Eyokuqala YaMakhosi 17:1-24
17 Manje u-Eliya *+ waseThishibi eGileyadi + wathi ku-Ahabi: “Ngifunga uJehova uNkulunkulu ka-Israyeli engimkhonzayo,* ngeke abe khona amazolo noma imvula kule minyaka, ngaphandle kokuba kuphume izwi emlonyeni wami!” +
2 Izwi likaJehova lafika kuye, lathi:
3 “Suka lapha, uye empumalanga ufike ucashe eSigodini SaseKheriti,* empumalanga yeJordani.
4 Kufanele uphuze emfuleni, ngizoyala amagwababa ukuba akunike ukudla lapho.” +
5 Ngaso leso sikhathi wahamba wenza ngokwezwi likaJehova; wahamba wahlala ngaseSigodini SaseKheriti,* empumalanga yeJordani.
6 Amagwababa ayemlethela isinkwa nenyama ekuseni nesinkwa nenyama kusihlwa, amanzi wayewaphuza emfuleni. +
7 Kodwa ngemva kwezinsuku ezithile, umfula woma + ngoba kwakungekho mvula ezweni.
8 Izwi likaJehova lafika kuye, lathi:
9 “Suka uye eZarefati, eSidoni, uhlale khona. Ngizoyala umfelokazi lapho ukuba akunike ukudla.” +
10 Ngakho wasuka waya eZarefati. Lapho efika esangweni ledolobha, wathola umfelokazi etheza izinkuni. Ngakho wathi kuye: “Ngicela ungiphe amanzi okuphuza.” +
11 Lapho ehamba ethi uyowalanda, wathi kuye: “Ngicela ungiphathele nocezu lwesinkwa.”
12 Owesifazane waphendula wathi: “Ngifunga uJehova uNkulunkulu wakho, anginaso isinkwa, nginenkeshezana kafulawa kuphela embizeni enkulu namafutha amancane embizeni encane. + Manje ngitheza izinkuni ezimbalwa, ngizongena ngizenzele okuthile mina nendodana yami. Lokhu kuzoba ukudla kwethu kokugcina, ngemva kwalokho sizofa.”
13 U-Eliya wathi kuye: “Ungesabi. Ngena, wenze njengoba ushilo. Kodwa qala ngokwenzela mina isinkwa esiyindilinga ngalokho onakho usilethe kimi. Ngemva kwalokho ungazenzela okuthile wena nendodana yakho.
14 Ngoba yilokhu uJehova uNkulunkulu ka-Israyeli akushoyo: ‘Imbiza enkulu kafulawa ngeke iphele, nembiza encane yamafutha ngeke iphele kuze kube usuku uJehova ayonisa ngalo imvula phezu komhlaba.’ ” +
15 Ngakho wahamba wenza ngokwezwi lika-Eliya, waqhubeka edla, yena nendodana yakhe no-Eliya, izinsuku eziningi. +
16 Imbiza enkulu kafulawa ayizange iphele nembiza encane yamafutha ayizange iphele, ngokwezwi likaJehova ayelikhulume ngo-Eliya.
17 Ngemva kwalezi zinto indodana yalona wesifazane owayengumninindlu, yagula kakhulu yaze yafa. +
18 Owesifazane wathi ku-Eliya: “Ngenzeni kuwe,* muntu kaNkulunkulu weqiniso? Ingabe uzele ukuzongikhumbuza izono zami nokuzobulala indodana yami?” +
19 Kodwa wathi kuye: “Yilethe lapha indodana yakho.” Ngakho wayithatha ezandleni zakhe wenyukela nayo egumbini elisophahleni, lapho ayehlala khona, wayibeka phezu kombhede wakhe. +
20 Wakhuleka kuJehova wathi: “O Jehova Nkulunkulu wami, + ingabe uletha usizi nakulo mfelokazi engihlala kwakhe ngokuvumela ukuba indodana yakhe ife?”
21 Ngemva kwalokho wazelulela phezu komntwana kathathu wabiza uJehova wathi: “O Jehova Nkulunkulu wami, ngiyacela, yenza ukuba lo mntwana aphinde aphile.”
22 UJehova wawulalela umkhuleko ka-Eliya, + umntwana wavuka ekufeni. +
23 U-Eliya wathatha umntwana wehla naye esuka egumbini elisophahleni wamyisa endlini wafike wamnika unina; u-Eliya wathi: “Bheka, indodana yakho iyaphila.” +
24 Lona wesifazane wathi ku-Eliya: “Manje sengiyazi ukuthi ngempela ungumuntu kaNkulunkulu + nokuthi izwi likaJehova olikhulumile liyiqiniso.”
Imibhalo yaphansi
^ Incazelo: “UNkulunkulu Wami NguJehova.”
^ NgesiHebheru, “engimi phambi kwakhe.”
^ Noma, “eMhosheni WaseKheriti.”
^ Noma, “ngaseMhosheni WaseKheriti.”
^ Noma, “Yini engihlanganisa nawe, . . . ?”
