UmShumayeli 7:1-29
7 Igama lingcono kunamafutha amahle,+ nosuku lokufa lungcono kunosuku lokuzalwa komuntu.+
2 Kungcono ukuya endlini yokulila kunokuya endlini yedili,+ ngoba lokho kuwukuphela kwaso sonke isintu; futhi ophilayo kufanele akufake enhliziyweni.
3 Kungcono ukukhathazeka kunokuhleka,+ ngoba ngokuhlunama kobuso inhliziyo iba ngcono.+
4 Inhliziyo yabahlakaniphile isendlini yokulila,+ kodwa inhliziyo yeziphukuphuku isendlini yokujabula.+
5 Kungcono ukuzwa ukukhuza kohlakaniphile+ kunokuba ube ngumuntu ozwa ingoma yeziphukuphuku.+
6 Ngoba njengomsindo wameva ngaphansi kwembiza, kunjalo ukuhleka kwesiphukuphuku;+ lokhu nakho kuyize.
7 Ngoba ukucindezelwa kukodwa kungenza ohlakaniphileyo enze ngendlela yokusangana,+ nesipho+ singayibhubhisa inhliziyo.+
8 Kungcono ukuphela kwendaba kamuva kunokuqala kwayo.+ Ungcono obekezelayo kunomuntu onomoya ozidlayo.+
9 Ungasheshi ukucasuka emoyeni wakho,+ ngoba ukucasuka kuhlala esifubeni seziphukuphuku.+
10 Ungasho ukuthi: “Kungani izinsuku zangaphambili ziye zaba ngcono kunalezi?”+ ngoba awukubuzi ngokuhlakanipha+ lokhu.
11 Ukuhlakanipha kanye nefa kuhle futhi kunenzuzo kulabo ababona ilanga.+
12 Ngoba ukuhlakanipha kuyisivikelo+ njengoba nje nemali iyisivikelo;+ kodwa inzuzo yolwazi iwukuthi ukuhlakanipha kona kuyabalonda abaninikho.+
13 Bona umsebenzi+ kaNkulunkulu weqiniso, ngoba ubani okwaziyo ukuqondisa lokho akwenze kwagwegwa?+
14 Ngosuku oluhle zibonakalise usebuhleni,+ nangosuku lwenhlekelele bona ukuthi uNkulunkulu weqiniso ulwenzile lolu ngokufana ncamashí nalolo,+ ngenhloso yokuba abantu bangatholi lutho olungemva kwabo.+
15 Ngikuboné konke ngezinsuku zami eziyize.+ Kukhona olungile oshabalala ekulungeni kwakhe,+ futhi kukhona omubi oqhubeka isikhathi eside ebubini bakhe.+
16 Ungabi olunge ngokwedlulele,+ noma uzibonise uhlakaniphe ngokweqile.+ Kungani kufanele uzibangele incithakalo?+
17 Ungabi mubi ngokwedlulele,+ noma ube yisiwula.+ Kungani kufanele ufe kungakabi yisikhathi sakho?+
18 Kungcono ukuba ubambe okunye, kodwa ungasihoxisi isandla sakho nakokunye futhi;+ ngoba owesaba uNkulunkulu uyophuma kukho konke.+
19 Ukuhlakanipha kukodwa kunamandla kohlakaniphileyo kunamadoda ayishumi asesikhundleni sokuphatha asemzini.+
20 Ngoba akekho umuntu olungileyo emhlabeni oqhubeka enza okuhle futhi angoni.+
21 Futhi, unganikeli inhliziyo yakho kuwo wonke amazwi abantu abangase bawakhulume,+ ukuze ungezwa inceku yakho ikuqalekisa.+
22 Ngoba inhliziyo yakho yazi kahle ukuthi ezikhathini eziningi nawe, yebo nawe, uye wabaqalekisa abanye.+
23 Konke lokhu ngiye ngakuvivinya ngokuhlakanipha. Ngathi: “Ngizohlakanipha.” Kodwa kwakukude nami.+
24 Lokho okuye kwaba khona kukude kakhulu futhi kujule ngokwedlulele. Ubani ongakuthola?+
25 Mina ngokwami ngaphenduka, ngisho nenhliziyo yami yenza kanjalo,+ ukuba ngazi ngihlole futhi ngifune ukuhlakanipha+ nesizathu sezinto,+ nokuba ngazi ngobubi bobuphukuphuku nobuwula bobuhlanya;+
26 futhi nakhu engangikuthola: Okumunyu kunokufa+ ngathola ukuthi ngowesifazane ongamanetha okuzingela futhi onhliziyo yakhe ingamanetha ahudulwayo nozandla zakhe ziyizibopho.+ Muhle phambi kukaNkulunkulu weqiniso umuntu uma ephunyuka kuye, kodwa umuntu uyona uma ethunjwa nguye.+
27 “Bheka! Ngikutholile lokhu,” kusho umhlanganisi,+ “into ihlanganiswa nenye, ukuze kutholakale ingqikithi,+
28 umphefumulo wami obulokhu uyifuna ngokuqhubekayo, kodwa engingakayitholi. Indoda eyodwa kwayinkulungwane ngiyitholile,+ kodwa owesifazane phakathi kwabo bonke laba angikamtholi.+
29 Bheka! Yilokhu kuphela engikutholile, ukuthi uNkulunkulu weqiniso wabenza abantu beqotho,+ kodwa bona ngokwabo baye bafuna amacebo amaningi.”+
