UmShumayeli 6:1-12
6 Kukhona inhlekelele engiyibonile phansi kwelanga, futhi ivamile esintwini:
2 umuntu uNkulunkulu weqiniso amnika ingcebo nempahla yezinto ezibonakalayo nodumo,+ ongaswele lutho lomphefumulo wakhe azibonisa elulangazelela,+ kodwa nokho uNkulunkulu weqiniso angamenzi akwazi ukukudla,+ nakuba umuntu wezizwe+ nje engase akudle. Lokhu kuyize futhi kuyisifo esibi.
3 Uma umuntu engase azale abantwana abayikhulu,+ futhi engase aphile iminyaka eminingi, zize zibe ziningi izinsuku zeminyaka yakhe,+ kodwa umphefumulo wakhe unganeliseki ngezinto ezinhle+ futhi ithuna lingakabi ngelakhe,+ mangisho ukuthi ozelwe ngaphambi kwesikhathi ungcono kakhulu kunaye.+
4 Ngoba yena uye waba khona ngeze futhi umuka ebumnyameni, negama lakhe liyombozwa ubumnyama.+
5 Ngisho nelanga ngokwalo akazange alibone, noma alazi.+ Lona unokuphumula kunowokuqala.+
6 Ngisho noma kungase kuthiwe uye waphila iminyaka eyinkulungwane ngokuphindwe kabili nokho engazange akubone okuhle,+ abayi ndawonye yini bonke abantu?+
7 Wonke umsebenzi onzima wabantu bawenzela umlomo wabo,+ kodwa ngisho nomphefumulo wabo siqu awugcwali.
8 Ngoba unanzuzoni ohlakaniphileyo ngaphezu koyisiphukuphuku?+ Yini ohluphekileyo anayo ngokwazi ukuhamba phambi kwabaphilayo?
9 Kungcono ukubona ngamehlo kunokuhambahamba komphefumulo.+ Lokhu nakho kuyize nokulwela ukufica umoya.+
10 Noma yini eye yaba khona, igama layo kakade liye lashiwo, futhi sekuyaziwa ukuthi umuntu uyini;+ futhi akakwazi ukumela udaba lwakhe kumuntu onamandla kunaye.+
11 Ngenxa yokuthi kukhona izinto eziningi ezibangela ize kakhulu,+ unanzuzoni umuntu?
12 Ngoba ngubani owaziyo ukuthi unabuhle buni umuntu ekuphileni+ ngesibalo sezinsuku zokuphila kwakhe okuyize, lapho ezichitha njengethunzi?+ Ngoba ngubani ongatshela umuntu ukuthi yini ezokwenzeka phansi kwelanga ngemva kwakhe?+
