Genesise 16:1-16
-
UHagari no-Ishmayeli (1-16)
16 Manje umka-Abrama uSarayi, wayengamzalelanga bantwana, + kodwa wayenencekukazi engumGibhithe egama layo linguHagari. +
2 Ngakho uSarayi wathi ku-Abrama: “Ngicela ungilalele! UJehova ungivimbile ukuba ngingabatholi abantwana. Ngiyacela, lala nencekukazi yami. Mhlawumbe ngingathola abantwana ngayo.” + Ngakho u-Abrama wakulalela okwakushiwo uSarayi.
3 Ngemva kweminyaka eyishumi u-Abrama ehlala ezweni laseKhanani, umka-Abrama uSarayi, wathatha incekukazi yakhe engumGibhithe uHagari, wayinika umyeni wakhe u-Abrama njengomkakhe.
4 Ngakho walala noHagari, wakhulelwa. Lapho eqaphela ukuthi ukhulelwe, waqala ukudelela umka-Abrama.
5 Ngenxa yalokho uSarayi wathi ku-Abrama: “Into ebuhlungu engenziwe yona iyiphutha lakho. Yimina engabeka incekukazi yami ezingalweni zakho,* kodwa lapho iqaphela ukuthi ikhulelwe, yaqala ukungidelela. Kwangathi uJehova angahlulela phakathi kwami nawe.”
6 U-Abrama wathi kuSarayi: “Incekukazi yakho ingaphansi kwegunya lakho. Yenza kuyo noma ikuphi okubona kukuhle.” Ngemva kwalokho uSarayi wayihlazisa, yase imbalekela.
7 Kamuva ingelosi kaJehova yayithola emthonjeni wamanzi osehlane, umthombo osendleleni eya eShuri. +
8 Yathi: “Hagari, ncekukazi kaSarayi, uvelaphi futhi uyaphi?” UHagari wathi: “Ngibalekela indlovukazi yami uSarayi.”
9 Ingelosi kaJehova yabe isithi kuye: “Buyela endlovukazini yakho uzithobe ngaphansi kwesandla sayo.”
10 Ngemva kwalokho ingelosi kaJehova yathi: “Ngizoyandisa kakhulu inzalo* yakho, ibe ningi kakhulu ukuba ingabalwa.” +
11 Ingelosi kaJehova yanezela: “Manje ukhulelwe futhi uzozala indodana. Kumelwe uyiqambe ngokuthi u-Ishmayeli,* ngoba uJehova ukuzwile ukuhlupheka kwakho.
12 Yona, iyoba njengembongolo yasendle.* Isandla sayo siyomelana nawo wonke umuntu, nesandla sawo wonke umuntu siyomelana nayo, iyohlala eduze kwabo bonke abafowabo.”*
13 UHagari wabe esedumisa* igama likaJehova, owayekhuluma naye, wathi: “UnguNkulunkulu obonayo,” + ngoba wathi: “Ingabe ngempela ngimbonile ongibonayo?”
14 Yingakho lowo mthombo kwathiwa iBheri-lahayi-royi.* (Uphakathi kweKadeshi neBeredi.)
15 UHagari wazalela u-Abrama indodana, u-Abrama waqamba indodana yakhe ayizalelwa uHagari ngokuthi u-Ishmayeli. +
16 U-Abrama wayeneminyaka engu-86 lapho uHagari emzalela u-Ishmayeli.
Imibhalo yaphansi
^ NgesiHebheru, “esifubeni sakho.”
^ NgesiHebheru, “imbewu.”
^ Incazelo: “UNkulunkulu Uyezwa.”
^ Noma, “njenge-onager,” uhlobo lwembongolo yasendle, nakuba abanye becabanga ukuthi yidube. Cishe libhekisela esimweni sengqondo sokuzibusa.
^ Noma kungaba, “iyobazonda bonke abafowabo.”
^ NgesiHebheru, “esebiza.”
^ Incazelo: “Umthombo Wophilayo Ongibonayo.”
