Duteronomi 8:1-20
8 “Yonke imiyalo engikuyala ngayo namuhla kufanele niqaphele ukuba niyigcine,+ ukuze niqhubeke niphila+ futhi nande ngempela ningene nilithathe izwe uJehova alifungela okhokho benu.+
2 Kumelwe uyikhumbule yonke indlela uJehova uNkulunkulu wakho akwenza ukuba uyihambe ngale minyaka engamashumi amane ehlane,+ ukuze akuthobise,+ futhi akuvivinye+ ukuze azi lokho okwakusenhliziyweni yakho,+ ukuthi uyoyigcina yini imiyalo yakhe noma cha.
3 Ngakho wakuthobisa wakuyeka walamba+ futhi wakondla ngemana,+ owawungalazi wena noyihlo ababengalazi; ukuze akwenze wazi ukuthi umuntu akaphili ngesinkwa sodwa kodwa umuntu uphila nangawo wonke amazwi omlomo kaJehova.+
4 Isiphuku sakho asizange sikugugele, nonyawo lwakho aluzange luvuvukale kule minyaka engamashumi amane.+
5 Wazi kahle enhliziyweni yakho ukuthi uJehova uNkulunkulu wakho wayekuqondisa, njengoba nje umuntu eyiqondisa indodana yakhe.+
6 “Kumelwe ugcine imiyalo kaJehova uNkulunkulu wakho ngokuhamba ezindleleni zakhe+ nangokumesaba.+
7 Ngoba uJehova uNkulunkulu wakho ukungenisa ezweni elihle,+ izwe lezigodi ezinezifufula zamanzi, iziphethu nezintwa zamanzi eziphuma ethafeni elisesigodini+ nasesifundeni sezintaba,
8 izwe likakolweni nebhali nemivini namakhiwane namahalananda,+ izwe leminqumo yamafutha noju,+
9 izwe ongeke udle kulo isinkwa ngokuntula, ongeke untule lutho kulo, izwe elimatshe alo ayinsimbi nasezintabeni zalo oyokumba kuzo ithusi.
10 “Lapho usudlile wazanelisa,+ kumelwe futhi utuse+ uJehova uNkulunkulu wakho ngenxa yezwe elihle akunike lona.+
11 Ziqaphele ukuba ungamkhohlwa+ uJehova uNkulunkulu wakho bese ungayigcini imiyalo yakhe nezinqumo zakhe zokwahlulela nezimiso zakhe engikuyala ngazo namuhla;+
12 funa udle uzanelise, wakhe izindlu ezinhle uhlale kuzo,+
13 umhlambi wakho wezinkomo nomhlambi wakho wezimvu wande, likwandele nesiliva negolide, nakho konke okungokwakho kwande;
14 inhliziyo yakho iphakame+ bese ukhohlwa uJehova uNkulunkulu wakho, owakukhipha ezweni laseGibhithe, endlini yezigqila;+
15 owakwenza ukuba udabule leli hlane elikhulu nelesabekayo,+ elinezinyoka ezinesihlungu+ nawofezela nelinomhlabathi owomile ongenawo amanzi; owakukhiphela amanzi edwaleni lensengetsha;+
16 owakondla ngemana+ ehlane, oyihlo ababengalazi, ukuze akuthobise+ futhi akuvivinye ukuze akwenzele okuhle ezinsukwini zakho zakamuva;+
17 bese uthi enhliziyweni yakho, ‘Amandla ami nazo zonke izikhwepha zesandla sami kungenzelé lo mcebo.’+
18 Kumelwe ukhumbule uJehova uNkulunkulu wakho, ngoba nguye okuphe amandla ukuze wenze umcebo;+ ukuze afeze isivumelwano sakhe asifunga kokhokho bakho, njengakulolu suku.+
19 “Futhi uma kwenzeka umkhohlwe uJehova uNkulunkulu wakho futhi empeleni ulandele abanye onkulunkulu ubakhonze ukhothame phambi kwabo, ngiyafakaza namuhla ngokumelene nani ukuthi niyoshabalala ngokuphelele.+
20 Njengezizwe uJehova azibhubhisayo phambi kwenu, yileyo ndlela eniyoshabalala ngayo, ngoba ningafuni ukulalela izwi likaJehova uNkulunkulu wenu.+
