Daniyeli 5:1-31
5 UBhelishazari+ inkosi wenzela abahlonishwa bakhe abayinkulungwane idili elikhulu, futhi wayephuza iwayini phambi kwale nkulungwane.+
2 Ethonywé yiwayini,+ uBhelishazari wathi makulethwe izitsha zegolide nezesiliva+ uNebukhadinezari uyise ayezithathe ethempelini elaliseJerusalema, ukuze inkosi nabahlonishwa bayo, izancinza zayo namabibi ayo baphuze ngazo.+
3 Ngaleso sikhathi baletha izitsha zegolide ababezithathe ethempelini lendlu kaNkulunkulu eyayiseJerusalema, futhi inkosi nabahlonishwa bayo, izancinza zayo namabibi ayo baphuza ngazo.
4 Baphuza iwayini, futhi badumisa onkulunkulu begolide nabesiliva, bethusi, bensimbi, bokhuni nabetshe.+
5 Ngawo lowo mzuzwana kwavela iminwe yesandla somuntu ibhala phambi kothi lwesibani odongeni olukhonkiwe lwesigodlo senkosi,+ futhi inkosi yayibona inhlanekela yesandla esasiloba.
6 Inkosi yona, ngaleso sikhathi ibala layo lashintsha kuyo, futhi imicabango yayo yaqala ukuyethusa,+ amalungu okhalo lwayo ayexegezela+ namadolo ayo ayeshayana.+
7 Inkosi yamemeza kakhulu ithi makungeniswe abalumbi, amaKhaledi nababhula ngezinkanyezi.+ Inkosi yakhuluma yathi kubantu abahlakaniphile baseBhabhiloni: “Noma yimuphi umuntu ozofunda lo mbhalo futhi angibonise incazelo yawo, uzombathiswa ezinsomi,+ afakwe umgexo wegolide entanyeni yakhe, futhi uzobusa njengowesithathu embusweni.”+
8 Ngaleso sikhathi bonke abantu abahlakaniphile benkosi babengena, kodwa babengakwazi ukuwufunda umbhalo noma ukwazisa inkosi incazelo.+
9 Ngenxa yalokho iNkosi uBhelishazari yethuka kakhulu nebala layo lalishintsha ngaphakathi kuyo; futhi abahlonishwa bayo babesambathekile.+
10 Indlovukazi yona, ngenxa yamazwi enkosi nabahlonishwa bayo yangena yaqonda ngqo ngaphakathi ehholo ledili. Indlovukazi yakhuluma yathi: “O nkosi, phila kuze kube nini nanini.+ Ungavumeli imicabango yakho ikwethuse, noma uvumele ibala lakho lishintshe.
11 Kukhona indoda enekhono embusweni wakho okukhona kuyo umoya wonkulunkulu abangcwele;+ futhi ezinsukwini zikayihlo kwakutholakala kuyo ukukhanyiselwa nokuqondisisa nokuhlakanipha okunjengokuhlakanipha konkulunkulu, futhi iNkosi uNebukhadinezari uyihlo yayimisa njengenduna+ yabapristi abenza imilingo, abalumbi, amaKhaledi nababhula ngezinkanyezi, yebo uyihlo, nkosi;
12 njengoba nje umoya nolwazi nokuqondisisa okungaphezu kokuvamile kokuchaza amaphupho+ nokuchazwa kweziphicaphicwano nokuqaqwa kwamafindo kwakutholakele kuyo,+ kuDaniyeli, inkosi ngokwayo eyamqamba ngokuthi uBheliteshazari.+ Manje makubizwe uDaniyeli, ukuze anikeze incazelo.”
13 Ngalokho uDaniyeli wangeniswa phambi kwenkosi. Inkosi yakhuluma yathi kuDaniyeli: “Ingabe nguwe uDaniyeli wabadingiswa bakwaJuda,+ inkosi ubaba eyabakhipha bephuma kwaJuda?+
14 Ngizwile futhi ngawe ukuthi umoya wonkulunkulu ukuwe,+ nokuthi kuwe kutholakele ukukhanyiselwa nokuqondisisa nokuhlakanipha+ okungaphezu kokuvamile.
15 Manje kungeniswe phambi kwami abantu abahlakaniphile nabalumbi, ukuba bafunde lo mbhalo, ukuze bangazise nokungazisa incazelo yawo; kodwa abakwazi ukusho incazelo yaleli zwi.+
16 Mina-ke ngizwile ngawe, ukuthi uyakwazi ukunika izincazelo+ nokuqaqa amafindo. Manje, uma ukwazi ukufunda lo mbhalo futhi ungazise incazelo yawo, uzombathiswa ezinsomi, ufakwe umgexo wegolide entanyeni yakho, futhi uzobusa njengowesithathu embusweni.”+
17 Ngaleso sikhathi uDaniyeli waphendula wathi phambi kwenkosi: “Izipho zakho mazibe ngezakho, namaxosho akho wanike abanye.+ Nokho, ngizoyifundela inkosi umbhalo ngokwawo, futhi ngizoyazisa incazelo.+
18 Ngokuqondene nawe nkosi, uNkulunkulu oPhezukonke+ wanika uNebukhadinezari uyihlo+ umbuso nobukhulu nesithunzi nokubabazeka.+
19 Futhi ngenxa yobukhulu amnika bona, zonke izizwe, amaqembu ezizwe nezilimi zaziqhaqhazela futhi zibonisa ukwesaba phambi kwakhe.+ Lowo ayefuna ukumbulala, wayembulala; lowo ayefuna ukumshaya, wayemshaya; lowo ayefuna ukumphakamisa, wayemphakamisa; nalowo ayefuna ukumthobisa, wayemthobisa.+
20 Kodwa lapho inhliziyo yakhe izidla nomoya wakhe uba lukhuni, waze wenza ngokugabadela,+ wehliswa esihlalweni sobukhosi sombuso wakhe, nesithunzi sakhe sasuswa kuye.+
21 Waxoshwa kubantwana babantu, nenhliziyo yakhe yenziwa yaba njengeyesilwane, futhi indawo yakhe yokuhlala yayikanye nezimbongolo zasendle.+ Wayephiwa izimila ukuba adle njengezinkomo, nomzimba wakhe wamanziswa amazolo ezulu,+ waze wazi ukuthi uNkulunkulu oPhezukonke unguMbusi embusweni wesintu, nokuthi lowo afuna ukummisa, uyammisa phezu kwawo.+
22 “Wena-ke, ndodana yakhe Bhelishazari,+ awuzange uyithobise inhliziyo yakho,+ nakuba ubukwazi konke lokhu.+
23 Kodwa uziphakamisile eNkosini yamazulu,+ futhi kulethwe phambi kwakho ngisho nezitsha zendlu yayo;+ futhi wena nabahlonishwa bakho, izancinza zakho namabibi akho beniphuza ngazo iwayini, futhi udumisé onkulunkulu besiliva nje nabegolide, bethusi, bensimbi, bokhuni nabetshe,+ abangaboni lutho nabangezwa lutho nabangazi lutho;+ kodwa uNkulunkulu okuphefumula kwakho kusesandleni sakhe+ nezikuye zonke izindlela zakho+ awumkhazimulisanga.+
24 Ngenxa yalokho kuthunyelwe inhlanekela yesandla ivela kuye, futhi kulotshwé lo mbhalo.+
25 Yilo umbhalo olotshiwe: MENE, MENE, TEKEL, FARSIN.
26 “Yile incazelo yaleli gama: MENE, uNkulunkulu uzibalile izinsuku zombuso wakho futhi uwuqedile.+
27 “TEKEL, wena ukalwé ezilinganisweni futhi utholakalé untula.+
28 “PERES, umbuso wakho uhlukanisiwe wanikwa amaMede namaPheresiya.”+
29 Ngaleso sikhathi uBhelishazari wayala, futhi bamembathisa uDaniyeli ngezinsomi, bamfaka umgexo wegolide entanyeni yakhe; futhi bamemezela ngokuphathelene naye ukuthi wayezoba ngumbusi wesithathu embusweni.+
30 Ngabo kanye lobo busuku uBhelishazari inkosi yamaKhaledi wabulawa+
31 kwathi uDariyu+ umMede wamukela umbuso, eneminyaka engaba ngamashumi ayisithupha nambili ubudala.
