Duteronomi 24:1-22
24 “Uma kwenzeka umuntu ethatha owesifazane amenze abe ngowakhe njengomkakhe, kuyothi uma engawutholi umusa emehlweni akhe ngoba ethole okuthile okuyihlazo kuye,+ amlobele incwadi yesehlukaniso+ amnike yona amxoshe endlini yakhe.+
2 Kumelwe aphume endlini yakhe ahambe ayoba ngowomunye umuntu.+
3 Uma lo muntu wokugcina naye esemzonda futhi emlobelé incwadi yokuhlukanisa naye wamnika yona wamxosha endlini yakhe, noma uma lo muntu wokugcina owamthatha njengomkakhe kwenzeka afe,
4 umnikazi wakhe wokuqala owamxosha ngeke avunyelwe ukuba aphinde amthathe abe ngumkakhe ngemva kokuba esengcolisiwe;+ ngoba lokho kuyinto enengekayo phambi kukaJehova, futhi akumelwe uliholele esonweni izwe uJehova uNkulunkulu wakho akunika lona njengefa.
5 “Uma kwenzeka umuntu ethatha umfazi omusha,+ akufanele aphume aye empini, futhi akufanele athweswe noma yini enye. Kufanele aqhubeke ekhululiwe endlini yakhe unyaka owodwa, ajabulise umkakhe amthathile.+
6 “Akekho okufanele athathe itshe lokugaya noma imbokodo yalo njengesibambiso,+ ngoba kuwukuphila lokho akuthathayo njengesibambiso.
7 “Uma kwenzeka umuntu etholakala ethumba+ umphefumulo kubafowabo kubantwana bakwa-Israyeli, wawuphatha kabi futhi wawuthengisa,+ lowo mthumbi kumelwe afe. Kumelwe ususe okubi phakathi kwakho.+
8 “Siqaphele isifo sochoko+ unakekele ukuba wenze ngokuvumelana nakho konke abapristi, amaLevi, abayonifundisa kona.+ Njengoba nje ngibayalile, kufanele ninakekele+ ukuba nenze kanjalo.
9 Kufanele kukhunjulwe lokho uJehova uNkulunkulu wakho akwenza kuMiriyamu endleleni lapho niphuma eGibhithe.+
10 “Uma kwenzeka uboleka umuntu wakini impahla yanoma iluphi uhlobo,+ akumelwe ungene endlini yakhe uyothatha kuye isibambiso.+
11 Kufanele ume ngaphandle, umuntu omtshelekayo alethe isibambiso kuwe ngaphandle.
12 Uma lo muntu esenkathazweni, akumelwe ulale nesibambiso sakhe.+
13 Kufanele nakanjani ubuyisele isibambiso sakhe kuye ngokushesha nje lapho ilanga lishona,+ futhi kumelwe alale ngengubo yakhe,+ akubusise;+ kuyoba ukulunga kuwe phambi kukaJehova uNkulunkulu wakho.+
14 “Akumelwe uphambe isisebenzi esisenkathazweni nesimpofu, kungakhathaliseki ukuthi singomunye wabafowenu noma wabafokazi abaphakathi kwenu abasezweni lakini, ngaphakathi kwamasango akho.+
15 Ngosuku lwaso kufanele usinike inkokhelo yaso,+ lingashoni ilanga isekuwe, ngoba sisenkathazweni futhi siphakamisela umphefumulo waso enkokhelweni yaso; ukuze singakhali ngawe kuJehova,+ kube yisono kuwe.+
16 “Oyise akufanele babulawe ngenxa yabantwana, nabantwana akufanele babulawe ngenxa yoyise.+ Yilowo nalowo kufanele abulawelwe isono sakhe siqu.+
17 “Ungasiphendukezeli isahlulelo somfokazi+ noma sentandane,+ futhi akumelwe uthathe ingubo yomfelokazi njengesibambiso.+
18 Kumelwe ukhumbule ukuthi waba yisigqila eGibhithe, futhi uJehova uNkulunkulu wakho wakukhulula lapho.+ Yingakho ngikuyala ukuba wenze le nto.
19 “Uma kwenzeka uvuna isivuno ensimini yakho,+ ukhohlwe isithungu ensimini, ungaphindeli emuva uyosilanda. Kufanele sisalele umfokazi, intandane nomfelokazi;+ ukuze uJehova uNkulunkulu wakho akubusise kuzo zonke izenzo zesandla sakho.+
20 “Uma kwenzeka uvuthuza umnqumo wakho, akumelwe uhlwayisise emagatsheni awo ulandelela. Kufanele kusalele umfokazi, intandane nomfelokazi.+
21 “Uma kwenzeka ubutha amagilebhisi esivini sakho, akumelwe ubuthe izinsalela ulandelela. Kufanele zisalele umfokazi, intandane nomfelokazi.
22 Kumelwe ukhumbule ukuthi waba yisigqila ezweni laseGibhithe.+ Yingakho ngikuyala ukuba wenze le nto.+
