2 Korinte 4:1-18
4 Kungakho singayeki, ngoba sinale nkonzo+ ngokwesihe esaboniswa sona;+
2 kunalokho siye sazilahla izinto zomshoshaphansi okumelwe sibe namahloni ngazo,+ njengoba singahambi ngobuqili, futhi singalonakalisi izwi likaNkulunkulu,+ kodwa ngokulenza libe sobala iqiniso sizitusa kubo bonke onembeza babantu emehlweni kaNkulunkulu.+
3 Manje, uma izindaba ezinhle esizimemezelayo eqinisweni zigutshuzelwe, zigutshuzelwe phakathi kwalabo ababhubhayo,+
4 phakathi kwalabo unkulunkulu walesi simiso sezinto+ aye waphuphuthekisa izingqondo zabangakholwa,+ ukuze kungakhanyi+ ukukhanya+ kwezindaba+ ezinhle ezikhazimulayo mayelana noKristu, ongumfanekiso+ kaNkulunkulu.
5 Ngoba asishumayeli ngathi ngokwethu, kodwa ngoKristu Jesu ukuthi uyiNkosi,+ nangathi ukuthi siyizigqila zenu+ ngenxa kaJesu.
6 Ngoba uNkulunkulu nguye owathi: “Ukukhanya makukhanye ebumnyameni,”+ futhi ukhanyisé izinhliziyo zethu ukuze azenze zikhanye+ ngolwazi+ olukhazimulayo lukaNkulunkulu ngobuso bukaKristu.+
7 Nokho, sinale ngcebo+ ezitsheni+ zobumba,+ ukuze amandla+ angaphezu kwavamile abe ngakaNkulunkulu+ angabi ngavela kithi.+
8 Sicindezelwe ngazo zonke izindlela,+ kodwa asiminyene kangangokuthi asikwazi nokunyakaza; sisambathekile, kodwa asibona abangenayo nhlobo indlela yokuphuma;+
9 siyashushiswa, kodwa asishiywa dengwane;+ siphonswa phansi,+ kodwa asibhubhi.+
10 Ngaso sonke isikhathi sikhuthazelela yonke indawo emzimbeni wethu impatho ebulalayo eyanikezwa uJesu,+ ukuze ukuphila kukaJesu kubonakaliswe futhi emzimbeni wethu.+
11 Ngoba thina esiphilayo njalo senziwa sibhekane nokufa ubuso nobuso+ ngenxa kaJesu, ukuze ukuphila kukaJesu kubonakaliswe futhi enyameni yethu efayo.+
12 Ngenxa yalokho kithi kusebenza ukufa, kodwa kini ukuphila.+
13 Ngenxa yokuthi sinomoya wokholo ofanayo nalowo okulotshwe ngawo ukuthi: “Ngabonisa ukholo, ngakho-ke ngakhuluma,”+ nathi sibonisa ukholo, ngakho-ke siyakhuluma,
14 sazi ukuthi lowo owavusa uJesu uyosivusa nathi kanye noJesu futhi asethule kanye nani.+
15 Ngoba zonke izinto zingenxa yenu,+ ukuze umusa ongafanelwe owaphindwaphindwa uvame ngenxa yokubonga kwabaningi ngokwengeziwe kube inkazimulo kuNkulunkulu.+
16 Ngakho-ke asiyeki, kodwa ngisho noma umuntu esinguye ngaphandle ewohloka, ngokuqinisekile umuntu esinguye ngaphakathi+ wenziwa musha usuku nosuku.
17 Ngoba nakuba usizi lungolomzuzwana+ futhi lulula, lusivezela inkazimulo enesisindo esidlulele ngokwengeziwe futhi ehlala phakade;+
18 kuyilapho sigcina amehlo ethu esezintweni ezingabonwayo, hhayi ezintweni ezibonwayo.+ Ngoba izinto ezibonwayo zingezesikhashana,+ kodwa izinto ezingabonwayo zihlala phakade.+
