezingu-40 ezigcwele, ngoba yilesi sikhathi esasidingeka ukuze kugcotshwe isidumbu futhi amaGibhithe aqhubeka emkhalela izinsuku ezingu-70.
4 Lapho sezidlulile izinsuku zokumlilela, uJosefa wakhuluma nezikhulu zikaFaro,* wathi: “Uma ngithole umusa kini, ngidluliseleni lo myalezo kuFaro:
5 ‘Ubaba wangifungisa, + wathi: “Bheka! Sengiyafa. + Kumelwe ungingcwabe endaweni yami + engazilungisela yona ezweni laseKhanani.” + Ngicela ungivumele ngikhuphuke ngiyongcwaba ubaba, ngemva kwalokho ngizobuya.’”
6 UFaro waphendula: “Hamba uyongcwaba uyihlo njengoba nje akufungisa.” +
7 Ngakho uJosefa wakhuphuka wayongcwaba uyise, zonke izinceku zikaFaro zahamba naye, amadoda amadala + endlu yakhe nawo wonke amadoda amadala asezweni laseGibhithe
8 nabo bonke abomndeni kaJosefa nabafowabo nomndeni kayise. + Bashiya abantwana babo abancane nemihlambi yabo kuphela ezweni laseGosheni.
9 Kwakhuphuka kanye naye izinqola + nabagibeli bamahhashi, iqembu lalilikhulu kakhulu.
10 Bafika esibuyeni* sase-Athadi, esisesifundeni saseJordani, bafike balila kakhulu ngendlela edabukisayo, uJosefa waqhubeka elilela uyise izinsuku eziyisikhombisa.
11 Abantu bakulelo zwe, amaKhanani, bababona belila esibuyeni sase-Athadi, bababaza bathi: “Yisililo esikhulu samaGibhithe!” Yingakho saqanjwa ngokuthi i-Abela-mizirayimi,* esesifundeni saseJordani.
12 Ngakho amadodana akhe enza njengoba nje ayewayalile. +
13 Amadodana akhe amthwala amyisa ezweni laseKhanani amngcwaba emhumeni wensimu yaseMakaphela, insimu ephambi kwaseMamre u-Abrahama ayeyithenge ku-Efroni umHeti njengendawo yokungcwaba. +
14 Ngemva kokungcwaba uyise, uJosefa wabuyela eGibhithe nabafowabo nabo bonke ababehambe naye beyongcwaba uyise.
15 Lapho abafowabo bakaJosefa bebona ukuthi uyise wayesefile, bathi: “Kungenzeka ukuthi uJosefa ufukamele inzondo ngathi futhi uzoziphindiselela kithi ngakho konke okubi esikwenze kuye.” +
16 Ngakho bathumela umyalezo kuJosefa: “Uyihlo wakhipha lo myalo ngaphambi kokuba afe:
17 ‘Yilokhu eniyokusho kuJosefa: “Ngiyakuncenga, siza uxolele isiphambeko sabafowenu nesono abasenza ngokwenza okubi kuwe.”’ Manje sicela uxolele isiphambeko sezinceku zikaNkulunkulu kayihlo.” UJosefa wakhala lapho bekhuluma naye.
18 Ngemva kwalokho abafowabo beza bawa phambi kwakhe bathi: “Bheka, sifana nezigqila kuwe!” +
19 UJosefa wathi kubo: “Ningesabi. Ingabe ngisesikhundleni sikaNkulunkulu?
20 Nakuba nina nanifuna ukungilimaza, + uNkulunkulu wayehlose ukukushintsha lokho asindise abantu abaningi, njengoba enza namuhla. +
21 Ngakho manje ningesabi. Mina ngizoqhubeka ngininika ukudla nina nabantwana benu abancane.” + Wabaduduza wabaqinisekisa.
22 UJosefa waqhubeka ehlala eGibhithe, yena nomndeni kayise, futhi waphila iminyaka engu-110.
23 Wabona isizukulwane sesithathu samadodana ka-Efrayimi, + namadodana kaMakiri, + indodana kaManase. KuJosefa ayefana nezingane zakhe.*
24 Ekugcineni uJosefa wathi kubafowabo: “Sengiyafa, kodwa ngokuqinisekile uNkulunkulu uyoninaka, + nakanjani uyonikhuphula anikhiphe kuleli zwe aniyise ezweni afunga ngalo ku-Abrahama, ku-Isaka nakuJakobe.” +
25 Ngakho uJosefa wafungisa amadodana ka-Israyeli, wathi: “Nakanjani uNkulunkulu uyoninaka. Kumelwe nithathe amathambo ami niwakhuphule niwakhiphe lapha.” +
26 UJosefa wafa eneminyaka engu-110, bamgcoba + ukuze angaboli, wayesefakwa ebhokisini lokungcwaba eGibhithe.
Imibhalo yaphansi
^ Lena inqubo yokugcoba isidumbu ngezinto ezifana namafutha anuka kamnandi ukuze singaboli.
^ Noma, “nendlu kaFaro.”
^ Indawo okubhulelwa kuyo ukudla okusanhlamvu.
^ Incazelo: “Ukulila KwamaGibhithe.”
^ NgesiHebheru, “Azalelwa emadolweni kaJosefa.” Okuwukuthi, aphathwa njengamadodana akhe aboniswa umusa okhethekile.
